Huano 14 - Kulina New Testament Brazil

Zesopa: —Rraui orrani. Orrinena madirra Abi Deoza bacco bacco toquenauiuarrine −narrari

¹ Naui zotodepa Zeso iaza denima uati uati tade: —Tibodideniza ticappinemana terrerarri. Deozara parrissa tiquenanissa tarri. Ouaza naqui parrissa tiquenanissa tarri.

² Occa Abicca ozauarri timadimananiuarrinepe mamadi carri tani. Rridacca timadimananiuarrine mamadi nouerezape tiadeniza uati onaponerre onade. Nazama ouape ticcadeni mamadi onanarroraniuarrine Abiuarri occaninitoui.

³ Abiuarri occaniza ticcadeni mamadi onanarrorezape titouideni occaronapomanitoui. Nezape oua ohomadi naniza tiadeni naqui timadimananiuarrine tiadeni ouaccani-baqquinitoui.

⁴ Tiadenipe arri occaniuarri orrauine nauatoqquiri tiquenani −nade Zeso.

⁵ Naraha Tome attia: —Ia Maride nerrecouarri ticcaniuarrine? Narraro uimape ssamoqquiri inani. Nerrecoma ineza narraro tirrauine nauatoqquiri inaniuarrine? −nade.

⁶ Naraha Zeso uati tade: —Ouape rraui orrani. Orrinena madirra Abiza bacco toquenauiuarrine. Ouape parrissehe rrinede orrani. Ouape camittehe rrinede orrani. Rridacca oua noue orrirezape madirrapa Abiza bacco toquena-rraranarra.

⁷ Ouaza tinoccodeni torrizerezape occa Abiza naqui tinoccodeni torrizeranitoui. Arri rridapana oua qqui tiquenarrarope Abiza tinoccodeni torrizerarronarraro −nade.

⁸ Naraha Piripi attipa: —Ia Maride, rrari, icca Abi ia qqui tinanabaqquirri. Narrari qqui inezape peperriua, denima inerrerani −nade.

⁹ Naraha Zeso Piripiza uati tade: —Piripi, oua tiadeniza maitta omadirronerade naraha ouaza tinocco torrizera-rreraccaqui? Arra madirra ouaza nocco torrizerarraripa occa Abiza naco nocco torrizerarrari, onarraroparriua. Naraha nerrecotouira ouaza: “Icca Abi ia qqui tinanabaqquirri” tarraro?

¹⁰ Ouape Abiza, Abipa ouaza, inarrarope Abi Deo Poua orrariui. Naraha narrarozape parrissa terreraqui? Arri ouatti uati uati ohonanarrarope orrine rrerani. Occa Abina ouaza madirrari. Pouana oua totocanauato narrari.

¹¹ Nazama ouattipe: “Ouape Abiza, Abipa ouaza” onarraroza parrissa tiquenarri. Naraha narraroza parrissa tiquenaniuarrine ssamo tezape arri occa nauatoue qqui tarronemanaporraroza: “Parrissa Zesopa Deo Bediua” tiquenarri −nade Zeso.

—Noue orrireza naqui tiadeniza uima bicani da da onanitoui −narrari Zeso

¹² —Ouape parrissehera tiadeniza uati onana: Ouaza: “Parrissa ia tonassiuauabaqquiuiuarrine” tiquenezape pina arri orrinessa tinanemananitoui. Occa Abi madiuiuarri occanini onattipe pina orrinessa tinanemaneraha denima bica tanicca tinanemananitoui.

¹³ Deoza uati tiqueneza oua onima uati uati titiquena nezape da da onanitoui. Nani Abi Deocca deni torrehe tiadeniza auato onananiuarrine.

¹⁴ Rrehe, ouaza uati uati tiquenezape ticcadeni uatinarrassa onananitoui −nade.

¹⁵ —Rrehe, ouaza tetideni uanaqquiri nezape occa zossenirrissa tinanemanana.

¹⁶ Nazama ouape Abiza uati onanitoui. Naui tiadeni Acco Canade ouaha zosse inaronauiuarrine. Narraripa Poua Corime Parrissehe Maride tiadeniza madiuiparra nauiuarrine.

