Ebreodenidsa 10 - Kulina New Testament Brazil

Deocca zossenirri taideccape icca uima inaparrirenissa taniuarrine parrire-rrerani

¹ Cristo uimasiri manaconi torrauiuarrine tauimaripe pina arrirraro uimassa narraro. Arra madirra ccarronaza marrirrine corime qqui inapozape zotodena assire ccarronaui nauato inarraro. Deocca zossenirri Moizeza da inaporrarope corimani. Deocca danirri denima bicabote zotode ccarronaniuarrinepe assirani. Narraro assirani parrissa torrarrarope Zesona parra. Nazama narraro Deocca zossenirri taideccape madirra uimarideni inaparrirenissa taniuarrine parrire-rrerarraro. Madirra taidedenicca Deocca zossenirri ecauemanezape poccadeni uimasiri manaconi bani bedi emene da iqquime-mananiuarrine Deo tazariuarri rrarraui torra narrari. Uarrano orrari orrari bani bedi emene da da ihiqquimemana naraha narraro danirripe uimarideni inaparrirenissa terrerarraro.

² Rridacca narraro Deocca zossenirri taideccaza bodideni touissonissa taniuarrine parrirezape pouadeni bodiza: —Orrine uaidira tani, uimasiri ocarrini −quenapoma-rraranarra. Arra bani bedi emene dada naco nebomananarra.

³ Naraha arrirraro uimana parrissa. Pouadenipa uarrano orrari orrariza uimasiri manaconi bani bedi emene da da zazanapomana narrarirrine bodideni uatoua madimanarrari. Bodidenipa: —Uimasiri icarrini −quequenanarrari.

⁴ Rrehe, nazapa bani bedi emene poccadeni uimasiri manaconi dada nebomana-rrararaha narraroza poccadeni uimasiri rricaniuarrine parrire-rrerarraro.

^5-6 Nama nazapa Cristo namiuarri madide ccaronabote naza Imehi Deoza uati tarrari: —Rrehe Abi, Tiape madirradenicca uimasiri manaconi bani bedi emene da da ihiqquimemana nauiuarrine touini terrerarraro. Rrirripa bicaui da da ihiqquimemana nauiuarrine naco touini terrerarraro. Bani bedi bicaui siba ua tamaroniza botta botta quenauiuarrine naco touini terrerarraro. Danirri onihi onihi uimasiri manaconi torraniuarrine carri taraha narraro naqui touini terrerarraro. Nouerarraro. Naraha poccadeni uimasiri manaconi orraniuarrine oua pina pouadeni assiredenissa tinanarrarode.

⁷ Nazama ouattipe: Abi Deo, ouape arri ouani. Pina otauimari Tetti dozo naniza anirrarossa onananiuarrine occaronarraro. Tia touini tanicca onananiuarrine touini onarraro −naui nade Cristo atti Dabi pocca rrirririza dozo inarraroza.

⁸ Deocca zossenirripe madirra poccadeni uimasiri manaconi bani bedi da da ihiqquimemana nauiuarrine icazossebaqquiporrari. Naraha Cristo uati tarraripa: —Abi Deo madirra nama quenauiuarrine nacassera taui −narrari.

⁹ Poua atti naco: —Ouape arri ouani. Tia touini tanicca onananiuarrine occaronarrarode −naui nade Imehi Deoza. Poua atti nama narraripa uimasiri manaconi bani bedi dade inarricarraro. Manaco pouarrine onihi zatira inanarraro.

¹⁰ Zeso Cristopa ibora taza Deo Poua touini nauicca inanarraro. Poua ime ccaccorazapa icca uimasiri manaconi torrarraro. Pocca danirripe orrarirraro. Onihi noueranitoui. Poua emene icca uimasiri manaconi torrarrarope parrirenissa zanaporraro. Nama narraria Deo pocca madirra bicaqquiri inaniuarrine ia tonanabica-baqquirrari.

¹¹ Nazama Deoza dada toqquimadedenipa uada uarrirriraza zepedeni ihirrimana narrari. Uarrirriraza uimasiri manaconi bani bedi emene Deoza da da ihiqquimemana naraha narrarope uimasiri inarricaniuarrine parrire-rrerani.

¹² Naraha Zeso Cristo uimasiri manaconi da inarrarope orrarirraro. Narrarope parrirenissa tehe nema zanaponitoui. Naui zotodepa Zeso Imehi Deo madiuiuarri toccamacossaniza deni torrehe carrirrarirrine Deo Poua uinori nauatoniuarri uittarirrari.

