Huano 20 - Kulina New Testament Brazil

Zeso nauatonirrari

¹ Nezape semana torrapomanicca uada taidecca domico izamassa zizi tani parri neraha Maria Madarenauarriccape Zeso noccobiriuarri toccarrarode. Bacco tezape qqui tanerre tonoccobiripe touaberre narraro. Sibape parrimaraniuarrina uitterre narraro nade.

² Nezape Maria rroppa nanirraro, Simao-Pedoro oua inarrarodeniza bacco nanirrarode. Ouape Zeso poua uatimade. Ouazana denima uati uana tarrari. Maria attinipe arrima nanide: —Zeso noccobiri touabaparra! Poua assire idinemanaza zorro iquenarrarirana. Nerrecouarri ibemananarra? Ssamomo inani −nanide Maria Madarenauarricca attini.

—Parrissaqui? −quenaza Pedoro Zouao tezerre qquide zarra tarrari

³ Nezape Zeso uatimade oua Pedoro tezerre uima imittezape zarra inade, Zeso noccobiriuarri.

⁴ Ipamehe zarra ineraha Zeso uatimade ouana uassi onerre narraro. Zeso noccobiriuarri bacco onaporrarode. Naraha Pedoropa zotode bacco namissade.

⁵ Nazama Zeso uatimade ouape odiuarri ocattezimanerre Zeso rrorrore naqqui eteroa qqui oneraha oqquezima-rrerade.

⁶ Naraha zotodecca Simao-Pedoro bacco namissazana Zeso noccobiri bodiuarri toqquezimade. Poua naco qqui tanerre Zeso assire rrorrore naqqui eteroa pozerre nanira qqui tarraride.

⁷ Poua tati teteppepe parrimaranizana pazoninehe pozerre nani naqui qqui tarraride.

⁸ Zotode oua naqui oqquezimezana qqui onezana: —Parrissa Zesopa nauatonirrariua −onade.

⁹ Iape Deo Atti dozo naponicca ihimittapo neraha iaza pina ponimassa nade. Narraro uima dozo naporrarope: —Zoqqueraha, nauatoniuitoui −naporrarode.

¹⁰ Nezape icca ozauarri icadanide.

Zesopa Maria Madarenauarriccaza auatomarrari

¹¹ Maria Madarenauarriccape nani Zeso noccobiri uapiuarri iboza orri orri narraro. Orri orri nanerre odi bodiuarri tocattezima narraro.

¹² Nanarra Deocca zozosse tabaqqui memeuarricca eterorideni mopopo taha pamiza rrari nade. Zeso assire pozauirrineza pamizarrari nade. Ouahapa tatirrineuarri uittari, ouahapa amorirrineuarri uittari narrari.

¹³ Nazapa Deocca memeuarricca zozosse tabaqquipa Mariaza uati toquenarrari: —Nerrecotoui orri orri tarraro? −quenaui nade. Naraha Mariape poni cacomerarraro: —Oua Zozossede zorro ininemanarrari. Amossi naza orri orri onarraro. Nerrecouarrina ibemanaui? −nani nade.

¹⁴ Narraro uati tehe rrica, poni ideniuarri qqui tanarra Zeso ua canaui nade. Mariape Zeso qqui teraha nocconi rriza tarraro.

¹⁵ Naraha Zeso poniza uati tarrari: —Nerrecotoui orri orri tarraro? Nerrecorraritoui qqui qqui tarizarraro? −naui nade. Neraha Maria poni bodinipe: —Arrarraripa arrauarricca aua moue ppa taui cacauade uitide −nani nade. Nezape pouaza uati tarraro: —Tiana arra zoqquerrari assire zorro tininerrari uitide? Rrehe tezape nerrecouarri tinebonarra? Ouana toui oqqueza zorro onaniuiuarrine, onarraro −nani nade.

¹⁶ Naraha manaco Zesopa poniza uati tarrari: —Maria! −naui nade. Nanerre pouauarri qqui napomeza zodeodeni atti ebereoza uati tarraro: —Raboni! −nani nade. (Ettizape: oua Maride, narraro.)

¹⁷ Naraha Zeso attia poniza: —Oua mari tizana-rrerarri. Occa Abiuarri occamacossani-rreraccani. Pina ticcaniza ouatti ouimecotedeniza uati tinanina: “Zeso attipa: ‘Occa Abi Deouarri occamacossanina. Narraripa ticcadeni Abi Deo’ naparra” tinanina −naui nade Zeso.

