Huano 18 - Kulina New Testament Brazil

Zeso dama iquenaui

¹ Zeso Imehiza uati taha rricazapa Zeso poua uatimade iape poua tezerre birrini oni Sedro rrippeuarri rrauirrarrarode. Arra Zeso itezerre toqquezimauiuarripe ppa taui carri tade.

² Zoda Iscariotepa Zeso ccaccorade, poua naco nauiuarri nauato tarrari. Naniuarripe Zeso poua uatimade iape poua tezerre maitta ihiqueriqqui rade.

³ Nauiuarrina Zodapa rromanodenicca isso teppeppe, dada toqquimauarricca cacauadedeni tezerre eccarronabaqquirraride. Dada toqquimade taminedeni, marinarra onini parizeoza rrehe quenarrarideni tezerre zosse inarronabaqqui-manarrari. Bacco narronemanazapa zepedenima rrauirronade. Rrorrororo, uauacca, uauarrina, massito cauidiqquimera nani narronemanarraride.

⁴ Zesopa poua tozepe torrauiuarrine nauato taporaha pouatoui rrauirronarrarideniuarri toccaza uati tade: —Nerrecorraritoui rraui tirrarronarraro? −nade.

⁵ Naraha pouadeni cacomeremanade: —Zeso Nazaretiuarriccatoui rrauirrarronarraro −quenade. Naraha Zeso poua cacomerade: —Ouape arri −nade. Arra Zeso poua ccaccorade Zoda naco pouadenizama carrimanade

⁶ Zesopa —Ouape arri −naza pouadeni nattiuarri ttiri tanimananarra touedimama canarracanimade.

⁷ Naraha Zeso pouadeniza uati tapomade: —Nerrecorraritoui rraui tirrarronarraro? −napomade. Naraha pouadenipa: —Zeso Nazaretiuarriccatoui −quenade.

⁸ Naraha Zeso uati tapomade: —Naza uati onapopa: “Ouape arri” ohonanapa. Otoui tiquenezape arra ouatimadedenipa pouadeni rraui torranirizana, onarraro −nade.

⁹ Narrarope pina Zeso Imehiza uati tapoza: —Abi, arra ouaza tinanabaqquirraripa amossinarra canima-rrarana −naporrarissa inananiuarrine.

¹⁰ Naraha Simao-Pedoropa poua nacoricca massito cauidiqquimerani nani zoppa tanerre rreo, taminecca zozosse oni Maoco uaribo nauatoniuarricca ca tanerre tarro canade. Maocopa dada toqquimadedenicca tamine deni torrarraricca zozosse.

¹¹ Naraha Zesopa Pedoroza uati tade: —Ticca massito tinacoriza zo tizimanirri. Arrirraro uimape occa Abicca zossenirri ocasserani ouaniuarrine. Poua Attiza ibo onerrerani −nade Zeso.

¹² Nazapa isso teppeppe bazima poccadeni tamine tezerre, zodeodeni mota arra Deoza dada toqquimauarricca cacauadedeni quenaza Zeso dama iquenazapa birri rrore iquenade.

Tamine taidecca Anasauarri Zeso iaqquemanarrari

¹³ Nazapa dada toqquimadedenicca taminebote onipa Anasacca ozauarri iaqquemanade. Pouapa Caipacca coco. Caipapa narrari uarranoza dada toqquimadedenicca tamine deni torrarrari.

¹⁴ Caipana zodeodeniza uati taporraride: —Madirra orraria bazima manaconedeni zoqqueuina bica taui, ia icca zamacca bazima naco inarricarizemana-rreraniuarrine −naporraride Caipa atti.

Pedoro poua namaizapouicca uima

¹⁵ Ouape Zouao, Simao-Pedoro tezerre Zeso natti icadamissade. Dada toqquimadedenicca tamine deni torrarraricca boroniza Zeso iaqquezimemanarraride. Arra taminepa ouaza nocco rrizera tarrarirrine pocca boroniza oqquezimarrarode.