¹³ Nauizapa Imehi Deo uati taporrari toui madirrari. Arra taide Imehi Attipa: —Nizaranibote tia uauadidedenipa arramani onanabaqquiuitoui. Poccadeni dacorehe onarricanitoui −naui nade. Narraro uada bacco tanitoui madirrari.

¹⁴ Pocca danirri uimasiri manaconi torrarrarope orrarirraro. Narraroza Deocca madirra tobiquemanarraridenicca uima Deoza parrirenissa zanaporraro.

¹⁵ Narraro uima parrissa torraniuarrine Deo Corime iaza auato inanarraro. Deo Poua Atti dozo naniza arrima narraro:

¹⁶ —Occa zossenirriza iboraqquiri nauiuarrine parriremana-rraraui qqui oneza Ouattipe: Izarraeo potemauideniza occa rrehe canirenirricca uima zatira onanana, onarraro −naui nade Deo. —Nazama occa rrehe canirenirri zatipe arrima naniuarrine: Pouadeni bodiza onananitoui. Pina pouadeni bodiza dozo onarrarossa nanitoui, uatideni rrimemana-rrarauiuarrine.

¹⁷ Pouadeniza: Peperri, ticcadeni uimasiri ouati rrimani. Ticcadeni uaidireheza obodi uatomapoma-rreranitoui, onarraro −naui nade Deo.

¹⁸ Nazama poccadeni uimasiriza Deo uati rramazapa uimasiri manaconi bani bedi emene dade rricarraro. Narraro uima rriquezape denima noueranitoui.

Deoza iarriressina, Pouaza rrehe izanapona

¹⁹ Rrehe ouimecotedeni, Zeso Cristo zoqqueza poua emene toccarrarorrine Deo aniuiuarri rrauirrezimaniuarrine toppinerani. Toppinerezape rridapana icappine-rrereza Deoza iarriressiniuarrine iparrireni.

²⁰ Zeso zoqqueuirrine poua assire ccaccorazapa Deoza bacco inaniuarrine icca rraui inauabarraro. Arri maittaccazama Deo aniuiuarri denima bica tanicca quequenanauiuarri etero siba tanicca uacossarraro. Narraro uauacossa inauabarrarossa narraro Zesopa rraui zati camittehe icarriniuarrinecca iaza inauabarraro.

²¹ Pouapa icca danirri Deoza dada toqquimade, icca uima uauati toqquimade deni torrauicca. Deocca ozacca madirra Cacauade torrarrari.

²² Nazama ia Cacauade Zeso icca rraui inauabezape Deo Pouaza iarriressina, onarraro. Ibodi maizera teza Deozara parrissa inanissa teza Pouaza iarriressina. Zeso emenerrine ibodi touissozape uaidirehe rrirehe Deoza iarriressina. Icca uimasiri rricani auato taniuarrine naqui passoza essire ssaua inezape Deoza iarriressina, onarraro.

²³ Deopa maizera taui. Uima bicani iaza inananiuarrine uati taporraripa parrissa narrarossa inananitoui. Nezape etti rrouizo terreraza: —Parrissa nitide, parrissa rreranitide −inerrerana. Ettipe: —Rrehe, Deo Poua Attissa inananitoui. Pocca biquehe iaza inananitoui, parrissa −inana. Nema inezape narraro toui imadina. Nezape dacoco irrirana, narraroza parrissa izanaponiuarrine.

²⁴ Rrari, tibodideni uatome-manarri. Nerrecoma ineza imecote bodideni acco icanabaqquiuiuarrine? Pina uatideni cauanerara canauiuarrine, uima bicanira inanemananiuarrine naqui bodideni acco acco ihicanabaqqui nana.

²⁵ Uima onihi naqui Deo Pouaza ihiqueriqqui zanaporraro inebo-rrerana. Pina arra motadeni neneboqquimana narraridenissa inerrerana. Iape uarrirriraza icatizerara canarizana. Ia Zozossede Zeso ccanibote naui. Deo madirra bazimacca uima icattemaniuarrinecca uada bacco tabote nani. Nema nezape denima icatizerara canarizana, onarraro.

²⁶ Ouimecotedeni, icca uimasiri manaconi Zeso zoqquerrari tauimari parrissa torrani nauatoqquiri inarraro. Naraha narraro uima bicani pina ponimassa inaneza uimasiri inana-zanapozape niza Deo iaza: —Rrehe, occa erredeni Zesorrine ticcadeni uimasiri rricarraro −narrarauitoui. Uimasiri nema inanarraro manaconi da inaniuarrinepe onihi nouerarraro.

²⁷ Nezape uima oppina tanicca iaza aninitoui. Deocca narrizoue rrororoni ppocorarraro iaza naqui ssonarinitoui. Narraro narrizoueza poua uadidedeni bazima inarricarizauitoui.

