Apocalipsis 13 - Kulina New Testament Brazil

Bani siri rrizabote ueni imehiza qquemorarrari

¹ Ocattoma cananarra bani siri imehi rrizabote ueni imehiza qquemorarrari. Tati 7, ori 10 naha carrirrari. Ori bazimaza tamine tatidenicca uittaririzarrari. Bani siri tati bazima toni uaidira tanicca dozo narizarraro. Tonipe Deoza ocassera tani. Pina Deo oniza tatamasso narrarissa narraro.

² Bani siri rrizabote qqui onazapa assire pina zomarri rrano potauissa naraha amoripa pina bani siri imehi urso amorissa narrari. Poua arrari naco pina zomarri uauade arrarissa narrari. Daragao imehibotepa bani siri rrizaboteza pocca dacorehe da inarraro. Pocca uiuittari bicabote naqui pouaza da icanarraro. Narraroza uittariza zossehe dacoraniccaza zossede torrauiuarrine daragao imehibotecca zossehe bani siri rrizaboteza da inarraro.

³ Bani siri rrizabote tati 7 naraha tati orrariepe biqueraza pina zoqquerrarossa narraro. Naraha berori ccaqquinizape camittemanirraro. Nazapa zama bazimacca madirra uarro canireza pouatoui dameraqquiri narrari.

⁴ Daragao imehiboteza uatizemanarrari, arra bani siri rrizaboteza pocca zossehe da inarrarorrine. Bani siri rrizaboteza naco uatizemanarrari. Pouadeni attipa: —Bani siri rrizabotepa dacorarrari. Pina arra pouassa narrari noueraui. Nerrecorrarina pouaza ssonariza deni torrauiuarrine parrireui? −quenarrari.

⁵ Bani siri rrizabotepa Deoza tatamasso nazapa: —Deo noueraui, ouana bazimaza deni orrani orrari onani −nanarra narrari. Naraha Deopa bani siri rrizabote zossede torrauiuarrine ecossa-rreraccarraro. Abazico 42 canaha zossede torraccarrari.

⁶ Nazapa atti uaidira taza Deoza atti atti zanaporrari. Deo oni arrimani inanarraro. —Deocca mamadi uaidira tani −nanarra narrari. Memeuarri madimanarrarideniza naco tatamasso narrari.

⁷ Nazapa bani siri rrizabotecca uima uacossa-rrerezape Deoza toquerrenarrarideni tezerre cauadiremana-zanaporrari. Deni torrazapa motapa inarricarizarrari. Nazapa madirra uapideni onihi onihi carririzemanarrarideni, touatti onihi onihi carririzemanarrarideni, zama onihi onihiza madirizemanarrarideni naco bani siri rrizabote pouana zosse zosse narrari.

⁸ Arrirraro namiza madirizemanarrarideni camittehe carrimana-zanapouiuarrinecca papeoza onideni dozo nani nouerarraripa bani siri rrizabotezara uatizerize-manarrari. Narraro papeo dozo nanipe zama nauatoponizama Eueue Bedi Zeso pouana ecauarraro. Pouana camittehe issiuauanicca icarririzaniuarrine zoqquerrari.

⁹ Teribodeni ticarrimanezape ouatti timittemananissa tarri. Bani siri rrizabote tamine torrazapa Deocca madirra arrama quenauitoui:

¹⁰ Deocca madirra toponi cocoroza ua tozimauiuarrinepa itadamemanaza ua tozimauitoui. Deocca madirra uauarrinaza itauarrinemanauiuarrine naco uauarrinaza rricauitoui. Narraro uima torrezape Deocca madirrapa arrama quenauitoui: Oppinani ahauemana naraha Deocca dacorehema mouaraza ihinauanemana nanitoui. Ocasserani ahauemana naraha Deoza rrehe quenaui nebomana-rrarauitoui.

Bani siri ouaha namiza qquenarrari

¹¹ Qqui onapomanarra bani siri ouaha namiza qquenarrari. Ori pamarrari, pina eueue bedi orissa narrari. Naraha poua attipa pina daragao imehibote attissa narrari.

¹² Pouapa taidecca bani siri rrizabotecca zossehe carrirrari. Nazapa namiuarri zossede torraza arra taidecca bani siripa cattade uarrari. Nazapa bani siri zotodeccana namiza madirizemanarrarideni bazima taidecca bani siriza uatizemanauiuarrine icazossebaqquirrari. Arra pouaza uatizemanarraripa tati biqueraza zoqqueraha bero ccaqquiniza camittemanirrari.

¹³ Bani siri zotodecca naco canauatori canarrari. Pouarrine memeuarri rrororoni ccaroneza namiza bacco naronarraro. Madirra bazima qqui toquenarrari.

¹⁴ Namiuarricca madirra icamaizabaqquiuissa tarrari. Taidecca bani siri rrizabote cattade uauiuarri canauatoriri canaza madirra bazima pocca maizeheza parrissa quenarrari. Pouadeni icazossebaqquizapa taidecca bani siri rrizabote corime sibaza inauatomanarraro. Narrari bani siripa massito rrazireccaza uatidiporaha camitta tauiparranarrari.

¹⁵ Naraha bani siri zotodeccaza dacorehe da inezape taidecca bani siri corime camitta inanarrari. Camittemanizana atti carrizapa poua corimeza uatizemana-rrararrarideni bazimapa rricarizauiuarrine icazossebaqquirrari.

¹⁶ Nazapa bani siri zotodeccana denima uima inanarraro. Madirra bazima taidecca bani siricca nanarranoza inarranorizauiuarrine icazossebaqquirrari. Erredeni, rradaui, zepe sseqquiri narrarideni, cappiremanarrarideni, madirracca zozosse toquerrena-rrararrarideni, madirracca zozosse toquerrenarrarideni bazima inarranorizarrari. Motapa zepedeni nauatoniuarri inarranoriza, motapa uassarideniza inarranoriza narrari.

¹⁷ Arra bani siri rrizabotecca nanarrano madirra motapa poua oni dozo nani carririzemanarrari. Motapa poua onicca numero dozo nani carririzemanarrari. Madirra pocca nanarrano cappiremanazapa mitta quenauiuarrine ssamo, da iquenauiuarrine ssamo tanitoui.

¹⁸ Arrirraro uima nauatoqquiri tiquenaniuarrinepe madirra Deocca nauatoue carrirrari bodi nauato tarrarina bani siri rrizabotecca numero inatassaqquina. Pocca numerope madirradenicca. Narraro numerope 666 narraro.