Ebreodenidsa 5 - Kulina New Testament Brazil

Deopa taide madirrazara uaua uaua nanarrona narrari, Pouaza dada toqquimade deni torrauicca toquerrenauiuarrine

¹ Maittaccazama Izarraeo potemauidenicca Deoza dada toqquimade deni torrauicca torrauiuarrine Deo Pouana madirra orrari orrari naha ihicatterriza narronarrari. Narraricca cacauehepe arrima narraro: Taidepe madirradenicca uima Deoza uati uati ihiqquima narraro. Onihipe: —Abi Deo, Tiape bica tinani −quenauiuarrine poccadeni danirri Deoza da da ihiqquima narraro. Onihipe uimasiri manaconi bani bedi emene Deoza da da ihiqquima narraro.

² Deoza dada toqquimadepa Deoza zepe irriraha poua naco madirrarra narrari. Deoza ibora tauissa tauirrine pouaza naqui narro tani. Nama nazapa Deo Atti mittemanauissa tarrararrarideniza uati uana tazapa mouaraza uati uati ihicanabaqqui narrari.

³ Deoza ibora tauissa tauiuarrine pouaza narro tezape poua naco uimasiri inana tani. Nazapa madirradenicca uimasiri manaconi Deoza dade torrazapa poua pocca uimasiri manaconi naqui da da ihiqquima narraro.

⁴ Nazama madirrapa poua touini naza: —Ouana Deoza dada toqquimade, uimarideni uauati toqquimade deni torrauicca orrana −narrararrari. Noueraui. Deo Pouana madirra icatterrizarrari, Pouaza dada toqquimade, uimarideni uauati toqquimade torrauiuarrine. Pina maittaccazama Moize imecote Araocca uimassa narraro. Izarraeo potemauidenicca danirri Deoza dada toqquimade torrauiuarrinepa Deo Pouana icatterrizarrari.

⁵ Zeso Cristo naco poua touini naza: —Ouana Deoza dada toqquimade, uimarideni uauati toqquimade deni torrauicca orrana −narrararrari. Deo Pouana Bedi icatterrizarrari, narraro cacauehe deni torranicca carriuiuarrine. Nazapa Bediza Atti arrama narrari: —Tiape occa erredeni tirrani. Rridapana ticca Abi orrani, onarraro −napoui nade.

⁶ Deo Atti dozo nanicca onihiza naqui uati tapomarrari: —Tiape madirracca danirri Ouaza dada toqquimade, uimarideni uauati toqquimade nema tizanaponitoui. Pina Ouaza dada toqquimade Meoquizedequissa tanitoui −naui nade Deo.

⁷ Zeso Cristopa arrirraro namiza madiccaza uarrirriraza Imehi Deoza uati uati tarrari. Ocasserani auaza orriema Imehiza uati uati tarrari. Bodi qquezaza naco atti moui taza uaua narrari. Imehipa dacorehe carrirrari. Poua Bedi zoqqueheza inassiuauauiuarrine parrireui. Naraha Zesopa Imehi Attiza ibora taza: —Peperri Abi, touini taniccazana ibora onarraro −narrari. Nazapa Imehi Poua Bedicca iborehe qqui taza Bedicca uatinarra mittarrari.

⁸ Nazama Deo Bedi Zeso Cristopa ocasserani aua-rrarauiuarrine parrireraha nama naha ocasserani auarrari. Nama narraripa Imehi Deo Attiza ibora tauiuarrine touattarrari.

⁹ Pocca iborehe Deoza parrirenissa taza Deorrine madirra Tonassiuauade torrauiuarrine inaparrireuissa tarrari. Bazima pouaza iboraqquiri narrarideniza tossiuauehe rriquerreranicca inanarizarraro.

¹⁰ Deo Pouarrine naco madirracca danirri Pouaza dada toqquimade, uimarideni uauati toqquimade deni torrauicca torrarrari. Pina maittaccazama Deoza dada toqquimade Meoquizedequissa nauiuarrine narraro cacauehe Bediza inanarraro.

Deocca zossenirri narro tanicca naqui iattana

¹¹ Rrehe, nezape narraro uima tiadeniza denima dozo onaniuarrineraha narro tani. Touatti narrora taniccaza dozo onaniuarrine parrire-rrerani. Tiadeni naqui timittemananiuarrine narroqquiri tiquenani.

¹² Arrina, uarrano uapi taha Zesoza rrehe tizanapomaneraha poua tauimari maride tiparriremanaqui? Ssamoqquiri tiquenani. Deocca marinarra narrora tanicca timittemananissa terrerezape: —Narrarora imittapomana −titiquena narraro. Rraho nerrecotoui marinarra narrora tanicca touinira tizanapomanarraro? Nema tiquenezape pina erredeni tobaccoccassa tiquenarraro. Erredeni tobaccoccapa zamatapa rripade parriremana-rraraui. Zorrora tomi tomi quenarrarissa tiquenarraro.

¹³ Arra zorrozara madimanarraridenipa erredeni. Pouadenipa uima bicani tocatterrizade ssamoqquiri, uima uaidira tanicca uattarrode ssamoqquiri narrari.

¹⁴ Naraha zamatapa rripade parriremanarraridenipa rradauideni. Pouadenipa bodideni tocauatteraza uima bicani tocatterrizade nauatoqquiri, uima uaidira tanicca uattarrode nauatoqquiri narrari. Rradauidenipa Deocca zossenirri narro tanicca mittade parriremanarrari.