2 Zouao 1 - Kulina New Testament Brazil

Deocca parrissehe icarrizape eti cauanerara canarraroparri

¹ Nirra ouimecotedeni? Ouape Zesoza rrehe quenarrarideni cacauade orrani. Deo Attiza titiqueriqqui narrarodeni bazima Deocca tocatterrizabaqquinarra tiquerrenarraro. Deocca parrisseheza iquerrenarrarorrine tiadeniza ouati uana tarraro. Oua orrari onerrerani, arri ia bazima Deocca parrisseheza nauatoqquiri inarrarope tiadeniza eti uanaqquiri narraroparri.

² Deocca parrissehe ibodiza anirrarorrinea tiadeniza eti uanaqquiri narraroparri. Pocca parrissehe ibodiza anizanaponitoui.

³ Abi Deo, Poua Bedi Zeso Cristo tezerre tiadeniza uima bicani inanana. Poccadeni touati uanehe, poccadeni rronehe naqui tiadeniza inanarizana, onarraro. Nezape Deocca parrisseheza timadimanezape timecotedeniza tetideni uanaqquiri nehe timadimananiuarrine.

⁴ Ticcadeni madirra mota Deocca parrisseheza madimanauissa taui qqui onezape ouatizerraro. Poccadeni uima nema nezape pina Abi Deo ia tocazossebaqquirrarissa quenarrari.

⁵ Ouimecotedeni, titouideni ouati uana tani. Rridapanape tiadeniza uati onana, ouattissa tinanemananiuarrine: Ia bazimape eti cauanerara canana, onarraro. Narraro marinarrape zati rrerani, arri Zeso Cristocca uima icauatterapozama narraro marinarra imittapode.

⁶ Touati uanehepe arrima narrarona parri: Pina Deocca zossenirri uapimassa inanarizarrarona parri. Deo pocca zossenirri timittemanapozama pocca touati uanehema timadiriza-manarri.

Maizehe mamaridedenicca uima

⁷ Naraha arrirraro zamazape mamaizade carri tarizaui. Pouadenipa: —Zeso Cristo Deoza madiporraripa pina madirrassa naha tossona-rraraui −quenarrari. Madirra nama narraripa mamaizade torrarrari. Narraripa Cristoza uadi tarrari.

⁸ Parri, mamaizadedenipa tiadeni tocamaizabaqqui-manarana. Poccadeni uimaza parrissa tiquenezape arri Deoza tizepedeni irrimanarrarocca manaconipe pocca danirri bica tanicca ticarrimana-rrererana, onarraro. Naraha pina Zeso Cristocca marinarrassa narraro uima bicanira tinanarizemanazana niza Deoza tizepedeni irrimanarrarocca manaconipe Deocca danirri bica tanicca tiadeniza torranissa tanitoui.

⁹ Naraha madirra: —Iape denima nauatoqquiri inani −quenarraridenipa Zeso Cristocca marinarraza poccadeni uima inauarimana tani. Zeso Cristocca marinarra nebomanazapa pouadeni bodiza Deo madiza-rraraui. Naraha madirra Zeso Cristocca marinarrassa inanemana-zanapozapa pouadeni bodiza Deo madizarrari, Poua Bedi naco pouadeni bodiza madizarrari.

¹⁰ Nazama tiadeniuarri madirra bacco narronaza marinarra onihi pina Zeso Cristocca marinarrassa nerrerarraro mari mari nazapa pouaza: —Nirra, bica tinaqui? −tiquenerrerarri. —Occa ozaza tiqquezimarri −tiquenerrerarri.

¹¹ Arra madirra nama narrariza: —Nirra, tiqquezimarri −tiquenezape pina poua acco ticanemanarrarissa tiquenarraro. Pocca uaidireheza naqui ticarrimemanarraro

—Tiadeni qquide occana −narrari Zouao

¹² Uima onihi onihi tiadeniza dozo onanitouiraha arrirraro uima teppeza dozo onerrerani, onarraro. Niza tiadeni qquide occana, onarraro. Nazana tiadeni qqui onabaqquizana occa uima tiadeniza uati onanitoui. Nazana icatizerara cananitoui, onarraro.

¹³ Timecotedeni arrauarricca Deo Attiza totoqueriqqui narrarideni, pina tiadenissa quenarrari Deocca tocatterrizabaqquinarra toquerrenarrari tiadeniza nirra quenarrari. Peperri.