Maraco 15 - Kulina New Testament Brazil

Tamine Piratoza Zeso iaqquemanarrari

¹ Ssiuarrezape dada toqquimade taminedeni, ime rrocouideni, zodeodenicca marinarra maridedeni, zodeodenicca uima cacattemadedeni bazima queriqquimanaza pouadenira uimahaha canarrari. Rrehe canirezapa Zeso birri rrore iquenaza tamine Piratouarri iaqquemanarrari, —Zeso zoqquena −quenauiuarrine. Tamine Piratopa rromanodeni. Pouapa zodeodenicca zama cacauade torrarrari.

² Nazapa tamine Piratouarri Zeso iaqquezimemanazapa Pirato Zesoza uati tarrari: —Tiape zodeodenicca tamine tirraqui? −narrari nade. —Rrehe, tetti nema tarraroparri −naui nade Zeso.

³ Nazapa dada toqquimade taminedenipa Piratoza poccadeni maizehe uati toquenarrari.

⁴ Nazapa Pirato Zesoza uati tapomaza: —Tia tecomera-rrerarraroqui? Arra pouadenipa ticca uimape uaidira tani uapi tani uati uati toquenaua −narrari nade.

⁵ Naraha Zeso zamarrama narrari. Nama nazapa tamine Pirato uatizerrari. Poua bodipa: —Nerrecotoui poua cacomarrari? −narrari nade.

—Barraba qquenana, Zesopa zoqquena −quenarrari

⁶ Uarrano uarrirriraza zodeodenicca errete Pascoa torreza tamine Piratopa toponi cocoroza madirra uezemanarrari orraria pouarrine qqueqquenemana narrari. Madirra bazima: —Narrari qquenana −quenazapa ihineqquena narrari. Piratopa narrarossa inananiuarrine narrorarrari.

⁷ Nazapa toponi cocoroza uezarrari orraria onipa Barraba. Barrabapa toponi nanarrizodedeni tezerre toponi cocoroza domo uezarrari. Pouapa poua tessedeni tezerre rromanodenicca tamineza rrara rrara quequenanaza madirra orraria irrinedeni auemanarrari.

⁸ Nanarra madirra bazima tamine Piratoza uatide rrauirronaza attidenipa: —Errete Pascoa torrezape toponi cocoroza uezarrari orraria tirrine qqueqquena nade. Narrarossa tinanapomarri inarraro −quenaui nade.

⁹ Naraha Piratoa: —Rrehe, arra pouaza: “Zodeodenicca tamine” quenarrari tappa onauiuarrine nacassaqquiri tinaqui? −naui nade.

¹⁰ Piratopa poua bodiza Zesopa uima cappiraui nauato taporrari. Poua bodipa: —Dada toqquimade taminedenipa Zesocca deni torrehe acconi boquemanaza ouaza eccarronemanarrari −narrari.

¹¹ Naraha dada toqquimade taminedenipa Zeso tossiuauauiuarrine touini quenarraraza madirra bazimaza uati narizemanaporrari: —“Barrabana qquenana” tiquenarri −quenaui nade. Nazapa bazima Barrabatoui rrouaua rrouaua canarrariparra.

¹² Naraha Piratopa domo uarrarideniza uati tapomarrari: —Rrehe, naraha pouaza “Zodeodenicca tamine” quenarraripa nerrecoma onanauiuarrine touini tiquenani? −naui nade.

¹³ Naraha bazima rrouaua rrouaua canapomazapa: —Aua porimacossaniza zoqquena, zoqquena! −quenaui nade.

¹⁴ —Naraha nerrecotoui zoqqueuiuarrine? Nerreco uimara inanarraro? −naui nade Pirato. Naraha domo uarrarideni bazima parra rroua toquenariui naza: —Aua porimacossaniza zoqquena, zoqquena! −quenaui nade.

¹⁵ Nazapa tamine Pirato pouaza madirra bazima uatizemanauiuarrine Barraba ineqquenarrari. Nazapa pocca isso teppeppedeni Zeso cossi inaqquimanauiuarrine icazossebaqquirrari. Cossi inaqquimanaha rricazapa icazossebaqquipomarrari: —Aua porimacossaniza coba tizanemanauiuarrine tiaqquemanarro −naui nade Pirato.