²⁸ Eti rrima-rrerana. Deocca zossenirri Moizeza da inarrarope dacorarraro. Madirra narraro zossenirriza ibo taza uimasiri inanani qqui toquenazapa uima cacattemadeuarri poua rroca iquena taui. Nazapa madirra uima tonanarrari uima cacattemade baccouarri inauemanaza arra qqui toquenarrarideni pamaha, 3 nauitide pocca uima uati toquenarrari. Nazapa uima cacattemade atti: —Rrehe, zoqquena −nazapa uatideni uaneraqquiri naza inanazoqquemana taui.

²⁹ Nezape narraro uimasiri inanarraro manaconi oppina tani ineraha Deo Bedi ettarroui manaconipe denima oppina tani. Madirrapa Zeso ttai ttai inanarrarissa nazapa pouaza narrizoue oppina tanicca ssonarinitoui. Arri Zeso emene toccarrarorrine Deo pocca rrehe canirenirri zati iaza torrarraro. Narrarorrine icca uimasiri rriquezape icca uima Deoza tobicarraro. Deo Corime iaza uati uana taza ia accode touini naraha madirrapa Zeso emene ponima inanezape Deo Corimeza naco uima inanarraro. Niza zotode narraripa narrizoue carriuitoui.

³⁰ Narraro uima nauatoqquiri inarrarope Deo Atti dozo naniza dozo naporraro: —Uaidirehe inanemanarraro manaconipe Ouana parri. Ouana pouadeniza uaidirehe manaconi onassonarinitoui −naui nade Deo. Poua Atti naco: —Ouape pouadeni Cacauade Deo. Occa madirra ocatterriza-baqquiuitoui. Bicaqquiri narrarideniza occa biquehe da onanitoui, uaidiraqquiri narraridenipa onarrizobaqquiuitoui −naui nade Deo.

³¹ Rraho, Deo camitta tarrari zepeza iquerrenanipe oppina tani! Pocca narrizoue inauananiuarrine iparrire-rrerani.

³² Tibodideni uatome-manarri. Taide Zeso Cristo tauimari timittemanapozape pouaza tiquerrenarrarorrine uima ocassera tanicca onihi onihi tiadeniza ssonari ssonari narrarode. Naraha dacoco tirrireza tinauanemana tinauanemana narrarode. —Peperriua, Deo onebona −titiquena nerrerade.

³³ Tiadeni motape tamassoue tinauanemanarraro, narrizoue naqui tinauanemanarraro. Tiadeni nama tonanabaqqui-manazapa madirra bazima qqui qqui totoquena narrari. Titessedeniza uaidirehe inanemaneza naqui pouadeni tezerre ocasserani temanarraro.

³⁴ Zesoza rrehe quenarrarideni toponi cocorouarri ineuezemanazapa touideni tetideni uanaqquiri neza acco acco titicanabaqquimana nade. Tizepedenitarri inaqquemanaza naqui tetizemaneza: —Peperri, tinaqquemanarro −tiquenade. Titezerremadenicca uima nauatoqquiri tiquenezape: —Peperri, memeuarrina denima bica tanicca, rricaquera tanicca icarrinitoui −titiquena nade.

³⁵ Nezape tiadeniza ouattipe: Deoza rrehe tiquenarrarope tinebomana-rrerarri. Deoza rrehe tiquenanissa zanapozape Deocca danirri bica tanicca tiadeniza torranitoui.

³⁶ Dacoco tirrirarri, Deo Poua touini nauiccassa tinanemana-zanaponiuarrine. Ocasserani temanezape nema nehe tinauanemanarri. Nema tiquenezape Deo Poua uati taporraricca uima bicani tiadeniza inananitoui.

³⁷ Arra Zeso ccanipomauiuarrinecca uimape Deo Atti dozo naniza arrima narraro: —Itoui ccanipomauiuarrinepa parrissa ccanibote naui. Ccanide narro-rrarauitoui.

³⁸ Occa madirra bica tarraripa poua bodiza: “Parrissa Deo Poua Attissa inananitoui” narrari. Narraro rrehenirrima madi-zanapouitoui. Naraha zotode Oua neboza pocca uimaboteza torranipomazapa pouaza ouatize-rreranitoui −naui nade Deo.

³⁹ Naraha iape pina poccadeni uimaboteza torranimanapo-manarraridenissa inerrerani. Narraridenipa Deo inarrizobaqquiuitoui. Naraha iana Deoza rrehe inanissa tezape Deo ia tonassiuauabaqquiuitoui.