Apocalipsis 17 - Kulina New Testament Brazil

Amonerre uananehe imeni carrirrarope Deocca narrizoueza torranitoui

¹ Nazapa Deocca zozosse tabaqqui 7 quenarrari tasa carrimanarrarideni orrariapa ouauarri ccarronaza uati tarrari: —Nirra, ticcarronarri. Tiaza uima auato onanana −narrari. —Arri amonerre passo tetepiza uittarirrarope uananari. Ponicca uimasiri manaconi Deo inarrizonicca uima qqui tinaniuarrine −narrari.

² —Rrehe, zama bazimacca taminedeni poccadeni madirrama ponicca uananeheza toquerrenarizarrari. Pina noccodeni rranoqquiri nauiuarrine zeze coma tanicca ze narizemanarrarissa narraro −narrari. (Ponicca uananehecca uimape: Deoza uatideni rramemanaza deo pouamaccaza uauatizemana narrari.)

³ Nazapa Deo Corime itezerremacca uima oua qqui tonanarrari. Zama uamoni ssono carri, siba carri taniuarri Deocca zozosse oua touaccarrari. Nezape naniuarri qqui onanerre bani siri maccouiza amonerre uittarini qqui onarraro. Bani siripa tati 7, ori 10 narrari. Poua uapiza dozo nani irrirraro. Narraro dozo nanipe oppina tani, Deoza uaidira tarraro.

⁴ Bani siri ideza uittarirrarope etero bicani soueni macconi carrimani uezarraro. Mattonicca, uaribonicca, birrinicca, issonicca bazima oro nauatoni carrirraro. Siba bedeni bicabote, perola moponi oro tazarrani carrimani carrizamaro canarraro. Poni zapaniza zeze oro nauatoni zorro torrizarraro. Ponicca zezeza irrirraripa ponicca uananehecca uima. Deoza uima oppina tanicca, uaidira tanicca irrinissa tarraro. (Narraro uimape ponicca uaidirehe, deo pouamaccaza uatizerrarocca uima.)

⁵ Uassarinicca dozo nanipe imittaniuarrine ssamo inaccani. Narrarope arrima narraro: Oza panani imeni Babironiape uananehe rrinede. Ponicca marinarrarrine iboue, uaidirehe torrarizezape zama bazimaza uima torrari nazi tehe torrarizarraro.

⁶ Qqui onezape obodiza nauato onarraro: Ponipe nocconi rrano tarraro. Deocca madirra emenedeni, Zeso Cristo tauimari ecomeremaneza inarricarizemanarrari emenedeni naqui ze nezape nocconi rrano tarraro. Narraro uima qqui onezape uarro narraro.

⁷ Nazapa Deocca zozosse ouaza uati tarrari: —Nerrecotoui uarro tarraro? Arri amonerrecca uima auatora teraha tia onauattana. Arra bani siri tati 7, ori 10 narrari poua ideza amonerre uittariza eccarizarrarocca uima naqui auatora teraha tia onauattana −narrari.

⁸ —Arra bani siri qqui tinarraripa taide madiporaha rridapanapa pocca uima rricani. Naraha pouapa niza nami odini uarri taniccaza qquenaui orrariuitoui. Qquenaui nattipa coriza imeni rrororo cananiuarri poua zoqqueuicca uima inauana-zanaponitoui. Nazapa arrirraro zamacca madirra taide zama nauatoponizama camittehe carrimana-zanapouiuarrinecca papeoza onideni nouerarrarideni bani siri qqui toquenazapa bodideni uarro quenauitoui. Narrari bani siripa madiporrari, rridapanapa madi-rraraui, niza zotode canarroranipomaza madirra inarraborreribaqquiuitoui −narrari Deocca zozosse ouaza.

⁹ Nazapa denima uati uati tarrari: —Arrirraro uima timittanissa taniuarrine narro tani. Deocca touattehe carrirrarina mittauitoui −narrari. —Arra bani siri tati 7 narraricca uimape ssono 7 narraroza amonerre uittarirraro. Tati 7 narraricca uima onihi naqui tamine 7 quenarrari.

¹⁰ Narrari taminedeni mota 5 quenarraridenicca cacauehepe rricaporraro. Ouahapa rridapana zama cacauade torraccaui. Ouahapa niza zotode zama cacauade torrauitoui. Naraha narrari tamine zama ecauarizezape uarrano uapi tarrarauitoui.

¹¹ Bani siri taide madiporaha rridapana noueraccarraripa tamine 8 nauicca torrauitoui. (Cariua attizape: oitavo, quenarrari.) Tamine 7 quenarrarideniza carrimaporaha niza zotode tamine 8 nauicca torrazapa coriza imeni rrororo cananiuarri poua zoqqueuicca uima inauana-zanaponitoui.

¹² —Bani siri ori 10 naha qqui tinaporraripa tamine 10 quenarraricca uima. Narraridenicca cacauehepe noueraccani. Niza zotode bani siri tezerre zossehe carrimanazapa marri orrariara zossede toquerrenauitoui.

¹³ Nazapa tamine 10 quenarrarideni poccadeni dacorehe, poccadeni cacauehepe bani siriza inanemananiuarrine rrehe canirere canauitoui.

¹⁴ Narraridenina poccadeni madirrama Eueue Bediza rrazire imeni inanemananitoui. Naraha Eueue Bedipa dacorehe deni torranicca carrirrarirrine inarricauitoui. Pouaza toquerrenarraridenipa Deo icatterriza-baqquirrari. Pouaza dameraqquiri narrari. Tamine uapi taraha Eueue Bedi Zesopa bazimacca tamine deni torrauicca orrarirrari. Madirra zozosse totonanadedeni naco uapi taraha pouapa bazima Zozossededeni deni torrarrari −narrari.

¹⁵ Nazapa Deocca zozosse denima oua mari canarrari. Poua attipa: —Arri passo qqui tinarraro tetepiza amonerre uananari uittari canarrarocca uimape madirra uapideni onihi onihi carririzemanarrarideni, madirra ouaha ouaha narizemanarrarideni, touatti onihi onihi carririzemanarrarideni, zama onihi onihiza madirizemanarraridenicca uima narraro.

¹⁶ Nazama bani siripa poua ori tamine 10 quenarrarideni tezerre amonerre uananari ettarromananitoui. Ponicca etero ssiti quenezape ccororrani inebomananitoui. Poni imani naqui rripemanauitoui, zippoza coro izanemanezape ono torranitoui.

¹⁷ Tamine 10 quenarraripa ssamoqquiri naraha Deo Poua nacassa tauicca inanemananiuarrine, bodideni inanarrorabaqquirrari. Pouadenipa: “Bani sirina deni torraui orrari nana” quenaza rrehe canirere canarrari. Nazapa bani sirizara iboraqquiri zanapomanarraria Deo Poua uati taporraricca uima rricani bacco toquenauitoui.

¹⁸ Nazama amonerre uananari qqui tinarrarope oza panani imenicca uima. Narraro oza pananipe zama onihi onihi narizarrarocca taminedeniza zossede torrarraro −narrari Deocca zozosse ouaza.