Huano 21 - Kulina New Testament Brazil

Zeso poua uatimadedeniza auatonipomarrari

¹ Zotode naco zama arobeni Carireacca coriza onini Tiberia inidiza Zesopa poua uatimadedeni iaza auatoni-pomarraride.

² Naniza iqueriqquirrarope Zeso poua uatimadedeni 7 inade. Simao-Pedoro, Tome (poua tessedeni pouaza: Papamade quequenanarrari), Natanaeo (zama Carireacca oza panani Canacca madirra), Zebedeo bedi oua, ocote Tiaco, denima Zeso poua uatimade ouaha pama nade.

³ Simao-Pedoropa: —Aba corode occana −nade. Naraha: —Ia naqui tiaza rrauirrana −inade. Nezape rrauirrezippeza darroni imeniza rrauirrezade. Nezape narraro zomeza aba coro inaraha nouerade.

⁴ Nezape ssiuarrarroneza Zeso ssiquiza uaui qqui inaraha ssamoqquiri inade.

⁵ Naraha Zeso iaza uaua nade: —Zabissodeni aba ticarrimanaco? −nade. Naraha: —Aba noueraui −inade.

⁶ Nazapa Zeso attia: —Nani tibirrideni nauatoniuarri tarrapa coro ticazippemanarri −nade. Nezape Zeso attissa inanemaneza tarrapa coro icazippezape aba irrirrari. Rroca icanimoraraha iparrire-rrerade.

⁷ Nezape ouape Zeso uatimade ouazana uati uana tarrari. Ouattia Pedoroza: —A, narraripa ia Zozossede! −onade pouaza. Nazapa Simao-Pedoropa pocca etero bodiccazara aba coro coro narizaraha ouatti mittazapa uassinarra pocca etero ueza, rroppa, corro naza ssiquiuarri cona tarraride.

⁸ Naraha Zeso uatimade mota iape darroniza rrauirrade. Tarrapa abama ori icanade. (Ssiquipe uarri terrerade, pina 100 metrossa narrarode.)

⁹ Nezape ssiquiza bacco ineza rrauirremorezape qqui inanarra pao aba naha zippo rradari taniza uazanarra nade.

¹⁰ Nazapa Zeso atti: —Aba rridapana coro naui mota teqquemoremanarro −nade.

¹¹ Nazapa Simao-Pedoro darroniza toqquezaniza tarrapa equidi, ssiquiuarri rroca icanimorade. Tarrapazapa aba pota tarrari 153 naha tocauarraride. Aba uapi taraha tarrapape tarroppi nerrerade.

¹² Nazapa Zeso poua uatimadedeni iaza uaua nade: —Nirra, tirripemanarri −nade. Naraha iape: —Nerreco madirra tirrani? −inanitouiraha uapima icappinaqquide. Naraha ibodizape: —Ia Zozossede −inade.

¹³ Nazapa Zeso ccarronarrari, pao idi naza iaza da inarizade. Aba naco da inarizade.

¹⁴ Zesopa uatiaraha nauatonirrari. Nauatoniui zotodepa poua uatimadedeni iaza auatonirrari. Zotode auatonipomarrari. Zotode arrirraro uimaza iaza auatonipomarrari, nade.

Zesopa Pedoro poua cacomerauiuarrine uati uati tarrari

¹⁵ Narraro ssiuarra izamassa irripehe rriqueza Zesopa Simao-Pedoroza uati tade: —Simao, Zouao bedi tirrani tiana tibodiza denima ouaza teti uana tarraroqui? Titessedenipa ouaza poccadeni touati uanehe arrimani torrarraro tarraroqui? −nade. Nazapa Pedoro: —Rrehe oua Zozossede, tiana nauato tinarraro tiaza nacassa onani −nade. Nazapa Zeso Pedoroza: —Nazama occa eueue bedi tititapabaqqui nana −nade.

¹⁶ Naraha denima uati tapomade: —Simao, Zouao bedi tirrani tiape ouaza teti uana tarraroqui? −napomade. Naraha Pedoro uati tapomade: —Rrehe oua Zozossede, tiana nauato tinarraro tiaza nacassa onani −nade. Nazapa Zeso attia: —Nazama occa eueue tecauabaqquina −nade.

¹⁷ Naraha Zesopa pouaza uati tapomade: —Simao, Zouao bedi tirrani tiape ouaza nacassa tinarraroqui? −napomade. Zesopa Pedoroza uati tarrari, uati nimanirrari, uati nimanipomarrari nazapa Pedoro pouaza tocasserani naza bodi qquezarrari. Nazapa poua cacomerade: —Oua Zozossede tiana nauato tinehe rricarraro. Nauato tinarraro tiaza nacassa onani −nade. Nazapa Zeso uati tade: —Occa eueue tititapabaqqui nana, onarraro. (Arra Zeso atti nama narraripa “Occa madirra mari mari titicanabaqqui nana” narrari.)

¹⁸ Ouape parrissehera tiaza uati onarraro: Zabisso tirrezape ticca etero oro tizimezape tia touini taniuarri titicca neraha rradaui ticarrezape tibirri da teza madirra ouahana ticca etero tia oro tozimauitoui. Nacassera tineraha nani motta tia iaqquemananitoui −nade Zeso.

¹⁹ Zeso uima uati tarraripa: —Pedoro arrama naza zoqqueuitoui −narrari. Pocca zoqquehe nema nezape uapimaza Deocca deni torrehe auato taniuarrine. Nazapa Zeso attia: —Ouaza damera tinarri! −nade Pedoroza.

Pedoropa Zeso poua uatimade pocca cacatizecca uimatoui uati tarrari

²⁰ Nazapa Pedoro poua nattiuarri qqui naninarra, Zeso uatimade oua pouadeni natti occamissarrarode. Ouazana Zeso uati uana tarrari. (Ouana errete Pascoacca zome taideccaza irripaqquiza Zeso uinoriza ouittariza pouaza uati onarrarode: —Nerrecorrarina tia ccaccorauiuarrine? −onade Zesoza.)

²¹ Nazapa Pedoro oua qqui tazapa Zesoza uati tade: —Oua Zozossede arrarraripa nerrecoma napazarra? −nade.

²² Naraha Zesopa: —Touini onezape Zouaopa arrirraro zamaza madi-zanapouiparra naza occanipomeza naco madiuiparra onanauitouiraha narrarope ticca cacauehe rrerani. Ouazara damera tinarri −nade Zeso Pedoroza.

²³ Nezape imecote bazimaza ponima uima torrarizarrarode. —Zeso uatimade Zouaopa uatia-rrarauitoui −nanarizemana narraride. Naraha Zeso attipa: —Zoqque-rrarana −narrararaha, Zeso poua attipa: —Rrehe, nacassa onezape Zouaopa occanipomeza madiuiparra nauitouiraha narrarope ticca cacauehe rrerani onarraroraha −narraride Zeso. Arra Zeso uati uati tarraripa oua Zouao occa uima.

—Zeso tauimari dozo onarrarope parrissa −narrari Zouao

²⁴ Arrirraro uima nemanehepe parrissa. Zeso uatimade oua qqui onarraro dozo onarraro. Nazama narrarope nauatoqquiri inarraro. Narrarope parrissa.

²⁵ Nazama arri Zeso inauatorizarraro naqui uapi teraha narraro motape dozo onerrerani. Obodiza ouattipe narraro touatti bazima dozo onehe rriquezape papeo zama uapima irririzanitouiraha. Peperri.