Huano 10 - Kulina New Testament Brazil

Eueue cacauadecca uima

¹ Nazapa Zeso uati tapomade: —Parrissehera tiadeniza uati onarraro: Madirrapa arra eueue tazaricca totoqquezimaza toqquezima-rraraza totoqquezima noueraniuarrina rroppa tozimarraripa bobotide.

² Naraha arra madirra eueue tazaricca totoqquezima toqquezimarraripa eueue cacauade parra.

³ Eueue cacauade eueue tazariuarri bacco tazapa pocca zozosse noccobirri icataborriza tani. Eueuepa cacauade atti mittemana taui. Pocca eueue onideniza uaua nazapa iaqquenabaqqui taui.

⁴ Naza pouarrine eueue rrauinineza cacauadepa taide torra taui. Eueuepa pouadeni cacauade atti nauatoqquiri nazapa poua natti rraui torra taui.

⁵ Naraha madirra ouaha nattipa rraui torrera taui. Atti rriza taza, pouadeni cacauade attissa narrarazapa domo tocca taui −nade Zeso.

⁶ Zeso eueue tauimari uati tarraripa pocca madirra tauimari uati, poua tauimari uati taraha nauiza madirra domo uarrari mittemanaraha pouadeniza ssamo tarraro.

Zesopa eueue cacauade bicaui

⁷ Nazapa Zeso madirra mittemanauiuarrine uati tapomade: —Parrissehera tiadeniza uati onana: Ouape eueue tazariuarricca totoqquezima orrani. Narraro totoqquezimazape eueue rrarraui torrezima narrari.

⁸ Oua occarrona-rreraqquezape bobotidedenina rrauirronaporrari. Naraha eueuepa bobotidedeniza uaribodeni didiqquiri narrari −nade Zeso.

⁹ —Ouape pina totoqquezima orrani. Madirra ouaza rrarrauizima narraripa tossiuauehe carrimanauitoui. Pouadenipa pina occa eueuessa quenarrari. Zomepa eueue pouadeni tazariza rrarraui torrezimani naza cacauadepa nauiza ehecauabaqqui narrari. Ssiuarrapa cacauade eheqquenabaqqui narrari, mina bicani rripemanauiuarrine. Ouape occa madirra ouacauabaqquiuissa tarrari −nade Zeso.

¹⁰ —Arra bobotidepa botiuiuarrine, toponi nanazoqqueuiuarrine, toponi tonauaidirauiuarrinera ccarrona taui. Naraha ouape toponi tonassiuauadera occarronarraro, madirra bodideniza madie bicanicca carrimanauissa tauiuarrine.

¹¹ Ouape eueue cacauade bicabote. Eueue cacauade bicabote pocca eueueza tossiuauehe da ina tani. Pocca eueue tocassiuauerauiuarrinepa pouana poua ccaccora taui.

¹² Naraha madirra ouahapa manaconitouira eueue ecauabaqquiza zomarri ccarronaui qqui tazapa eueue inebobaqqui… rroppa taui carri taui. Pouapa eueue rrinede rrararrari. Nazapa eueue inebobaqquizapa zomarri eueueza ssonarizapa motapa torraribaqqui taui.

¹³ Arra eueue cacauade manaconitouira tarabaia narraripa eueueza uati uana tarrararrarirrine inebobaqqui taui −nade.

^14-15 —Naraha ouape eueue cacauade bicabote orrani. Nema onarrarope madirra ouaza toquerrenarraripa ouacauabaqquirrari. Occa Abipa ouaza nocco rrizera taui. Oua naqui occa Abi Pouaza onocco rrizera tani. Narrarossa narraro ouape occa eueueza onocco rrizera tarraro. Manaco occa eueue ouaza noccodeni rrizeraqquiri narrari. Nazama ouape occa eueue tocassiuauerauiuarrinepa ouana oua ouaccoraniuarrine.

¹⁶ Eueue ouahadeni naco uapi taha ocarrini. Arra tazaricca rraraui. Narrarideni naco ouaccani-baqquiuiuarrine. Pouadenipa ouattiza iboraqquiri naui. Nazapa cacauade orrariazana queriqquiuiuarrine. Nazapa orrariqquimanauitoui −nade Zeso. (Poua atti nama narraripa madirra zodeo querrena-rrararrarideni naco pouaza toquerrenauiuarrine.)

Zeso poua zoqqueuicca uima

¹⁷ —Oua ouaccoreza ozoqqueraha occa camittehe ouaza torrapomanitoui. Narraro uima onananiuarrine ibora onezape occa Abipa ouaza uati uana tarrari −nade.

¹⁸ —Arri ozoqquerraro naqui madirra ouaharrine rrerani. Ouana oua ouaccoreza oua inanazoqque-mananitoui. Occa camittehe ouaccoraniuarrine oparrireni. Occa camitteheza bacco onanipomaniuarrine naqui oparrireni. Arrirraro zossenirripe occa Abirrine −nade Zeso.

Uima inapamemanarraro

¹⁹ Nazapa zodeodeni narraro uima mittemanazapa Zeso tauimarirrine torraribaqquimanarrari.