¹⁸ Nezape Maria Madarenauarricca toccaniza poua uatimadedeniza bacco tanizape uati tarraro: —Ia Zozossede qqui onapa! −nanirraro. Pocca uima naqui uati nanide.

Zeso poua uatimadedenizaha auatoniporrari (Tome pouadeniza noueraccaza)

¹⁹ Zeso nauatoniuicca uada narraro zomeza poua uatimadedeni iape ozaza iqueriqquirrarode. Totoqquezima ecossarizade, zodeodenicca taminedeni noppine. Nezape rrassi inauarraniraha Zesopa naui nocconiza auatomaza iaza uati tade: —Nirra, ticappinemana-rrerarri. Deocca biquehera tiadeniza torrana –nade Zeso.

²⁰ Narraro uati taha rricazapa poua zepe capamehecca perecorrine noue, poua pparicca uauarrinarrine noue inade. Iape ia Zozossede parrissa qqui inezape etizede.

²¹ Nazapa Zeso uati tapomade: —Ticappinemana-rrerarri. Deocca biquehera tiadeniza torrana. Pina occa Abi oua zosse naronarrarissa narraro oua naqui tiadeni zosse onarizabaqquina −nade.

²² Nazapa Zeso iauarri rrappo naza uati tade: —Deo Corimera ticarrimanarri.

²³ Deo Corime ticarrimaneza madirracca uimasiriza: “Peperri, eti rrimani” tiquenezape rricani. Deo naco narraricca uimasiriza uati rramaui. Naraha madirracca uimasiriza: “Peperri, eti rrimani” tiquena-rrerezape pocca uimasiri rriquerrerani. Deo naco narraricca uimasiriza uati rrama-rrararrari −nade.

²⁴ Nazapa Zeso uatimadedeni ia 12 inarraro orrariapa Tome. Poua tessedenipa pouaza: Papamade quequenanarrari. Zeso auatonipozapa Tome iaza nouerazade.

²⁵ Naraha zotode Zeso uatimadedeni iape Tomeza uati inade: —Maitta ia Zozossede qqui inade −ineraha Tome attipa: —Poua zepecca qqui oneza ozepeza perecorrine odiniza bara onezana parrissa onanitoui. Pparicca toponi uauarrinarrineza naqui ozepeza oro onezana parrissa onanitoui −nade Tome.

Zeso auatonipomarrari (Tome qqui taza)

²⁶ Nezape uada 8 nani nattini Zeso uatimadedeni iqueriqquipomade. Nazapa Tome iazama carrimanade. Totoqquezima ecossarizeraha rrassi inauarranini nocconiza Zeso auatopomade. Nazapa iaza uati tapomade: —Nirra, tiadeniza Deocca rronehera torrarri −napomade Zeso.

²⁷ Nazapa Tomeza uati tade: —Tome, ozepecca opparicca qqui tarri. Tizepeza perecorrine, uauarrinarrine odiniza bara tarri −nade. —“Parrissa onerrerani” terrerarri. Pina rrehe tarri −nade Zeso.

²⁸ Nazapa Tome atti: —A, oua Zozossede, occa Deo! −nade.

²⁹ Naraha manaco Zeso Tomeza uati tade: —Oua qqui tineza parrissa tarraro. Madirra ouahapa oua qqui toquenarrararaha ouaza parrissa quenarrari. Narrarideni bodizana Deopa uatizeheri inanarizanitoui−nade Zeso.

Arrirraro papeo dozo onarrarope Zesoza: —Parrissa, Deo Bedi −tiquenaniuarrine

³⁰ Nazama arrirrarope Zeso uatimade ia imadirizeza Zeso canauato-uarrapoui canarizarraride —Parrissa, Deo Bedi −inaniuarrinede. Arra canauatori canarraricca uima motape uapi teraha arrirraro papeozape dozo onerrerani.

³¹ Nazama arrirraro orrine papeoza dozo narraroza naqui —Parrissa Zesopa Cristo-Mesia, Deo Bedi −tiquenaniuarrine, onarraro. Parrissa tiquenezape ticassiuaueraniuarrine, onarraro.