Epesodeniza 6 - Kulina New Testament Brazil

Imehideni bedideni tezerre madimanauissa tauiuarrinecca uima

¹ Erredenideni, tiadenipe ia Zozossede Deo touini nauiccara tinanemanani bica taniuarrinepe ticcadeni abi, ami attideniza iboraqquiri tiquenarri. Narrarona uima parrirenissa tarraro.

² Deo Atti dozo naniza arrima narraro: —Ticcadeni abi, amideniza tetideni uanaqquiri narri −naui nade Deo Atti. Narraro zossenirripe Deo pocca zossenirri 10 nehe Moizeza da inarraroza anirraro. Narraro zossenirri orrarie da inezape uima bicani tazarrani uati taporrari. Nezape narraro zossenirri ecauezape uima bicani iaza torranitoui.

³ Narraroa arri Poua Atti: —Tiadeni onamadibaqquinissa zanaponiuarrine. Arrirraro namiza timadimanezape rradaui tiquerrenanissa tanitoui −naui nade Deo Atti.

⁴ Rrehe, imehideni tiadeni naqui ticcadeni erredeni tirrinedeni boquemanarrarana. Madie bicani tocauatterauiuarrine tedimane-rreraza tinauattabaqquimanarro. Ticcadeni erredeni Deo Poua touini nauicca tocauatterauiuarrinera mari mari titicanabaqquimana nana.

Madirracca zozosse tabaqquidenipa pouadeni zossede tezerre madimanauissa tauiuarrinecca uima

⁵ Nezape madirracca zozosse tiquerrenarraro, tiadeni naqui arrirraro namicca tiadeni zossede attiza iboraqquiri tiquenarri. Poua noppine ticappinemaneza pouaza bicaqquiri tiquenarri. Maizeraqquiri tiqueneza tizepedeni irrimananissa tarri. Pina Zeso Cristoza tizepedeni irrimanarrarossa tiquenana.

⁶ Tiadeni zossede qqui tarraraza naco tizepedeni irrimananissa tana. Pina tiadeni qqui tazassa tiquenarri. Pina Zeso Cristocca zozossessa tiquenana, Deo touini nauicca titinanemana naniuarrine. Tiadeni zossede attiza naqui iboraqquiri tiquenana. Tibodideni bicaqquiri neza: —Rrehe, oua zossede attiza ibora onana −tiquenana.

⁷ Nezape uatizehema tibodideni bicaqquiri neza tizepedeni irrimanana. Nema tiquenezape tiadeni zossede madirraraha pouaza tizepedeni irrimanezape pina ia Zozossede Deoza tizepedeni irrimanarrarossa tiquenarraro.

⁸ Arrirraro uima nauatoqquiri tiquenarraro: Niza ia Zozossede Zeso Cristo ccanizapa uima bicani tinanemanarraro manaconi tiadeni bazimaza da inabaqquinitoui. Nama nauitoui zozosse tiquerrenarrarodeniza, zozosse tiquerrena-rrerarrarodeniza naqui.

⁹ Nazama zozossededeni. Tiadeni naqui ticcadeni zozosse tabaqquiza bicaqquiri tiquenarri. Pina Zeso Cristoza bicaqquiri tiquenarrarossa tiquenarri. Ticamaizabaqquimana tarrararro. Rrara tinabaqquimana tarrararro. Tibodideni uatome-manarri: ticcadeni zozosse tabaqqui pouadeni Zozossede Deopa tiadeni Zozossede Zeso Cristo orrariui. Pouapa tiadeni Cacauade memeuarri madirrari. Poua attipa: —Arrarraridenipa zozossededeni toquerrenarrari, arrarraridenipa zozosse toquerrenarrari −narrararrari. Qqui inabaqquizapa bazima narrarissa canirerrari.

Deocca dacorehe icarrizape uimasiri iaza deni torra-rreraniuarrine

¹⁰ Ouimecotedeni, rridapanape occa marinarra rricanicca tiadeniza dozo onarraro. Ia Zozossede Deopa dacorarrari. Pocca dacorehepe deni torranicca. Narraro pocca dacorehema dacoco tirrirarri.

¹¹ Pina isso teppeppessa tiquenarri. Isso teppeppepa biqueraui noppine poua cacauauiuarrine rrazirecca oro tozimarrari. Tiadeni tecauemananiuarrinepe Deocca dacorehe ticarrimanarri. Nema tiquenezape Tocorime-Taminecca maizeheza tiedimemana-rreranitoui. Dacoraqquiri tiqueneza tidomodeni uanitoui.