¹⁶ Nazapa tamine Piratocca isso teppeppedenipa oza imeni bodiuarricca boroniza Zeso iaqquezimemanarrari. Nauiza rromanodenicca isso teppeppe bazima toqueriqquirrari.

¹⁷ Pouadenipa: —Zeso pina taminessa inanana −quenaraha maizemanarrari. Nazapa etero macconi motaranicca pina taminedeniccassa narraroza Zeso oro izimemanarrari. —Zeso taticca pina tamine tatideniccassa nana −quenaraha cotiui atinema rrore nauarraniuira ettarimanarrari.

¹⁸ Nazapa rrarra icanaqquimanauiuarrine pouaza: —Deni tirrani zodeodenicca tamine! −quenaui nade maizemanaza.

¹⁹ Poua tatiza aua ppaua tarraroza uacca uacca quenarrari. Ppito inaqquimanarrari. Nazapa: —Pina taminezassa inana −quenaza Zeso baccouarri pouadeni pitoza uittemana, tocattezemana, uittemana, tocattezemana naraha maizemanarrari.

²⁰ Nazapa maizeheza pouaza rriza rriza quenaha rricazapa etero macconi motaraniccape ssiti iquenaza poua pocca eterora ineuezanimanarrari. Nazapa aua porimacossaniza Zeso coba izanemanauiuarrine iaqquemanarrari.

Zeso aua porimacossaniza coba izanemanarrari

²¹ Isso teppeppedenipa Zeso iaqquemananarra zama Sirenecca madirra Simaopa uizarrauarri ccaniza isso teppeppedeni bacco irrizemanarrari. Narrari Simaopa Aresadre, Ropodenicca abi. Zeso aua porimacossani zorro ineraha rrao torraza isso teppeppedenipa Simao icazossemanarrari: —Manaco tia arrarraricca aua porimacossani zorro tinarri −quenazapa manaco Simaona zorro inarraro.

²² Nazapa ssono Cocotauarri Zeso iaqquemoremanarrari. (Ssono onini Cocota ettizape: Totati Tonanissa nani, quequenanarrari.)

²³ Nauiza bacco toquenaza uva pperrene, aua amani onini mirra carrimeza Zesoza da icanemanarrari, —Poua comene orrizama naniuarrine –quenaza. Naraha Zesopa: —Poua! −narrari nade.

²⁴ Nazapa aua porimacossaniza coba izanemanarrari. Coba izanemanaha rricazapa acca icanamacosse-manarrari nade. Nazapa isso teppeppedeni: —Zesocca etero nerrecorrarizana torraniuarrine? −quenaza siba bedeniza coro coro quenarrari. Narraro sibaza ittomemanazapa pocca etero pouadeniza orrari orrari narizarraro nade.

²⁵ Izamassa marri 9'za Zeso coba izanemanarrari.

²⁶ Poua tati tetepiuarri dozo nani coba izanemanarraro. Narraro dozo nanipe: —Arrarraripa Zodeodenicca Tamine −narraro.

^27-28 Bobotide pamaha naco Zesozama topamarronauiuarrine aua porimacossaniza cobaba izanemanarrari. Ouahapa Zeso uinori nauatoniuarri que, ouahapa Zeso uinori ssamouarri que tarrari nade.

²⁹ Madirra naui rraui torreqquimarrarideni Zesoza nacasseraqquiri naza Zesoza tatamasso quenarrari. Tatideni uide uide quenaza attidenipa: —Arrina tettipe: “Deoza dada toqquima ocatabozape uada 3 neza ocanauatoninitoui” taterre nade −quenaui nade.

³⁰ —Rrari, tia tinassiuauarri. Aua porimacossaniza tia tidiniza ticcaronarri −quenaui nade.

³¹ Nazapa dada toqquimade taminedeni, zodeodenicca marinarra maridedeni quenarraridenipa Zeso itamassomanarrari: —Arrana madirra ouaha inassiuauabaqquiraha poua tonassiuauadepa ssamo taui.

³² Pouapa Cristo-Mesia Izarraeo potemaui zodeodenicca tamine torrazapa porimacossaniza ccaronana. Nazana qqui inaza pouaza parrissa inaniuarrine −quenarrari. Poua uinoricca naco aua porimacossaniza cobaba zanaraha narraro touattissa narraroza Zesoza atti atti quenaui nade.

