Huano 9 - Kulina New Testament Brazil

Zesopa nocco siri nama naha tossonaui nocco ssire inanarrari

¹ Zeso itezerre ccarizazapa maqquiderre nocco siri qqui inade. Narraripa nama naha tossonarrari.

² Nezape ia poua uatimadedeni uati inade: —Ia Maride nerrecotoui arrarrari maqquiderrepa nocco siri tossonarrari? Imehidenicca uimasiri manaconico? Pocca uimasiri manaconirana? −inade.

³ Naraha Zeso iaza uati tade: —Pocca uimasiri manaconi rraraui. Imehidenicca uimasiri manaconi rraraui. Nama naha tossonarrari, naui zotodepa Deocca nauatouerrine tobicaui auato tauiuarrine.

⁴ Nema nezape ssiuarra taqquezama oua cazosserraricca zossenirri izepe irrina, onarraro. Niza zomezape izepe irriniuarrine ssamo tani. Niza ozoqquezape pina zomerrarossa nanitoui.

⁵ Narraroa arri namiuarri omadiqquezape arrirraro namiza madimanarraridenicca ssiuarrani orraccani –nade Zeso.

⁶ Narraro uima uati taha rricazapa Zeso poua nassope namiza ppito ineza sica sica ineza maqquiderre nocco siri nocco sse inarraride.

⁷ Nazapa Zeso nocco siri zosse inade: —Arricca siba ui tozanicca passo onini Siroeza tinocco ssaua tana −nade. (Siroe ettizape: Zosse taui, inarraro.) Nazapa toqquezipparrari, poua nocco ssaua naza pocca ozauarri toccanizapa nocco ssire taha toccanide.

⁸ Nazapa poua uinoricca madirra, ouahadeni tezerre nocco tobicaui qqui toquenarrari. Pouadenipa zinirotoui uiuitta naui qqui qqui toquenaporra narrari poua tauimari uimahaha canarraride: —Arrarraripa danirritoui uiuitta narrari rraraco? −quenade.

⁹ Naraha madirra ouahapa: —Narrariderra −quenade. Naraha madirra ouahapa: —Narrari rraraui. Pina narrarissa narrari −quenade. Naraha poua attipa: —Rrehe, ouape oua −nade.

¹⁰ Nazapa pouaza uati toquenade: —Nerrecoma teza tinocco ssire tarraro? −quenade.

¹¹ Naraha pouadeniza uati tade: —Arra maqquiderre oni Zeso quenarrari ssicarini sica ineza onocco sse inarraropa. Nazapa ouaza: “Arricca passo Siroeza tinocco ssaua tana” naza oqquezippeza onocco ssaua onezape onocco ssire tarraropa −nade.

¹² Nazapa pouaza uati toquenade: —Naraha narrari maqquiderrepa nerrecouarrinarra? −quenade. Naraha: —Ssamo onani −nade.

Marinarra onini parizeoza rrehe quenarrarideni nocco ssire nimaniuiza uati uati toquenarrari

^13-14 Zesopa zodeodenicca rrassinarracca uadaza ssicarini sica ineza madirra nocco siri nocco ssire inanarrari. Narraro rrassinarracca uadaza nama narrarirrine madirradenipa nocco ssire nimaniui iaqquemanarraride, marinarra parizeoza rrehe quenarrarideniuarri.

¹⁵ Nazapa narraridenina arra nocco ssire nimaniuiza uati toquenade: —Tia nerrecoma tonanaza tinocco ssire tarrarotte? −quenade. Nazapa: —Rrehe, ssicariniza onocco sse inarraro. Nezape passoza ssaua oneza onocco ssire tarraroderra −nade.

¹⁶ Nazapa parizeodeni mota attidenipa: —A, narrari madirrapa Deo icazosse-rraraui. Rrassinarracca uadaza: “Ozepe irri-rrerana” narraraui −quenade. Naraha mota attidenipa: —Canauatori canaderra bica taui. Madirra uimasiri carrimanarraridenipa nama quena-rraraui −quenade. Nama quenazapa Zeso tauimarirrine poccadeni uima carobemanarraride.

¹⁷ Nazapa nocco ssire nimaniuiza uati toquenapomade: —Tiape nerrecoma tani tinocco ssire tonanadezape? −quenade. Naraha nocco ssire nimaniui attipa: —Ouattipe Deo Atti cacomerabote, onarraro −nade.

¹⁸ Naraha zodeodenicca taminedenipa Zesorrine nocco ssire nimaniuiza: —Parrissa rrarauitiderra! Nazama nocco tobicauiraha −quenade. Nazapa nocco ssire nimaniui imehi imenidenitoui uaua quenade.

¹⁹ Uedarronazapa pouadeniza uati toquenade: —Arrarraripa ticcadeni erredenico? “Narraria nocco siri tossonaui” tiquenarrarottaqui? Naraha rridapanapa nocco ssire tarrarirana −quenade.

²⁰ Nazapa imehi imenidenipa uati toquenade: —Arrarraripa icca erredeni nocco siri tossonarraride nauatoto inani.

²¹ Naraha nerrecoma naza nocco ssire tarrari? Ssamomo inani. Poua nocco ssire tonanade naco ssamomo inani. Pouazara uati tiquenarri, pouapa erredeni rraraui. Pouana nauato taui −quenade imehi imeni attideni.

