Huano 11 - Kulina New Testament Brazil

Razaro uatiarrari

¹ Oza capamema narraro onini Betaniaza madirra coma taha madirrari onipa Razaro. Nanizape Maria poni onihi Marta tazarrani madimanarrarode.

² Narraro Maria Razaro caripenepe marrorroza Zeso amori capamehe ssohoho icanariza poni tatini conaniza amori sse sse ihippi narraro.

³ Nazapa Razaro coma taza caripenedeni Zesoza uima zosse inarronemanarrarode: —Parra pouaza teti uana tarraropa coma taui −quenade.

⁴ Narraro uima Zeso mittazapa uati tarrari: —Razaro coma tarraripa parra zoqqueriuiuarrine rraraui. Narrarope Deocca deni torrehe auato taniuarrine, Deo Bedicca deni torrehe naqui auato taniuarrine −nade.

⁵ Zesopa Martaza, Mariaza, Razaroza uati uana tarrari.

^6-7 Naraha Zeso —Razaro coma taui −mittazapa naui poua madiuiza narroccarrari. Uada pamehe tossoniqquimezana Zeso poua uatimadedeni iaza uati tade: —Rrina, Razaro qquide zodeodenicca zama Zodeauarri rrauirrapomana −nade.

⁸ Naraha pouaza uati inade: —Ia Maride, maittazama onihima naza nauiuarricca zodeodeni attidenipa: “Sibaza tia iquenaqquina” quenade. Naniuarri ticcanipomaniuarrinequi? Parri, tizoqquerana! −inade.

⁹ Naraha Zeso attipa: —Nouerani. Uada orrarie marri ssiuerrene 12 horas naha carrirrari. Marri ssiuerrene ssiuarra taza iccarizezape emori doi cane-rrerani, zama ssiuarra tarrarorrine.

¹⁰ Naraha zomepe zizi tani. Zome iccarizezape emori doi cana tani −nade.

¹¹ Nazapa denima uati tapomade: —Itesse Razaro uadaraha uaua oneza nocco torrauitoui −nade.

¹² Naraha Zesoza uati inade: —Ia Maride, Razaro uadazapa niza tonomiuitoui −inade.

¹³ Zesopa Razaro uatiauicca uimana uati taraha ssamoqquiri inezape: —Razaropa uadarrari −inarrarode.

¹⁴ Imittanissa terrerezape Zeso iaza uati nimanirraride: —Razaropa uadaui oneraha uada-rraraui, uatiarrari.

¹⁵ Naraha naniuarri omadi-rrereza uatiazapa peperri, bica tani. Ouatizerraro. Nani tiadeni qqui tiqueneza ouaza parrissa tiquenaniuarrine. Rrari, rridapanana naniuarri rrauirrana −nade.

¹⁶ Naraha Tome, poua tessedeni pouaza: Papamade quequenanarraria iaza uati tade: —Rrina, ia naqui nani rrauirrana, pouazama irrica nana −nade.

Zesopa nauatonie rrinede camittehe rrinede narrari

¹⁷ Nezape oza onini Betaniaza bacco inanipomade. Naniza bacco inanizape Zeso uima mittarraride: —Razaro ppa izemanauicca uadape 4 nani −quenade.

¹⁸ Betaniape oza panani Zerozareza uarrira tarraro, izamassa babacco.

¹⁹ Nema narraro zodeodenipa Maria Martadenicca ozauarri rrarraui torra narrari, uatinideni inassonabaqquimananiuarrine.

²⁰ Marta —Zeso ccarronaui −quenaui uima mittezape qqueneza iaccaniuiuarrine ccarronarraro. Naraha Mariape nani oza bodiza iborraro.

²¹ Marta Zeso bacco inazapa pouaza uati tade: —Oua Maride, rridacca arriza timadizape ouimecote zoqque-rraranarra.

²² Naraha nema nehe Deoza uati tinezape ticca uatinarrassa inananitoui nauato onani −nade Marta Zesoza.

²³ Naraha Zeso attipa: —Timecote nauatoniuitoui −nade.