Zeso uatiarrari

³³ Marri itetepi torraza zama nemanehe tozizini narraro. Zizi zanaporrarope marri 3 bacco tarraro.

³⁴ Narrari marri 3ʼza Zesopa poua attiza rrazirema uaua narrari: —Eroi, Eroi rema sabatani? −naui nade. (Narrarope ettizape: —Abi Deo, Abi Deo nerrecotoui oua tineborraro? −narrari nade.)

³⁵ Naraha nauiza domodeni uarrari mittemanazapa: —Titauaribobo canarri! Maittaccazamacca Deo Atti cacomerabote Eriaza uaua naui −quenaui nade.

³⁶ Nazapa nauiza domo uarrari orraria uassinarra rroppa tarrari, uassa tarrari idi, uva pperrene ssicata bidada tarrariza ezippa, pparra torraza bobaza oro, da icanamacossarrari. Nazapa narrari attia: —Maqui, niza pazerre! Poua idironauiuarrine Eria ccarronauitiderra. Qqui inaccana –naui nade.

³⁷ Naraha Zeso rrazirema rroua nazapa uatiarrari.

³⁸ Nanerre Deoza dada toqquima bodiuarricca uauacossa etero sibabote naqui Deorrine sseo naronarraro, carobe narraro.

³⁹ Nazapa Zeso baccouarri isso teppeppe tamine Zeso cacauade uarraripa Zeso uatiaui qqui taza: —Rraho! Parrissa arrarrari maqquiderrepa Deo Bediraha −naui nade isso teppeppe tamine atti.

⁴⁰ Amonerredeni naqui uarri taniza cattade domoni uarraro. Ponidenipe uapi teraha mota oninidenina Maria Madarenauarricca, Zoze Tiacodenicca ami Maria, Sarome quenarraro.

⁴¹ Mariadenipe Zeso zama arobeni Carireaza ccarizapoza poua accode pouaza rrauirizarraro. Amonerre onihideni naqui uapi tani. Ponidenipe Zerozareuarri Zesoza rrauirronarrarodeni.

Zeso ppa izemanarrari

⁴² Zeso zoqqueuicca uadape sexta-feira. Zodeodenipa narraro uadaza poccadeni rrassinarracca uadatoui nanarroremana narrari. Uada ssiuarra sabadope poccadeni rrassinarracca uada torrezape zepedeni ihirrimana narrararrari. Madirra zoqqueza ppa izemanauiuarrine naco oppina tani quequenanarrari.

⁴³ Nazapa sexta-feira zomebote naza oza panani Arimateauarricca madirra oni Zozepa cappinera taza tamine Piratoza uatide toccarrari. Pouapa zodeodenicca uima cacattemadedeni orraria. Madirra bazimapa pouaza nauatoqquiri narrari. Poua naco Deocca cacauehetoui narroraha madirrari. Nazapa tamine Piratoza bacco taza Zeso assire ppa izauiuarrine uati tarrari.

⁴⁴ Naraha Zoze atti mittazapa Pirato tobicaui narrari, —Zeso amazati uatiaui −quenaui mittaza. Nazapa uaua narrari isso teppeppedeni tamineza: —Nirra parrissa rridaccazama zoqquerrarico? −naui nade Pirato.

⁴⁵ Nazapa isso teppeppedenicca taminea: —Rrehe, parrissa, zoqquerraripa −nazapa Pirato Zozeza: —Rrehe, Zeso assire dicca taza ppa tizauiuarrine tiaccarro −naui nade.

⁴⁶ Nazapa Zoze etero zorrorani onini linho, bica tanicca mittade toccarrari. Mitta inezape Zeso coba zanaha que tauiuarri tocanarroranirrari, Zeso assire dicca inaza eteroza rrore inaqquirrari. Nazapa Zeso assire tonoccobiriuarri zorro inarrari. Naniza tonoccobiriuarrine sibaza ui tozimani narroraporraro. Nauiza Zeso assire zorro izimaza ibezarrari. Siba imeni cco inaniza Zeso noccobiri odiniuarri ecossarraro nade.

⁴⁷ Naniza Maria Madarenauarricca, Zozecca ami Maria quenarrarodeni Zeso assire ibezaui qqui toquenarraro.