Apocalipsis 9 - Kulina New Testament Brazil

Deocca zozosse memeuarricca 5 nauicca rrori rrori narrari

¹ Nazapa Deocca zozosse 5 nauicca rrori rrori nanarra memeuarricca amoua namiza cassonaza cauittaui qqui ocanarrari. Narraripa Deocca zossenirri. Pouaza nami odini uarri tanicca chave da icanarraro.

² Nami odini uarri tanicca totoqquezima itaborrizanerre odi bodiuarricca esseni qquenarraro. Pina zippo imenibote rrororoni essenissa narraro. Narraro meme irrizape tosoueni neza marri amossi narrari.

³ Narraro esseniza abissa auatome-manazapa namiuarri rrauironana canarizarrari. Nazapa nami bazimaza irririzarrari. Madirra itauarrine-manauiuarrine comenedeni dacorehe carririzemanarrari. Pina zomouassa naha pouadeniza da inarizarrari.

⁴ Pouadeni zossede attipa: —Minape tinarrizomana-rrerarri, moro tarizauicca tinarrizomana-rrararro, aua appani naqui tinarrizorizemana-rrerarri. Naraha madirra uassarideniza Deocca nanarrano cappiremanarraridenira tinarrizoriza-baqquimanarro.

⁵ Naraha tirrinedeni aua-rrerarri, onarraro −narrari. Nazapa abazico 5 canaha pouadeni comene madirraza inanarizemanezape pina zomouassa comene auemanarrarissa quenauitoui.

⁶ Nizaranibote narraro uima torrezape madirra ocasserani auemanaza attidenipa: —Irrica naccaraho −quenauitoui. Neraha zoqquehe pouadeniza uarri tanitoui.

⁷ Abissa bazimapa pina cavaro rraziretoui narroremanarrarissa quenarrari. Tatidenizape oro nauatoni pina tamine taticcassa narraro uittaririzarraro. Panodenipa pina madirra pano narizemanarrari.

⁸ Tatideni conepa pina amonerre tatinideni conanissa quenarrari. Inodeni naco pina zomarri inossa quenarrari.

⁹ Pouadeni assire cacauemanauiuarrinepa pperro nauatoni ccarabote rrazireuarrinecca oro tozimemanarrari. Eppedeni moui naco pina nami rrorroppade cavaro uapi taha rraziretoui domo toccarrari mouini dacorarrarossa narraro.

¹⁰ Zoporideniza naco pina zomauassa ori comenessa naha carririzemanarrari. Narrariza abazico 5 canaha madirra inarrizobaqqui-manauiuarrine.

¹¹ Abissadenipa tamine carrimanaui. Pouapa nami odini uarri tanicca cacauade. Poua oni zodeodeni atti ebreozapa: Abadom, quequenanarrari. Zama Cresiacca madirra attidenizapa: Apoliom, quequenanarrari. (Narraripa: Toponi nanarricade, inarraro.)

¹² Nezape uima oppinabote taidecca rricaraha denima pamehe zoriri taccani.

Deocca zozosse memeuarricca 6 nauicca rrori rrori narrari

¹³ Nazapa Deocca zozosse memeuarricca 6 nauicca rrori rrori nanarra touatti omittarraro. Deo baccouarri uauanari oro nauatoni orini 4 narraro nocconiza touatti mouini qquenarraro.

¹⁴ Narraro touattipe Deocca zozosse memeuarricca 6 nauicca rrori rrori narrariza arrima narraro: —Deocca zozosse tabaqqui memeuarricca 4 quenarrarideni ueni imehi Eoparateuarri ssoque toppiza ecauabaqquirrari. Rrauirizauiuarrine tappa tinabaqquirro −narraro.

¹⁵ Nazapa Deocca zozosse tabaqqui memeuarricca 4 quenarrarideni tappa inabaqquirrari. Madirra mota inarricarize-manauiuarrine rraui torrarrari. Pouadenipa narraro uimaza zepedeni irririze-manauiuarrinepa narroremanaporrari. Arra pouadeni zepe irriuiuarrinecca marri, uada, abazico, uarrano bacco taza zepedeni irrimanarrari.

¹⁶ Poccadeni isso teppeppe cavaro ideza rrassi tarirraridenipa 200 milhoes (200.000.000) quenarrari.

¹⁷ Narrarope Deo Corimerrine onoccoza auato tarraro. Arra cavaroza rrassi tarirraridenipa arrama quenaha qqui onabaqquide. Pouadeni bacco cacauemanauiuarrine pperro nauatoni ccarabote carririzemanarrari. Baccodeniccape pina zippo rrororoni macconissa narraro, pina meme souenissa narraro, pina enxofre uesse tarrarissa narrari carrimanarrari. Cavaro tatidenipa pina zomarri tatissa quenarrari. Pouadeni arrarizape zippo rrororoni qquena, zippo esseni qquena, enxofre marro uaidira tarrari qquena narrari.

¹⁸ Arra cavaro arraridenicca 3 naha qquenarrari comenerrine madirra mota cacotarizarrari. Narrarope zippo rrororoni, zippo esseni, enxofre marro uaidira tarrari comenerrine.

¹⁹ Cavarocca dacorehepe pouadeni arrariza, pouadeni zoporiza narraro. Cavaro zoporidenipa pina maccassa narizemanarrari. Zoporideni cotaniza pina macca tatissa naha carrimanarrariza comene inanarizemanarraro.

²⁰ Naraha madirra zippo rrororoni, zippo esseni, enxofre marro uaidira tarrariza cacota-rrararrari motadenipa bodideni cacarriqquimera-rrararrari. Uaidirehe inanemanarrarocca nebomana-rrararrari. Arra Tocorime-Taminecca zozosse tocorimedeniza uatizede nebomana-rrararrari. Pouadeni cacauade pouamacca pina ccarara bicabote oro, prata, bronze nauatoni, siba, aua nauatoni naqui bazimape qquide ssamoqquiri, mittemanauiuarrine ssamoqquiri, rrauirizauiuarrine ssamoqquiri naraha narrariza uauatizemana narrari nebomana-rrararrari.

²¹ Madirra nanazoqquede, caribarrade, uananehe, botie naco nebomana-rrararrari.