¹² Uimasiri deni torrarreraniuarrinepe rrazire inanarrarossa narraro. Naraha icauadireniuarrinepe madirra assire carrimana, tone carrimana narrarideni tezerre rrerani. Pouadeni assire cappiremanarrari qqui inabaqqui- rrararrarideni tezerrena icauadirerraro. Narraridenipa uaidirehe rrinede Tocorime-Taminecca zozosse tabaqqui memeuarri rrauirizarrari. Memeuarri madimanaraha arrirraro namiza dacorehe carrimanarrari. Pouadenipa ziziniza madimanarrarideni ihicazosse-baqquimana narrari, uaidirehe inanemananiuarrine.

¹³ Nazama Tocorime-Taminecca zozosse tabaqquiza rrazire tinanemananiuarrinepe Deocca dacorehe nemanehe ticarrimanana. Nazana uaidirehe auatoza tiedimemana-rreranitoui. Uimasiri tazarrani ticauadirezape dacoco tirrireza tidomodeni uanitoui.

¹⁴ Nazama tiadenipe dacoraqquiri tiquenarri. Pina isso teppeppessa tiquenarri. Isso teppeppepa etero rrazireuarrinecca oro tozimarrari. Naraha tiadenipe Deocca parrissehe, pocca biquehe oro tizimemanarri. Narraro uima pamehe ticarrimanezape uimasiri tazarrani ticauadireza tidomo uanissa tanitoui.

¹⁵ Zesorrine Deo tezerre icarronerarrarocca uima bicani maride dameraqquiri tiquenarri. Narraro uima tecomerarizemananiuarrine tinarroremanehe timadimanarri.

¹⁶ Uimasiri tazarrani ticauadireniuarrinepe ticcadeni rrehenirri dacorarraro pina isso teppeppecca razirecca etero narraro. (Isso teppeppepa bobaza biqueraui noppine ssapa, ccara tarrari poua tezerrema da inarrari). Tiadeni naqui rrehe tiquenanissa tezape uaidirehe rrinedecca boba rrororone carriuiccaza tibiqueremana-rreranitoui. Pocca maizehe iaza ssonarirrarope pina ia ssite narrarissa narrari.

¹⁷ Zeso tauimari icassiuaueraniuarrinecca ia touacauabaqquirrarope pina isso teppeppe poua tati cacauauiuarrine ccara tarrari ettarirrarissa narraro. Uaidirehe tazarrani ticauadireniuarrine naqui Deo Poua Corime Bicabote tibodideniza Poua Atti inanarraro. Narrarope pina rrazirecca massito cauidireqquimarrarossa narraro.

¹⁸ Uarrirriraza Deoza uati uati titiquena narri. Pouaza uatide tinebomana terrerarri. Deo Corime tibodideni acco tocanabaqquiuitoui. Tetideni uatoza tinoccodeni panehe timadimanarri. Pina isso teppeppe pocca uauadidedeni noppinedeni nocco panarrarissa tiquenana. Tiadeniza uima bica teza, ocassera teza naqui Deoza uatide dameraqquiri tiquenarri. Deoza toquerrenarrarideni bazimatoui Deoza uati uati titiquena narri.

¹⁹ Otoui naqui Deoza uati uati titiquena narri. Nani ocappine-rrereza Zeso Cristo tauimari icassiuaueraniuarrinecca maride orreza touatti parrirenissa taniccaza madirra mari ocanabaqqui-rizauiuarrine. Narraro uima bicanipe taide Deorrine auatora taporaha rridapana Pouarrine touatorraro.

²⁰ Narraro poua tauimari mari onarizaniuarrine oua Zozossede Deopa oua cazosserraride. Narrarorrine rridapanape tozepe orrarraro. Deo Pouaza uati uati tiquenarri, cappinehe ouaza nouerezape pocca zossehe onaparrirenissa taniuarrine.

Paorocca uima rricanicca

²¹ Tiquicopa imecote bicabote. Pouapa arri omadinicca, nomi onanicca, ozepe irriecca bazima tiadeniza uati tauitoui. Pouapa ia Zozossede Zeso Cristoza ibora taza poua tauimari maride damera tarrari.

²² Pouapa itauimari tiadeniza uati tauiuarrine tiadeniuarri zosse onarrari. Poua naco tiadeni tonauatizebaqquiza tibodideni acco tocanabaqquiuitoui.

²³ Icca Abi Deo, ia Zozossede Zeso Cristo tezerre arri tirrariqquimanarraro tiadeniza rronehe inanemanana. Bazimaza uatideni cauanariri cazanapona, onarraro. Pouadeniza rrehe tizanapomananiuarrine naqui tibodideni inadacorabaqquimanana, onarraro.

²⁴ Ia Zozossede Zeso Cristoza tetideni cauanariri canani dacoreza tiadeniza pocca biquehe torrazanapona, onarraro. Peperri occa uima. Oua onipe Paoro.