¹⁶ Naraha Pedoropa taminecca boroni uapiuarri siba ua nauarraninicca totoqquezimaza uade. Neraha oqqueneza narraro ozacca zozosse totoqquezima cacauade torrarraroza uati onezape Pedoro naco qquezimade.

¹⁷ Naraha Pedoro qquezimaza narraro ozacca zozosse zouato totoqquezima cacauade uarrarope pouaza uati tade: —Tiape arra dama iquenarrari uatimade tirra-rreraqui? −nade. Naraha Pedoro poua namaizaza: —Ouape narraricca orrarrerani −nade.

¹⁸ Nazapa zome tossirini neza tamine deni torrarraricca zozosse tabaqqui, Deoza dada toqquimauarricca cacauadedeni tezerre zippo inazemaneza rriua quenarraride. Pedoro naco naui bazima domo uauiuarri pouadenizama rriua narraride.

Dada toqquimadedenicca tamine deni torraporrari taidecca Zeso poua cacomerauiuarrine uati icanarrari

¹⁹ Naraha dada toqquimadedenicca taminebote Anasana Zesoza pocca mamari tabaqquicca uimatoui uati, pocca marinarratoui uati tarrari: —Ticca marinarra naqui nerrecoma narraro uimara mari mari titicanabaqqui narraritta? −nade tamine atti.

²⁰ Naraha Zeso uati tade: —Naza madirra bazima mittemanauiuarrine mari mari ohocanabaqquiriza nade. Zodeodeni quequeriqquimana nauiuarri arri icca Deo Atti mamariuarri, arri Deoza dada toqquimauarri mari mari ohocanabaqquiriza nade. Ouape cacomeheza uati uati ohonana-rrerade.

²¹ Nezape nerreco uimatoui ouaza uati tinarraro? Arra occa marinarra mittemanarraridenizara uati tinarri: “Zesocca marinarrape nerrecoma nerrecoma narrarotte?” tarri pouadeniza. Pouadenipa occa marinarra nauatoqquiri naui −nade Zeso.

²² Zeso atti nama nazapa poua uinoriuarri uarrari Deoza dada toqquimauarricca cacauadepa Zeso pano poua zepeza idanide. Nanarra Zesoza poua attipa: —Iape dada toqquimadedenicca tamine deni torrarrarizape nema inerrerarraro −nade.

²³ Naraha Zeso attia: —Rrehe, rridacca uati uati onarraro ouatti uaidira tezape bazima mittemanauiuarrine uati tinarri. Naraha rridacca uati onarraro uaidira terrerezape nerrecotoui opano tidanirraronerre? −nade Zeso atti.

²⁴ Nazapa tamine Anasa attipa: —Manaco Caipauarri toccana −nazapa Zeso birri rrore naui nama naha Caipauarri iaqquemanade. Caipapa dada toqquimadedenicca tamine deni torrarrari.

Pedoro poua namaizapomarraricca uima

²⁵ Zesopa oza bodiuarri nanarrizo torraraha Pedoropa boroniza zippo rriuade torrarrari. Nazapa naui zippo rriuade toquerrenarrarideni Pedoroza uati toquenarraride: —Tiape arrarrari maqquiderre uatimade tirra-rreraqui? −quenarraride. Naraha Pedoro poua namaizapomade: —Ouape narraricca orrarrerani −nade.

²⁶ Naraha zotode naco dada toqquimadedenicca tamine deni torrarraricca zozossepa Pedoroza uati tade. Narraripa Pedoro pouarrine touaribo ca tocarrizarraricca madirra. Narrari attia: —Tiape arra aua ppa tauiuarri dama iquenarrari tezerre tia qqui onarrerattaqui? −nade Pedoroza.

²⁷ Naraha Pedoro poua namaizapomazapa: —Oua rrerade −nanarra tacara uaua narraride.

Tamine Piratoza Zeso iaqquemanarrari

²⁸ Ssiuarraza izamassape Zeso Caipacca ozaza iaqquenemanazapa manaco tamine Piratocca ozauarri iaqquemanarraride. Tamine Piratopa rromanodeni. Pouapa zodeodenicca zama cacauade torrarrari. Naraha errete Pascoa bacco terre narraro Piratocca oza bodiuarri rraui torrezima-rrarade. Ia zodeodeni icca marinarrape: —Pascoacca rripaqquieza irripa-rreraqqueza zodeo querrena-rrararraridenicca ozauarri iqquezimaniuarrine oppina tani −ihinanarraro. Narraro noppineni cappinemanazapa Piratocca oza bodiuarri rraui torrezima-rrararraride.

