Apocalipsis 10 - Kulina New Testament Brazil

Deocca zozossepa papeo bedeni zorro torrizarrari

¹ Nazapa memeuarri qqui onanarra Deocca zozosse dacorabote ouaha meme essenima carrimaha ccaronarrari. Poua tatiza meme rranoni porimacossanissa narraro carrirrari. Panopa pina marri ssiuerrenessa narrari. Issopa pina zippo rrororoni pamarrarossa narraro.

² Poua zepeza papeo pico naqquini bedeni zorro irrizarraro. Poua amori nauatoniccape passo imeni tetepiza cauari, amori ssamouarriccape namiza caua neza uarrari.

³ Rrazirema rroua nazapa poua atti mouini pina zomarri uauade uaua narrari mouissa narraro. Arra poua rroua nanarra ttottorode 7 nehe tomouirizezape attinideni omittarraro.

⁴ Ttottorode attini rriquezape attinideni dozo onanitouiraha memeuarricca atti omittarraro. Arrama narrari: —Ttottorode attini timittarrarope tia motta tibodiza tecauarri. Dozo terrerarri −narrari.

⁵ Naraha arra passo tetepiza amori cauari, namiza amori caua naza uarraripa parrissehera uati tauiuarrine poua zepe nauatonicca memeuarri da icanarraro.

⁶ —Arri uati onarrarope Deo Poua onima parrissehera uati onarraro. Deopa nazama madirronarrari. Meme inauato, nami inauato, passo imeni inauato narraro. Arra Deo Poua inauatorizarraroza madirizemanarrari naco Deo Poua inauatorizarrari. Ouattipe parrissa: Uima rricaniuarrinepe narro-rreranitoui.

⁷ Deocca zozosse memeuarricca rricariuicca rrori rrori nazapa Deocca uima arrirraro zamacca madirraza auato inanapo-rreraccarraro auato inananitoui. Narraro uimape Deona Poua Atti cacomeraqquiri narrarideni mari icanabaqquiporrari −narrari.

⁸ Arra memeuarri atti omittaporrari ouaza uati tapomarrari: —Rrari, passo imeni tetepiza amori cauari, namiza amori caua narrariza ticcarri. Poua zepecca papeo pico naqquini touabarraro tidirri −narrari.

⁹ Nezape Deocca zozosseuarri occarraro. Papeo pico naqquini bedenitoui pouaza uati onarraro. Nazapa ouaza uati tarrari: —Arra, arrirraro papeo tirriparri. Terrerizape marrida tarraro. Pina rrizi oquinessa nanitoui. Neraha tizonezana bida tanitoui −narrari.

¹⁰ Nezape Deocca zozosse memeuarricca zepecca papeo pico naqquini bedeni odiza orriparraro. Ouarrarizape marrida tarraro. Pina rrizi oquinessa neraha ouizonezana tobidani narraro.

¹¹ Nazapa ouaza arrama narrari: —Madirra bazimaza, arra zama onihi onihiza madirizemanarrarideniza, touatti onihi onihi carririzemanarrarideniza, taminedeniza naqui Deo pouadeniza inananiuarrine tauimari uati tinarizapomarri −narrari.