2 Timoti 4 - Kulina New Testament Brazil

¹ Rrehe Timoti, Zeso Cristo ccanipomaza tamine torrazapa madirra bazima ecauabaqquiuitoui. Nazama camittaqquiri narraridenicca uima icattema, rriquemanaporraridenicca uima icattema nauitoui. Nama nazapa Deo, Zeso Cristo tezerre ouatti nauatoto taza tia ocazosserraro:

² Deo Atti mari mari tarizarri. Uarrirriraza maride tirrarizaniuarrine tibodi titinarrorapo narri. Madirra Deo Atti mittade nacassaqquiri nazapa mari ticanabaqquina. Nacasseraqquiri naza naco nama naha mari ticanabaqquina. Madirra uima tonanaza naco mouaraza uati ticanauissa tarro: —Uima tinanarraroza peperri tarri −tana. Madirra poua bodi cacarriqquimerauiuarrine naco mari ticanarro, uima bicani touira poua bodi uatouiuarrine. Touattauiuarrine narro taza naco nama naha mouaraza mari ticanarro.

³ Naraha niza zotodepe marinarra bicani touini quena-rrarazapa mittemana-rrarauitoui. Madirrapa pouadeni touini quenauiccara mittemanauiuarrine mamaride ouahatoui narizemanazapa pouadeni maride inauapimanauitoui. Naraha mamaridedenipa poccadeni mamari tabaqqui uatizemanauiuarrinera mari mari ihicanabaqqui nauitoui.

⁴ Marinarra parrissehecca inebomanezape uima ponimaccara mittemanauiuarrine touini quenauitoui.

⁵ Naraha tibodi uatonissa zanaponiuarrine daco tirrirarri. Ocasserehe tiaza ssonariza naqui nema nehe tinauanarri. Zeso Cristo tauimari icassiuaueraniuarrinecca madirra bazimaza tecomerarizaniuarrine damera tinarri. Ia Zozossede Deo pocca zosseheza tizepe irriza naqui tinaparrirenissa tarri, onarraro.

⁶ Naraha ouape arrirraro nami onebobote nani. Ozoqquenicca uada touarrirarronani. Occa zoqquehepe pina occa danirri Deoza da onarrarossa naniuarrine onarrorani.

⁷ Deo Pouaza ozepe irrirrarope pina madirra ittomeza taide bacco nauarraniuiuarrine rroppade damera tarrarissa onarraro. Rrassi onerrereza damera onarraro. Deo oua cazosserrari onarricanissa tarraro. Zeso Cristo tauimariza rrehe onarraro onebo-rrereza narrarozara damera ozanaporraro.

⁸ Nazama pina rrorroppade taide bacco nauarranipoza manaconi bicabote pouaza da iquenarrarissa narraro naqui Deo pocca danirri bicani ouaza da inanitoui. Narraro danirripe Deoza bicaqquiri narrarideniza torranitoui. Niza ia Zozossede Zeso Cristopa uima cattemade parrireuissa tarrari poua baccouarri idomo uezape Deo pocca danirri ouaza da inanitoui. Ouaza da inarrarope ouaza orrari-rreranitoui. Pouaza uatideni uanaqquiri narrari, poua ccaniuitouira narroremanarrarideni bazimaza da inarizanitoui.

Paoro Timotiza uaua narrari, pocca etero, pocca papeo eccarronaniuarrine

⁹ Rrehe Timoti, tinarro-rrereza oua qquide uassinarra ticcarronarri.

¹⁰ Otessedeni ouaza madimanaraha Cresetepa zama arobeni Carasiauarri toccarrari. Otesse Tito naco zama arobeni Daomasiauarri toccarrari. Demapa otesseraha arrirraro namicca uima touini naza oua nebozapa oza panani Tesaronicauarri toccarrari.

¹¹ Otesse orraria Rocana ouaza orrari narrari. Nazapa itesse Maraco qqui taza teccarronarro, onarraro. Pouapa Deoza ozepe irriza oua acco canauiuarrine bica taui.

¹² Otesse Tiquicopa oza panani Epesouarri zosse onarrari.

¹³ Ticcarronezape occa etero motaranicca ssiriniuarrine zorro tarronana. Nani oza panani Troadeuarri otesse Caopocca ozaza onebode. Rrehe, occa papeo naqui touini onani uapima teccarronarri, onarraro. Arra bani eteroza dozo nani pico zaniuiccana denima touini onani, onarraro.

¹⁴ Arra pperroza zepe ihirride onipa Aresadre ouaza uaidirehe imeni inanarraro. Naraha ouattipe: Peperri, poua uaidirehe inanarraro manaconipe Deona pouaza inananitoui, onarraro.

¹⁵ Pouapa icca marinarraza nacassera taza uacossaniuarrine damera taui. Parri, tiaza naco nama narana, onarraro.

¹⁶ Taide arri oza panani Rromauarri bacco onarronaponipe occa uima cattemaniuarrine uima cacattemade baccodeniuarri oueza otessedeni bazima oua acco icanemana-rrerade. Oua inebomanezape oua accode nouerade. Naraha ouape pouadeniza ouadi-rrerarraro. Oua inebomanarraro manaconi Deo pouadeni inarrizobaqquina onerrerani.

¹⁷ Otessedenipa oua acco icanemana-rrereraha oua Zozossedepa Zeso Cristo oua nebo-rrararrari. Pina ouinoriza uarrarissa naza pocca dacorehema oua tonadacorazapa poua tauimari icassiuaueraniuarrinecca zodeo querrena-rrararrarideni bazimaza ouacomeranissa tarrarode. Rrehe, ozoqquebote naraha Deo oua idinirrari. Pina zomarri arrariza oua idineza oua tonassiuauarrarissa narrarode.

¹⁸ Nezape obodiza arrima onarraro: Uaidirehe bazimaza oua Zozossede Zeso Cristona oua tonassiuauauitoui. Pocca cacauehe memeuarriccaza bacco onaniuarrine oua cacauauissa tauitoui, ohonanarraro. Uarrirriraza ettipe: —Tiape bica tinani! Deni tirrani! −ihizanapo nana, onarraro. Parrissa nema nana.

Paorocca uima rricanicca

¹⁹ Rrehe Timoti, otesse Prisiraza, ponicca maqqui Aquiraza naqui nirra onarraro. Otesse Onesiporoza, pocca madirraza naco nirra onarraro.

²⁰ Otesse Erastopa oza panani Corintoza ibode. Otesse Trofimopa coma taza oza panani Miretoza oneborraride.

²¹ Rrehe Timoti, arriuarri ticcarronaniuarrine tinarro terrerarri. Zazarrade bacco terrerezama ticcarronani bica tani. Arrauarri madimanarrarideni Eoboro, Podete, Rino, Cláudia, imecotedeni bazima naco tiaza nirra quenarrari.

²² Rrehe Timoti, ia Zozossede Zeso Cristo tiaza madizanapona. Deo tiadeni bazimaza uima bicani inanana, onarraro. Peperri.