Ebreodenidsa 3 - Kulina New Testament Brazil

Moizepa arramani, Zeso Cristona deni torrarrari

¹ Rrehe ouimecotedeni, Deopa pocca madirra pouaza bicaqquiri tiquenaniuarrine tiadeni tocatterrizabaqquirrari. Nema nezape Zesoza tibodideni uatonissa tarri, onarraro. Pouaza rrehe inezape poua tauimari ehecomera narraro. Pouapa Imehi Deocca zossenirri ccaronarrari, iaza Imehi tauimari uati tauiuarrine. Poua naco icca uima uauati toqquimade deni torrauicca. Icca uima Imehiza uati uati tarrari, inarraro.

² Pouapa madirra cacauade torrauiuarrine Imehicca zosseheza ibora tarrari. Nama nazapa pocca uima pina Moizecca uimassa narraro. Moize naco Deocca zosseheza ibora tazapa Deocca madirra cacauade torrarrari. Arri Deocca madirra inarrarope Deocca ozacca ihinanarraro.

³ Arri icca ozape nanauatode carrirraro. Oza bica tocanezape: —Oza bicani −inarraro. Naraha nanauatodena denima bica tarrari. Narraro uimassa narraro: —Moizepa bica taui −ineraha Zesona denima bica tarrari. Pouapa Moizeza deni torrarrari.

⁴ Nazama oza bazimape nanauatodena ihinauatomana narraro. Naraha zama bazimaza anirizarraripa Deo Pouana inauatorizarrari.

⁵ Moizepa Deo Attiza ibora tazapa Deocca ozacca madirra cacauade torrarrari. Naraha pouapa Deocca zozosse. Moize madiza zepe irrirraripa Deorrine poua noccoza qqui tarrari, mittarrari narraro Deocca madirraza ehecomera narraro. Narrarope niza zotode Deo pouadeniza uati tauiuarrine ehecomerapo narraro.

⁶ Naraha Zeso Cristopa Deo Bedi. Imehi Attiza ibora tazapa pina Moizessa narrari. Deocca ozacca madirra cacauade deni torrauicca torrarrari. Nazama ia Zesoza rrehe izanaponissa taza ia tonassiuauabaqquiuiuarrine toui imadirraro naqui Deocca ozacca madirra iquerrenarraro.

Deo Poua Attiza iboraqquiri inezape pocca zama bicaniuarri rrassi inanitoui

⁷ Rrehe, ettipe: —Deocca madirra iquerrena-zanapona −inezape Deo Corimerrine dozo naniccaza iboraqquiri inana. Narraroa arri: —Rridapanape Deo tiadeniza uaua naui timittemanezape

⁸ teribodeni didiqquiri nerrerana. Pina maittaccazama ticcadeni idi Izarraeo potemauidenissa tiquenerrerana. Pouadenipa uaribodeni didiqquiri naza Deo Attiza touibomanarrari. Zama uamoni ssono carri, siba carri taniuarri madirizemanaza Deo nacassera tauicca ihinanarizemana nazapa Poua nattome quenarrarissa narrari.

⁹ Poua Attipa: “Uarrano 40 naha ouacauabaqquiza ocanauatoriri canani qqui qqui zanapomanaraha ‘Deo ia touacauabaqqui-rraraui’ quenarrari. Attideni nama quenazapa pina Oua nattome iquenarrarossa narraro.

¹⁰ Nama quenazapa pouadeniza ouadiza Ouattipe: Rraho, Ouaza bodideni uato-rraraza uima onihi touira zanapomanarrari. Occa marinarra ssamoqquiri narrari, onarraro.

¹¹ Nezape occa uadiema Ouattipe: Narraridenipa occa zama bicaniuarri onamadibaqquiza rrassi quenauiuarrineraha nauiuarri rraui torrezima-rrarana, onarraro” naui nade Deo −nani nade Deo Atti dozo naniza.

¹² Parri ouimecotedeni, tibodideniza uaidirehe tecauemana-rrerarri. Tibodideniza rrehe tiquenanissa terreraza naqui Deo camitta tarrari Pouaza tiarrimanerana.

¹³ Arrima tiquenanina bica tani: Uarrirriraza tiadenira ticatizerara canarri. Arri rridapana Deo tiadeniza uaua naui parra naccaza: —Deo Atti imittana −titiquena naza acco acco ticanarizerara canarri. Nema tinanemanezape uimasiri tiadeni tocamaizabaqqui-rreranitoui. Deoza naqui tibodideni touibo-rreranitoui.

¹⁴ Zeso Cristoza iquerrenaniuarrinepe pouaza rrehe izanaponiuarrine. Pina taide pouaza rrehe inazama narrarossa inarronehe damera izanapoza poua ccaniuicca uada bacco inezape pouaza iquerrena-zanaponitoui.

¹⁵ Pina arri dozo onaporrarossa narraro Deo Atti dozo onapomarraro: —Rridapanape Deo tiadeniza uaua naui timittemanezape teribodeni didiqquiri nerrerana. Pina maittaccazama ticcadeni idi Izarraeo potemauidenissa tiquenerrerana. Pouadenipa uaribodeni sibaqquiri naza Deo Attiza touibomanarrari −nani nade Deo Atti dozo naniza.

¹⁶ Nerrecorraridenia Deo Atti mittemanaraha Poua Attiza touibomanarraritta? Izarraeo potemaui zama Ezitouarri Moize iaqquenabaqquirraridenina parra.

¹⁷ Nerrecorraridenia uarrano 40 naha Deo pouadeniza uadi-zanaporraritta? Izarraeo potemaui uaidirehe inanemanarrarodenina parra. Poccadeni uaidirehe manaconipe zama uamoni ssono carri, siba carri taniuarri zozoqqueri narizemanarrari.

¹⁸ Nerrecorrarideniza Deo Attipa: —Rraho, narraridenipa occa zama bicaniuarri onamadibaqquiza rrassi quenauiuarrineraha nauiuarri rraui torrezima-rrarana −narraritta? Izarraeo potemauideni Deo Attiza touibomanarraridenina parra.

¹⁹ Parrissa pouadeni tauimari nauatoqquiri inani. Deopa zama onini Canahaza pouadeni rrassi inanabaqquiuiuarrineraha Pouaza rrehe quena-rrararrarirrine rraui torrezima-rrararrari quenade.