¹⁷ Deoza rrehe quena-rrararrari arrirraro zamacca touini quenarraridenizapa Poua Corime Parrissehe Maride pouadeniza torra-rrarauitoui. Pouadenipa Deo Corime qqui toquena-rraraui. Pouaza ssamoqquiri naui. Naraha tiadenizapa rrizera taui. Narraripa tiadeniza madiui. Tiadeniza madi-zanapouitoui.

¹⁸ —Ouape tiadeni ouaquibo-baqquinitoui. Naraha tiadeniza omadipomaniuarrine occanipomanitoui.

¹⁹ Naraha niza denimape arrirraro zamacca madirrapa oua qqui tomanimana-rrarauitoui. Naraha tiadenipe oua qqui timanimananitoui. Ozoqqueraha onauatonizape omadinitoui. Nema onezape tiadeni naqui tinauatonimaneza timadimanapomanitoui.

²⁰ Rrehe, occanipomezape tibodideni uatome-mananitoui: Ouape occa Abiza. Tiadenipe ouaza. Oua naqui tiadeniza, onarraro.

²¹ Occa marinarra tiadeniza torreza nema tinanemanezape ticcadeni uima auato taniuarrine: Parrissa ouaza tetideni uanaqquiri nani. Ouaza tetideni uanaqquiri nezape occa Abi naco tiadeniza uati uana tauitoui. Oua naqui tiadeniza ouati uana tanitoui. Tiadeniza auato onanitoui −nade Zeso.

²² Nazapa Zoda (arrarraripa Zoda Iscariote rraraui) narrari uati tarrari: —Ia Maride nerrecotoui iazara auato tinaniuarrine naraha arrirraro zamacca madirrazapa auato tinerreraniuarrine? −nade.

²³ Naraha Zeso uati tade: —Madirra ouaza uatideni uanaqquiri nazapa ouatti ecauemananitoui. Nazapa Abi naco pouadeniza uati uana tauitoui. Occa Abi tezerre pouadeniza imadinitoui.

²⁴ Madirra ouaza uatideni uaneraqquiri nazapa ouatti ecauemane-rreranitoui. Arri uima timittemanarrarope ouatti rrerani, Abi Deo oua Cazossede Atti.

²⁵ —Arri tiadeniza omadizama uati uati onarraroparri.

²⁶ Naraha niza noue orrirezape Abi Deo tiadeni Acco Canade zosse inaronauitoui. Narraripa Deo Corime pina orrinessa inananitoui. Denima tiadeni mari tocanabaqquiuitoui. Arri uati uati onarrarocca naqui pouarrine tibodideni uatomanissa tanitoui −nade.

—Occanibote nani, dacoco tirrirarri −narrari Zeso

²⁷ —Nazama ouape occanibote nani. Tibodideni bicaqquiri naniuarrine tiadeniza occa rronehe da onarizani, pina arrirraro zamacca madirra pouadeni toui quenauiccassa nerrerarraro. Nazama occa danirri ticarrimanezape tibodideni uatoto canerrerarri. Occaninitoui onarraro noppineni naqui ticappinemana-rrerarri, onarraro.

²⁸ Ouape occanini, ocanarrorani-pomanitoui onanipe timittemanade. Occa Abi Pouana deni torrarrari. Parrissa ouaza tetideni uanaqquiri nezape occa Abiuarri occanina oneza tetizemananiuarrine bica teraha nema tiquenerrerarraro.

²⁹ —Rrehe, arri itezerremacca uima uati uati onarraro torra-rreraccazama tiadeniza uati onarraro. Niza narraro uima torrezape ouaza: “Parrissa uati tarrariua” tiquenanitoui.

³⁰ Naraha ouape occa uima denima tiadeniza uati ozanapo-rrerana. Arrirraro zamacca zozossede Tocorime-Taminepa bacco nabote naui. Naraha pocca dacorehepe ouaza deni torra-rrerani.

³¹ Nema nehe oua ouaccorezape ozoqquenitoui. Nema onarrarope madirra bazima nauatoqquiri nauiuarrine: Ouape occa Abiza ouati uana tarraro. Pouapa arrirraro uimatoui oua cazossezapa Poua Attiza ibora onarraro −nade Zeso. Maride rricazapa: —Rrina, rrauirrana −nade iaza.