Ebreodenidsa 4 - Kulina New Testament Brazil

Deo pocca rrassinarra aniniuarri ia rrassitonanabaqquiza ia tonamadibaqquizanapouiuarrine

¹ Deocca rrassinarra aniniuarri rrassi inaniuarrine iaza touabaccani. Naniuarri rrauirrezimaniuarrinepe mouaraza imadina, onarraro. Mouaraza imadi-rrerezape orraria zori tarra canarana.

² Parrissa iaza Deocca uima bicani anirrarope ia mari tocanabaqqui-manaza imittarrarode, pina Izarraeo potemauideni mittemanaporrarissa narraro. Pouadenipa narraro uima bicani mittemanaporaha ponima inanemanarraro. Pamahapa parrissa quenaraha motapa parrissa quena-rrararrari.

³ Iana parrissa inezape Deocca rrassinarra aniniuarri bacco inarraro. Naraha Pouaza parrissa quena-rrararraridenizapa Deo Attia: —Nezape occa uadiema Ouattipe: Narraridenipa occa zama bicaniuarri onamadibaqquiza rrassi quenauiuarrineraha nauiuarri rraui torrezima-rrarana, onarraro −naui nade Deo. Narraro rrassinarracca uimape Deo Poua meme, nami bazima nauatode torrazapa uada 6 nehe zepe irrirrari. Inauatorizehe rricanissa taza rrassi narrari.

⁴ Arri uada 7ʼcca uimape Deo Atti dozo naniza arrima narraro: —Deo zepe irria rricauissa taza uada ssiuarrapa rrassi narrari.

⁵ Rrassinarracca uimape iaza auato tarraro, Deo Atti dozo naniza dozo naporraro. Arriza dozo onapomarraro: —Narraridenipa occa zama bicaniuarri onamadibaqquiza rrassi quenauiuarrineraha nauiuarri rraui torrezima-rrarana −naui nade Deo.

⁶ Deocca uima bicani arri zama bicaniuarri rrassi quenauiuarrinecca uima mittemanaporraridenipa Deo Poua Attiza iboqquiri naza nauiuarri rraui torrezima-rrararrari. Naraha zotodedeniccana Deocca rrassinarra aniniuarri rrassi quenauiuarrine pouadeniza touaba-zanapoccani.

⁷ Deopa madirra rrassi inanabaqquiuiuarrine nacassa tarrari. Narrarorrine pocca rrassinarra aniniuarri uada onihiza rraui torrezimauiuarrine narrorapomarraro. Maittaccazama Deo Atti Dabicca rrirririza dozo nani anirrarossa narraro dozo onapomarraro: —Rridapanape Deo tiadeniza uaua naui timittemanezape teribodeni didiqquiri nerrerana. Arra Deo Attipa: —Rridapana −nazapa pocca rrassinarra madirraza touabaccani iaza auato tarraro.

⁸ Nazama arra Moize birri accode Zosouena Izarraeo potemauideni zama Canahauarri iaqquezimabaqquirrari. Narraro zama bicaniza bacco tozimemanaraha rrassi quenauissa tarraraui. Deocca rrassinarra parrisseheccaza toquerrena-rrararrari. Nazapa zotodedeniccana rraui torrezimauiuarrine uada onihi narrorapomarraro.

⁹ Narraro uimape ia Deo pocca madirra iquerrenarraroza pocca rrassinarra aniniparri naccarraro.

¹⁰ Ia bazima Deocca rrassinarraza iquerrenezape rrassi inanissa tanitoui. Nanizape izepe irripoma-rreranitoui. Pina taide zama nauatoponi Deo Poua zepe rricaza rrassi narrarissa inanitoui.

¹¹ Nezape narraro Deocca rrassinarraza iquerrenaniuarrine dameraqquiri izanapona. Icca madirra zori tarra canima-rrarauiuarrine. Pina taidedenicca Deoza iboqquiri naza zori tocanirerrarissa quena-rrarauiuarrine, onarraro.

¹² Deo Attipe dacorehe carri, camittehe carri narraro. Pina rrazirecca massito cauidire-qquimerarrarossa narraro. Narraro massitope bani imeza rraro tozimeza tone touariuiza tarro tauiuarrine parrire, appone auatouiuarrine tone icanarobeuiuarrine parrire narraro. Narrarossa narraro Deo Atti ibodiza toqquezimezape icca uima nattome inarraro. Ibodi uatoue, ibodiza touini inanicca bazima bica tanicca, uaidira tanicca auato inanarraro.

¹³ Rrehe, Deo bazima inauatorizarraripa uapima qqui tauissa tarrari. Poua qqui tarrarauiuarrine inarrimaui ssamo tani. Icca uima naqui Pouaza auato tarraro. Niza icca uima ecomeraniuarrinepe Poua baccouarri idomo uanitoui.

Zesopa icca uima Deoza uauati toqquimade deni torrauicca

¹⁴ Deo Bedi Zesopa Imehi madiuiuarri toccamacossanizapa rridapana memeuarri madirrari. Pouapa icca uima Imehi Deoza uauati toqquimade deni torrauicca. Ouaha pina pouassa narrari noueraui. Pouazara parrissa ineza pouatoui dameraqquiri izanapona.

¹⁵ Arra icca uima Deoza uauati toqquimade deni torrauicca Zeso pina iassa naha namiza madizapa uimasiri totonanade nattome inarrari. Pina ia nanattome narrarissa narrari. Uimasiri totonanade attia: —Zesopa ouattiza ibora taco? Ibo tarana? −naraha Zesopa Imehi Deozara ibora taza uimasiri inana-rrerarraro. Nama nazapa iaza uati uana taui. Ibodi mirrira tani nauato taza ia acco canade nacassa taui.

¹⁶ Pouaza iarriressina. —Zesopa dacoraui, ia acco tocanabaqquiuiuarrine parrireui −inana. Pouapa bica taui. Iape bica inerreraraha iaza uati uana taui. Iaza uima anizape uimasiri inane-rreraniuarrine pouaza uati inezape ia acco tocanabaqquiuitoui.