²⁹ Narraria arra Pirato qquenaza pouadeniza uati tarrariparra: —Arrarrari maqquiderrepa nerreco uima carriza teccarronemanarrari? −nade.

³⁰ Manaco Piratoza uati toquenade: —Pouarrine uaidira terrerezape tiaza eccarrona-rrararaha −quenade.

³¹ Naraha Pirato attipa: —Ticcadeni uima cacattemauarrira tiaqquemanarro. Pocca uima uaidira tezape tiadenina tinarrizomanarro. Pina ticcadeni marinarrassa tinanemanarri −nade. Naraha zodeodenipa —Zeso zoqqueuitoui −quenaza Piratoza uati toquenapomade: —Ia zodeodenipe madirra inanazoqqueuiuarrinepe icca cacauanirri rrerani. Rromanodeni tiadenina ticcadeni cacauanirrina parri. Madirracca uima uaidira tezape tiadenina titinanazoqquemana narrari −quenade.

³² Nazama narrarope pina Zeso poua zoqqueuiuarrinecca uima poua uati uati taporrarissa nehe torrarrarode.

³³ Nazapa Pirato pocca ozauarri toqquezimani-pomade. Toqquezimanizapa Zeso ua izimaza uati tade: —Tiape zodeodenicca tamine tirraqui? −nade.

³⁴ Naraha Zeso Piratoza uati tade: —Narrarope tibodi uatoza ouaza tetti nema tarraroqui? Madirra uati toquenaui timittezarane? −nade.

³⁵ Naraha Pirato uati tade: —Ouape zodeo orraqui? Zodeo orrarrerani! Nerrecoma neza ticca madirracca marinarraza uima tinanarraro nauato onaniuarrine? Arra ticca zamacca madirra, dada toqquimade taminedeni tezerre ouaza tia eccarronemanarraro. Nerreco uima tinanezatte? −nade Pirato.

³⁶ Naraha Zeso poua cacomerade: —Occa cacauehepe arrirraro zamacca rrerani. Rridacca zodeodeni oua dama iquene-rreraniuarrine occa mamari tabaqqui zodeodeni tezerre cauadirenarra. Naraha arrirraro zamacca rrerani −nade.

³⁷ Naraha Pirato attia: —Tetti nema tezape tamine tirraqui? −nade. Naraha Zeso poua cacomerade: —Parrissa ouape tamine, arri uati tinarraroparri. Nazama ouape arrirraro zamaza ossonarrarope parrissehera uati uati ohonabaqqui nauiuarrine occarronarrarode. Bazima parrisseheza nacassaqquiri narraridenina ouatti mittemanarrari −nade Zeso.

^38a Naraha manaco Pirato poua cacomerade: —Nerrecoma narrarona parrissehe? −nade Zesoza.

Zeso tappa inauiuarrineraha Barrabana toui quenarrari

^38b Narraro uati taha rricazapa tamine Pirato qquenapomazapa zodeodeniza uati tapomade: —Rrehe, ouape arrarrari maqquiderrecca uima omittezape uaidira tanicca nouerani.

³⁹ Naraha arri ticcadeni errete Pascoa torrezape toponi cocoroza coro tozimarrarideni orraria qquenauiuarrine toui tiquenezape ouaza uati uati titiquena nade. Nerrecorrarina tappa onaza qquenauiuarrine toui tiquenarraro? Arra “zodeodenicca tamine” quequenanarraripa tappa onauiuarrineco? −nade Pirato.

⁴⁰ Naraha zodeodenipa rrouaua rrouaua canapomade: —Narraripa poua! Tappa tinarrararro! Parra coro tozimaporrari Barrabana tirrine qquenarro! −quenade Piratoza. Naraha Barraba pouapa toponi nanarrizoderaha.