Apocalipsis 22 - Kulina New Testament Brazil

¹ Nazapa Deocca zozosse ueni bicaui oua qqui tonanarraripa passo ssaua tarraro, tocassiuerreqquimera narraro. Narrarope passo camittehecca. Deo, Eueue Bedi pouadeni pamahacca uiuittari cauittariniza passo qquenarrarope ueni tocarrarrari.

² Narrari uenipa oza pananicca rraui nocconi motta touaccarrari. Aua camittehecca ueni inidiza arrauarri ua, rrippeuarri ua narrari. Abazico carrari carrari naha bobono narrari. Uarrano orrariaza bono carrirraripa 12 narrari. Narrari aua eppepa zama bazimacca madirra nomiqquiri naha madimana-zanapouiuarrine.

³ Narraro oza pananiuarripe uaidirehe noue, Deocca narrizoue naqui noueranitoui. Nanizape Deo, Eueue Bedi pouadeni pamahacca uiuittari cauittarinitoui. Deocca zozosse bazima pouadeni pamahaza uatizemanauitoui, rriri rriri quequenanauitoui.

⁴ Deo Poua assire qqui quenauitoui. Poua oni pocca zozosse bazima uassarideniza dozo narizanitoui. Narraro uimape Deo Poua pocca toquerrenarrari.

⁵ Nanizape zome noueranitoui. Nauiuarri madirra madimanarraridenipa rrorrororo toui, marri ssiuerrene toui quena-rrarauitoui. Ia Zozossede Deona bazimaza ssiuarra inanarizanitoui. Nazapa Deo pocca zozossedeni bazima zossede toquerrena-zanapouitoui.

Zeso Cristo ccanipomauicca uimape uarrira tani

⁶ Nazapa Deocca zozosse ouaza uati tapomarrari: —Arrirraro uimape parrissa. Uimape pina arrirrarossa nehe torranitoui. Ia Zozossede Deopa Poua Atti cacomeraqquiri narrarideniza Poua Atti inanarizaporraro. Narrari Deopa oua zosse naronarrari. Ouape pocca zozosse, pocca zozossedeniza pouadeni tezerremacca uima torrabote nanicca auato onananiuarrine occaronarraro −nade ouaza.

⁷ Ia Zozossede Zeso attipa: —Occanibote nani −narrari. —Deocca uima itezerremacca arrirraro papeoza dozo naniza ibora tarraripa occa biquehe pouaza onananitoui −nade.

⁸ Ouape Zouao, arri rridapanacca, itezerremacca Deorrine bazima ouaza auato inaneza omittarraro, qqui onarraro. Narraro rriquezape Deocca zozosse ouaza uati uati tarrari baccouarri opitoza ouittarraro, pouaza ouatizeniuarrine.

⁹ Naraha poua attipa: —Nema terrerarri. Ouape Deocca zozosse orrani. Pina tiassa, pina timecotedeni Deo Atti cacomeraqquiri narraridenissa onarraro. Arra madirra bazima arrirraro uima papeo dozo naniza iboraqquiri narraridenissa onehe Deocca zozosse orrani. Deozara tetizerri −nade.

¹⁰ Poua atti onihi naqui: —Deocca uima arrirraro papeoza dozo narrarope madirra ua ua quenauiuarrine auatoraniza tecaua terrerarri. Arrirraro uima dozo nanicca torraniuarrinepe uarrira tani.

¹¹ Narraro uima touarrirezape madirra uaidira tarrari, bodi soue tarrari naco poccadeni uaidirehe inanemanaccaniuarrine. Paparra, bodideni cacarriqquimerauiuarrine parriremana-rraraui. Naraha madirra bica tarrari, bodi uisso tarrari naco uima bicani inanemana-zanaponiuarrine bica tani −nade Deocca zozosse ouaza.

¹² Ia Zozossede Zeso attipa: —Rrehe, occanibote nani. Uima bicani inanarize-manarrarodenipa narrarossa nehe pouadeniza da onarizanitoui. Naraha uima uaidira tanicca inanarize-manarrarodenipa narrarossa nehe pouadeniza da onarizanitoui.

¹³ Ouape oua. Arrirraro zama nauatopo-rreraccazama omadiporraro. Niza zotode arrirraro zama rricaraha ouape omadi-zanaponitoui −nade Zeso.

¹⁴ Nazapa madirra pina poccadeni etero ssaua quenarrarossa naza bodideni touissorizazapa Deo pocca biquehe pouadeniza inanarizanitoui. Narraridenipa aua bono camittehecca rripemanaui bica taui. Deocca oza pananicca totoqquezimaza rraui torrezimaui naco bica taui.

¹⁵ Naraha arra madirra Zeso Cristoza parrissa quena-rrararrarideni, zoppinerre doriza dameraqquiri narrarideni, uananeheza dameraqquiri narrarideni, irrinedeni auemanarrarideni, siba nauatoniza uauatizemana narrarideni, maizeheza dameraqquiri narrarideni, poua tesse mamaizadedeni, narrarideni bazimapa Deocca oza pananiza rraui torrezima-rrarauitoui.

¹⁶ —Ouape Zeso, otauimariza titiqueriqquirizemana narrarodeniza occa zozosse memeuarricca zosse onaronarrari, narraro uima nemanehe timittemananiuarrine −nade. —Ouape maittaccazama Izarraeo potemauidenicca tamine Dabi Potemaui orrani. Ouape pina izamassacca amoua ssiuarra tocanarrarissa onarraro −nade Zeso.

¹⁷ —Nirra, ticcarronarri −quenaui Deo Corime, Eueue Bedicca amonerre tazarrani. (Narraro amonerrecca uimape Zeso Cristoza ihiqueriqqui narrarocca uima.) Madirra arrirraro uima mittemanarrarideni naco: —Rrehe, ticcarronarri −quenana. Passotoui bacco rrocorrari zede touini nazapa ccarronana, passo camittehecca manaconi rrirehe ze nauiuarrine.

¹⁸ Deorrine auatorraro itezerremacca uimape arrirraro papeoza dozo nani mittemanarrarideniza ouatti arrima onarraro: Madirrapa arrirraro uimaza uima onihi inauarini oppina tani. Uima onihi tonauaridezapa Deo pouaza uima oppina tanicca inassonarinitoui. Arrirraro papeoza dozo nanicca uima oppina tanicca pouaza torranitoui.

¹⁹ Nazama madirra ouaha itezerremacca uima arrirraro papeoza dozo nanicca mota inebozape manaco Deo pouaza aua bono camittehecca eccoccouitoui. Oza panani Zerozare Deocca naqui pouaza eccocconitoui.

²⁰ Arrirraro uima bazimape Zeso Cristo uati tarraricca. Iaza poua attipa: —Parrissa, occaniniuarrine uarrira tani −nade. Nezape ia etti: —Parrissa nema nana. Ia Zozossede Zeso ticcanirri −inarraro.

²¹ Ia Zozossede Zeso Cristo tiadeni bazimaza uima bicani inanana, onarraro. Parrissa nema nana. Peperri.