Ebreodenidsa 1 - Kulina New Testament Brazil

Deopa iaza uati tauiuarrine Poua Bedi zosse inaronarrari

¹ Maittaccazama Deopa Poua Atti cacomeraqquiri narraridenizana uati taza narraridenina icca idideniza uati uati ihiqquimemana narraro. Deopa pocca zossenirri, madirra pouadeni tezerremacca uima auato inanarrarope onihi onihi inanarraro. Naraha Poua Attiza uati taui orrari-rrerani. Poua Atti cacomeraqquiri narraridenicca uadaza naqui auato inanarraro, bodideni naco inauattabaqquirrari.

² Naraha rridapana zama rricanicca touarrireza iaza uati tauiuarrinepa Poua Bedi zosse inaronarraride. Narrarina iaza Imehi Atti uati uati ihiqquima narrarode. Rrehe, Poua Bedipa taide Imehi tezerre meme, nami, bazima anirizarraricca inauatomanaporrari. Nazama Deopa Poua Bedina cacauade inanarrari. Bazima rrinede torrarrariparra.

³ Rrehe, narrari Deo Bedirrinena Imehi Deocca dacorehe, deni torrehe, canauatori canehe iaza auato tarraro. Pouapa pina Imehi Deossa narrari. Nauato tarrari. Bica tarrari. Meme, nami, bazima anirizarraricca poua atti dacorarraroza: —Anizanapona −naza pouarrine anizanaporrari. Nazama itoui zoqqueuiuarrine ibora tazapa poua emenerrine ibodicca uimasiri sse narizaza ibodi touissorraro. Zotode Deorrine deni torrazapa memeuarri toccamacossaniza Deo Bicabote uinori nauatoniuarri uittarirrari.

Deorrine Poua Bedi deni torrazapa Deocca zozosse tabaqqui memeuarricca arramani toquerrenarrari

⁴ Rrehe, Deo Bedi Imehi uinoriuarri uittarirraripa Deocca zozosse tabaqqui memeuarriccaza deni torrarrari. Narrarossa narraro Deo Poua Bedi oni icanacanirraripa pocca zozosse tabaqqui onideniza deni torrarraro.

⁵ Deopa pocca zozosse tabaqquideni orrariaza arrama narrarico? —Tiape occa erredeni tirrani. Rridapana Ouape ticca abi orrani −narrarittaco? Noueraui. Poua Bedizana nama narrari nade. Poua Atti pocca zozosseza: —Ouape pocca Abi orranitoui. Poua naco occa erredeni torrauitoui −narrarittaco? Noueraui. Poua Bedi tauimari uati tapozana nama naui nade Abi Deo.

⁶ Pocca erredeni taidecca pina madirra iassa naha tossonauiuarrine iauarri zosse inaronarrari. Nazapa Poua Attipa: —Occa zozosse tabaqqui bazimapa occa erredeniza: “Deni tirrani” quenana. Pouazana uauatizemana nana, onarraro −naui nade Deo.

⁷ Deopa pocca zozosse tabaqqui tauimarideni uati taza naco Poua Attipa: —Occa zozosse tabaqquipa pina rrorrode dacorarrarossa, pina rrororoni ppocorarrarossa onanarizabaqquirrari −naui nade Deo.

⁸ Naraha Poua Bedi tauimari uati tazapa: —Tiape Deo tirrani. Ticca cacauehe nema zanaponitoui. Ticca cacauehepe dacorarraro, parrirenissa zanaponitoui.

⁹ Uima bicani, parrirenissa tanicca touinira tarraro. Uima uaidira taniccaza nacassera tinarraro. Nema tarrarope Ouape ticca Abi Deo tia ocatterrizarraro, tamine tirraniuarrine. Titessedeniza tia deni onanarraro. Tiazara uatizehe deni torranicca onanarraro −naui nade Deo.

¹⁰ Poua Bedi tauimari denima uati taza naco arrama narrari: —Rrehe oua Zozossede, tiape arrirraro zama noueraccazama timadiporraro. Tiana nami tinauato, meme tinauato narrarode.

¹¹ Niza narrarope bazima rricarizanitoui. Naraha tiana timadi-zanaponitoui. Arra tinauatorizarrari bazimapa pina etero rradani tocarreza torrorararrarossa nauitoui.

¹² Nezape domo taqquininitoui, pina etero rradani domo taqquinirrarossa nanitoui. Pina etero rradani ineboza onihira ezarrarossa narraro. Narrarossa nanitoui arri tinauatorizarrari bazimapa cacarriqquimerauitoui. Naraha tiana nema tizanaponitoui. Rradaui ticarre-rreranitoui −naui nade Deo.

¹³ Deopa pocca zozosse tabaqquideni orrariaza naco: —Deni tirrani −narrarittaco? Noueraui. Naraha Poua Bedizana Atti arrama narrari: —Ouinori nauatoniuarri tittarirri. Oua tezerrepe touatti dacorarraro ticarrirri. Nizaranibote tia uadidedenipa arramani onanabaqquiuitoui. Poccadeni dacorehepe onarricanitoui −naui nade Deo.

¹⁴ Arra, pocca zozosse tabaqquipa assiredeni qqui inabaqqui-rraraui. Pina madirra iassa quena-rraraui. Deo pocca madirra tocassiuauerarrarideni acco canadedeni arrauarri zosse, arrauarri zosse ihinarizabaqqui narrari. Narraridenipa bicaqquiri naraha arramani toquerrenarrari. Deo Poua Bedina deni torrarrari, onarraro. Peperri.