²⁴ Naraha Marta uati tade: —Rrehe, niza zama rriqueza rricaporrarideni bazima assiredenima Deo inauatonibaqquiuitoui. Nauiza Razaro naco nauatoniuitoui. Narraro uimape nauato onaponi −nade Marta.

²⁵ Naraha manaco Zeso Martaza uati tade: —Ouape nauatonie rrinede orrani. Ouape camittehe rrinede orrani. Ouaza rrehe quenazapa rricaraha orrine camittemanimana-pomauitoui −nade.

²⁶ —Ouaza rrehe quenarraridenipa parra rricariui narrarauitoui. Rricaraha nauatonimanazapa madimana-zanapouitoui. Narraro uimaza parrissa taqui? −nade Zeso Martaza.

²⁷ Nezape Zesoza uati tade: —Rrehe oua Zozossede, nauato onani tiaza. Tiape Cristo-Mesia, Deo Bedi tirrani, arri namiuarri ticcarronanitoui quequenanapode −nade Marta.

Razaro noccobiriuarri Zeso orrirrari

²⁸ Nezape Marta Mariatoui ozauarri toqquezimanizape auatoraniza Mariaza uati tarraro: —Ia Maride bacco narronaui titoui uaua naparra −nani nade.

²⁹ Maria uima mittezape totema, qqueneza Zeso qquide ccarronarraro.

³⁰ Zesopa ponidenicca ozauarri bacco tarraraccaui. Naui Marta poni bacco inauiza madiccade.

³¹ Zodeodeni Maria poni uatini inassonemananiuarrine ponicca ozaza queriqquimanarraridenipa toccani qqui toquenazapa nattini rrauirronarraride, —Razaro cauauiuarri orride toccarraro nitide −quenaza.

³² Naraha Maria Zeso uauiuarri bacco nezape poni pitoniza uitta neza pouaza uati tade: —Ia Zozossede, rridacca arriza timadizape ouimecote zoqque-rraranarra −nade.

³³ Nazapa Zeso Maria orri orri nani qqui, zodeodeni poniza rrauirronarrarideni orri quenaui qqui tazapa bodi qquezarraride.

³⁴ Nazapa Zeso pouadeniza uati tade: —Nerrecouarri tequibezemanatta? −nade. Nazapa: —Rrina, qqui tarro −quenade.

³⁵ Nazapa Zeso orride.

³⁶ Nazapa zodeodeni: —A, parrissa Razaroza uati uana tarrariraha −quenade.

³⁷ Naraha zodeodeni motapa uimahaha canade: —Zesorrinepa nocco rrirrirade nocco ssire nimanide. Rridacca Zeso arraza madizapa Razaro zoqque-rraranarra −quenade.

Razaro nauatonirrari

³⁸ Naraha Zeso bodi qquezapomazapa Razaro noccobiriuarri toqquessirrari. Poua noccobiripe ssono bacconiza touarrarode. Noccobirizape siba uacossarraro.

³⁹ Naraha Zeso: —Siba cco tirrizemanarri, touabaniuarrine −nade. Naraha arra zoqquerraricca asi Marta attinipe: —A, ia Zozossede, poua zoqqueuicca uada 4 narraro. Battaui −nade.

⁴⁰ Naraha Zeso attipa: —Tiaza uati uati onapode. Timitte-rrerarrarotterane? Parrissa tezape Deocca deni torrehe qqui tinanitoui, ohonanade −nade Zeso.

⁴¹ Nezape siba cco irrizemanade. Nazapa Zeso memeuarri tocattamacossa naza uati tade: —Abi, ouatti timittezape peperri bica tani, onarraro.

⁴² Uarrirriraza ouatti titimitta nani nauato oneraha arraza madirra madimanarrarideni ouaza: “Parrissa Deocca zosse naronanirri” quenauiuarrine tiaza nema onarraro −nade.

⁴³ Nazapa Deoza uati taha rricazapa rrazirema uaua nade: —Razaro tiqquenarri! −nade.

⁴⁴ Nanarra Razaro uatiaraha Zesorrine camittemaniza qquenade. Assire eteroza rrore tamaroua nama naha qquenade. Pano naco eteroza teppe nade. Nazapa Zeso: —Dicca tiquenarro, toccaniuiuarrine! −naza nama inanemanade.