²² Arra imehi imenidenipa cappinemanarrarirrine: —Pouazara uati tiquenarri −quenarraride. Zodeodenicca taminedeni atti nauatoto taporra narrari. Arra madirra Zesoza: —Narraripa parrissa Cristo-Mesia −nazapa ettarrouitoui. —Icca Deo Atti mamariuarri qquezimapoma-rrarauiuarrine −quenaporra narrari.

²³ Narraria imehi imeni attidenipa: —Pouazara uati tiquenarri, pouapa erredeni rraraui −quenarrariparrade.

²⁴ Nazapa zodeodenicca taminedeni nocco ssire nimaniui pouaza uaua quenapomade. Ccarronazapa pouaza uati toquenade: —Deopa tetti mittaui. Parrissehera iaza uati tinarri. Iape nauatoqquiri inani: Narrari maqquiderrepa uimasiri rrinede −quenade.

²⁵ Naraha manaco uati tade: —Ouape ssamo onani. Uimasiri carriuitide, carri-rrarauitide. Arrirraro uimana nauato onani orrarini. Taidepe onocco siriraha rridapanepe qqui onani −nade.

²⁶ Naraha pouaza denima uati toquenapomade: —Tia nerrecoma tonanarrari? Nerrecozara tinocco tonanabicarrari? −quenade zodeodenicca taminedeni.

²⁷ Naraha uati tapomade: —Naza uati onaporaha ouatti timittemana-rrerarraro. Nerrecotoui uima uati uati onapomacca nanitoui tiquenarraro? Tiadeni naqui pocca tiquerrenaniuarrinerane? −nade.

²⁸ Nazapa zodeodenicca taminedeni uadieza nocco ssire nimaniui itamassomanaza uati toquenade: —Tiape narrari maqquiderrecca tirrana! Naraha iape Moizecca mamari tabaqqui iquerrenarronarraro.

²⁹ Iape Moizeza Deo uati taporraripa nauatoqquiri inani. Naraha narrari maqquiderrezapa nauatoqquiri inerrerani. Nerrecoma nauiccatta? −quenade zodeodenicca taminedeni.

³⁰ Naraha nocco ssire nimaniuipa uati tade: —A, ticcadeni uima rriza tani! Poua ccarronauiuarri ssamoqquiri tiqueneraha, pouapa onocco ssire tonanarrari.

³¹ Nauatoqquiri inani: Arra madirra uimasiri carrirrari attipa Deo mitta-rraraui. Naraha madirra Deoza damera tarrari, Deo nacassa tauicca inanezana poua atti Deo mittaui.

³² Maittaccazama zama nauatoponizama maqquiderre nocco siri tossonaui nocco ssire inanemanaui uima ihimittarrona nerrerarrarode.

³³ Rridacca narrari maqquiderre Deocca rrarazapa ssamo tanarra −nade nocco ssire nimaniui atti.

³⁴ Nazapa manaco uati toquenade: —Tiape uimasirima tissoneraha nerrecotoui iara ia mari ticanabaqquirraro? −quenazapa nocco ssire nimaniui moua iquenade: —Icca Deo Atti mamariuarri tiqquezimanipoma terrerarri! −quenade.

Zesoza parrissa quena-rrararraridenipa pina noccodeni sirissa quenarrari

³⁵ Zodeodeni poccadeni Deo Atti mamariza nocco ssire nimaniui qquezimanipoma-rrarauiuarrine moua iquenaui Zeso mittarraride. Nazapa poua tezerre bacco tocanirepomazapa pouaza uati tade: —Tiape Madirra Bediza parrissa taqui? −nade.

³⁶ Naraha nocco ssire nimaniui Zesoza uati tade: —Nerrecorrarina parra Madirra Bedi? nani pouaza parrissa onaniuarrine −nade.

³⁷ Naraha Zeso pouaza uati tade: —Neza oua qqui tinaua, ouape Madirra Bedi orrani. Ouaza uati uati tinarraro −nade.

³⁸ Nazapa nocco ssire nimaniui poua nocco ssire tonanade baccouarri poua pitoza uitta naza: —Rrehe oua Zozossede, tiaza parrissa onani −nade Zesoza uatizeza.

³⁹ Nazapa Zeso uati tade: —Ouape arrirraro zamaza occarronarraro madirra bazimacca uima cattemade. Naui noccodeni siripa noccodeni ssire onanabaqquiza qqui toquenauiuarrine. Naraha noccodeni bicaui qqui toquenarraridenipa noccodeni sirissa quenauiuarrine −nade Zeso. (Zeso atti nama narraripa pouaza parrissa quena-rrararraridenipa pina noccodeni sirissa quenarrari.)

⁴⁰ Naraha zodeodeni mota marinarra parizeoza rrehe quenarrari nauiza queriqquimanarrarideni Zeso atti mittemanarrari. Nazapa Zesoza uati toquenade: —Nanerre inocco sirirane? −quenade Zesoza.

⁴¹ Naraha manaco Zeso pouadeniza uati tade: —Rridacca tinoccodeni sirizape ticcadeni uimasiri noueranitouiraha “Iape inocco bicani” tiquenezape ticcadeni uimasiri tiadeniza rriquerreraccani −nade Zeso.