²⁰ Nazapa mota bazima uimahaha canade: —Nerrecotoui pocca uima imittaniuarrine? Tocorime-Taminecca zozosse tocorime siri carrirrari. Poua bodi tossamorrariua −quenade.

²¹ Naraha madirra motapa: —Madirra tocorime siri carrizapa atti nama narraraui. Tocorime siripa madirra nocco siri nocco ssire inana taco? −quenade.

Zodeodenipa Zesoza uattarroqquiri narrari

²² Zazarrade bacco tezape Zesopa oza panani Zerozareza madirrari. Nauiza madizapa zodeodenicca dada toqquima Deocca tocarranipomarrarocca errete bacco tade.

²³ Nazapa Zeso Deoza dada toqquimacca boroni inidi tetepini carrini onini Portico de Saromaoza ccarizarrari.

²⁴ Nauizana zodeodenipa Zeso icauauarranimanaza uati icanaqquimanarraride: —Nerrecoma teza ticca uima nauatoqquiri inaniuarrine? Tiape Cristo-Mesia tirrezape iaza tia tecomeranissa tarri, inarraro −quenade.

²⁵ Naraha Zeso uati tade: —Neza uati uati ohonanaua. Naraha tiadenipe rrehe tiquenerrerani. Arri ohonauato narrarope occa Abicca deni torreheza ohonauato narraro. Arri occa nauatonirri qqui tiquenezape narrarorrinea arri occa uima nauatoqquiri tiquenarraroparri.

²⁶ Naraha tiadenipe parrissa tiquenerrerani. Occa eueue tiquerrena-rrerarraro.

²⁷ Occa eueuepa ouatti nauatoqquiri naui. Manaco oua naqui pouadeniza onocco rrizera tani. Pouadenipa ouaza rrauirizarrari.

²⁸ Ouape pouadeniza camittehe rriquerreranicca da onarizarraro. Pouadenipa parra zoqquemanari-rrarauitoui. Pouadenipa ouacauabaqquiuissa tarrari. Ozepeccapa idinibaqquimana-rrarauitoui.

²⁹ Arra ouaza toquerrenarraridenipa occa Abina ouaza inanarizarrari. Occa Abina deni torrarrari. Naraha bazima motadenipa arramani toquerrenaui. Abi poua zepeza toquerrenazapa idinibaqquimana-rrarauitoui.

³⁰ Oua occa Abi tezerrepe pina irrariqquirrarossa narraro −nade Zeso.

³¹ Nazapa zodeodeni siba nacca-cca quenapomade Zeso iquenaqqui-manauiuarrine.

³² Naraha Zesopa pouadeniza uati tade: —Occa Abicca dacorehema madirraza uima bicanira onanarizarraro qqui tiquenarraroua. Naraha nerrecoma narraro occa nauatonirri acconi oua tiquenaqquimananiuarrine? −nade Zeso.

³³ Naraha zodeodeni uati toquenade: —Ticca nauatonirri bicani acconipe tiaza iboquerrerani. Naraha Deoza tettipe oppina tarrarorrinena “Tia iquenaqquina” inarraro. Tiape madirra tirreraha “Deo orrani” taterre neza −quenade zodeodeni.

³⁴ Naraha Zeso pouadeniza uati tapomade: —Maittaccazama Deopa madirra uima cacattemade toquerrenarrarideniza uati tarrari. Poua Atti pouadeniza: “Tiadenipe deodeni tiquerrenarraro, ohonanade” naui nade Deo Poua Atti dozo naniccaza.

³⁵ Arri Deo Atti dozo naniccaza nauatoqquiri inani. Narraroza: “Maizehe” inaniuarrine oppina tani. Deopa pocca zossenirri carrimanarrarideniza uati tarrari. Pouadeniza: “Tiadenipe deodeni” naui nade Deo.

³⁶ Naraha Deopa oua tocatterrizaza arrirraro namiza oua zosse naronarrari. “Ouape Deo Bedi orrani” onarraroraha nerrecotoui ouaza: “Tettipe oppina tani Deoza” tiquenarraro?

³⁷ Occa nauatoue pina occa Abirrinessa nerrerezape ouaza parrissa tiquenerrerarri.

³⁸ Naraha occa nauatoue pina occa Abirrinessa nezape narrarozana parrissa tiquenarri. Ouattiza parrissa tiquenerrereraha niza tibodideni uatonissa tezape occa uima auato tanitoui. Abipa ouaza, ouape Abiza, iape pina irrariqquirrarossa inarraro −nade Zeso.

³⁹ Nazapa Zeso dama iquenapomauitouiraha toqquenaza zori tarraride.

Zeso toccanirrari ueni Zorodaouarri

⁴⁰ Nazapa Zeso ueni Zorodao rrippeuarri toccanipomarrari. Nauiza Zouao madirra passo dopaniza niqui niqui ihizanabaqquipo nauiza iborraride.

⁴¹ Nauiza madizapa madirra uapi taha Zeso qquide rraui torrarrari. Nauizana Zouao Batista tauimari bodideni uatome-manaza uimahaha canarraride: —Rrehe, parrissa. Zouaopa canauatori cana-rrararaha pocca uatinarrape Zeso tauimari uati tapouissa naderra −quenade.

⁴² Nazapa nauiza Zeso pouaza madirra uapi taha parrissa quenarraride.