Zeso tozepe torrauiuarrine uima narroremanarrari

⁴⁵ Nazapa zodeodeni Mariaza queriqquimanarrari motapa Zesorrine Razaro camittemaniui qqui toquenaza Zesoza parrissa quenade.

⁴⁶ Naraha motadeni Zesoza nacasseraqquiri narraridenina marinarra parizeoza rrehe quenarrarideniuarri rraui torrarrari. Zesorrine Razaro camittemaniuicca uima pouadeniza uati toquenarrari.

⁴⁷ Nanarra parizeodeni, dada toqquimade taminedenipa narraro uima mittemanazapa poccadeni uima cacattemadedeni deni toquerrenarrarideniza uaua quenarrari, pouadeniza queriqquimanauiuarrine. Queriqquimanazapa pouadeniza uati toquenarrari: —Iape nerrecoma inapazerre? Zeso canauatoriri canaui. Pocca deni torrehe auato tani −quenaui nade.

⁴⁸ —Naraha Zeso nama zanapouiuarrine inebozapa bazima pouaza parrissa zanapomanauitoui. Nema nezape icca dada toqquimauarripe rromanodeni botta icanemananitoui. Icca zamacca icca cacauehe inarriquemananitoui −quenaui nade.

⁴⁹ Naraha uima cacattemadedeni orraria onipa Caipa, narrarina narrari uarranoza dada toqquimadedenicca tamine deni torrarrari madirrari. Pouapa bazimaza uati tarrari: —Tiadenipe ssamoqquiri tiquenani!

⁵⁰ Tibodideniza arrirraro uima auato terrerani: Madirra orraria bazima manaconedeni zoqqueuina bica taui, ia icca zamacca bazima naco inarriquemane-rreraniuarrine −naui nade Caipa.

⁵¹ Naraha narraro uimape Caipa poua mottacca rrerani. Pouapa dada toqquimadedenicca tamine deni torrarrarirrine Deo Corime pouaza uati tarrari. Caipa poua attizape Zeso tauimari iaza auato tarraro. Narraroa arri Zesopa pocca madirra zodeodeni bazima tocassiuauerauiuarrinepa zoqqueuitoui.

⁵² Naraha Zesopa zodeodeni pouadeni motta manaconedeni torrauiuarrine rraraui. Bazima Deocca madirra madirizemanarrarideni manaconedeni naco torrauiuarrine. Nezape Deocca erredeni madirizemanarrarideni irrariqquinissa taniuarrine.

⁵³ Nezape narraro uadaza, arra Caipa atti: —Rrehe zoqqueui bica taui −naza uima cacattemadedeni bazima Zeso zoqqueuiuarrinecca uima idimemanapomezape uima narroraniuarrine uimahaha uimahaha cazanaporrari.

⁵⁴ Zeso uima nema nani mittazapa zodeodeni madimanauiuarri auatoniza ccarizade nacassera tarrari. Nazapa Zodeauarri nebo, oza onini Epraim uarri madiuiuarrine toccarraride. Epraimpe zama uamoni ssono carri, siba carri tani uarrira taniza anirrarode. Nanizana ia poua uatimadedeni Zeso tezerre imadirrarode.

⁵⁵ Naniza imadizana zodeodenicca errete imenibote onini Pascoa touarrirarrarode. (Pascoa ettizape: Deo tossoniqquimarrari, inarraro.) Naui Zerozareza madirra zama onihicca, zama onihicca rrauirronana canarrari. Deoza da iquenauiuarrine queriqquini-pomarrari, errete Pascoatoui narroremanapouiuarrine.

⁵⁶ Madirra —Zeso qqui inana −quenazapa Zesotoui qqui narizemanarrari. Deoza dada toqquimaza naco pouadenira uati tocanirere canarrari: —Erreteza Zesopa ccarrona-rrarapazarra? −quenaui nade.

⁵⁷ Naraha parizeodenipa dada toqquimade taminedeni tezerre attideni narroremanaporra narrari: —Zeso qqui tiquenazapa iaza uati tiquenana, naui dama inauiuarrine −quenarrari nade.