2 Pedoro 3 - Kulina New Testament Brazil

Ia Zozossede Zeso Cristo ccanipomaui tauimari

¹ Rrehe ouimecotedeni, titouideni ouati uana tani. Arrirraro occa uima teppepe pina taideccassa narraro, tiadeni acco ocanabaqquiniuarrine touini oneza. Ouattiza tibodideni uatonissa taniuarrine oneza dozo onapomarraro.

² Arri maittaccazama Deo Atti cacomeraqquiri narrarideni uati toquenaporraricca naqui tibodideni uatome-manarri. Arra ia Zozossede, ia Tonassiuauade Zeso Cristocca zossenirripe pocca zozosse tabaqqui ia tiadeniza ecomerarraro naqui tibodideni uatome-manarri, onarraro.

³ Taidepe arrirraro uima tetideni rrima terrerarri: Zama rricani touarrirarronezape madirra uaidira taniccaza dameraqquiri narrarideni bacco quenauitoui. Narraridenipa pouadeni attiza tiadeni touattarro-baqquimanauitoui.

⁴ Attideni ocassera taza arrama quenauitoui: —Zeso Cristo poua ccanipomauicca uima uati uati taporaha arrana ccanico? Ccani-rraraui. Arrina, zama nauatoponizama icca idideni rricarronarra narronapoui naui. Zamape rricaniuarrine ssamo tani. Nema zanaponitoui –quenauitoui.

⁵ Madirra attideni nama quenarraridenipa ssamoqquiri narrari. Maittaccazama meme, nami Deo inauatoporraro tauimarini bodideni uatome-manauiuarrine nacasseraqquiri narrari. Deopa Poua Attiza: —Passo, titassaqquinirri nami auatoniuarrine −nazapa nama naraha parrissa quena-rrararrari.

⁶ Zotode naqui Deo Pouarrine passo ppanimazapa zamaza madimanaporrari bazima rre tocanireza rricarrari.

⁷ Naraha rridapana arri qqui inarraro meme, namipe Deocca zossenirriza rrororonirrine dirri tehe rricanitoui. Narraro narrizouepe Deo Poua ecauaccani. Niza madirra bazimacca uima cattemaniuarrinecca uada bacco tezana Deo Pouaza iboqquiri narrarideni inarrizobaqquizapa meme, nami naqui dirri tehe rricanitoui.

⁸ Rrehe ouimecotedeni, tiadeniza ouati uana tani. Arrirraro uima naqui tetideni rrima terrerarri: Deozapa uarrano 1.000 (mil) nahapa pina uada orrariessa narraro. Uada orrarie naqui pina uarrano 1.000 (mil) ssa narrari.

⁹ Ia Zozossede Deopa nama naraha madirra mota attidenipa: —Deo Poua uati taporrarissa inananiuarrine narro taui. Arrana, Zeso Cristo ccaniuicca uada tonarroni −quenarrari. Naraha Deopa narro-rraraui. Mouaraza titouideni madiccarrari. Pouapa madirra bazima parra rricariuiuarrine touini narraraui. Orraria zoqqueuiuarrine naco nacassera tarrari. Pouapa madirra bazima bodideni cacarriqquimeraza Pouaza toquerrenauiuarrine touini narrari.

¹⁰ Naraha ia Zozossede Zeso ccanipomauicca uada parrissa bacco tezape pina bobotide icca ozaza amazati bacco naza uarro inarrarossa nanitoui. Mouini oppinabote dacorehema tomouizape meme amossi nanitoui. Memeuarricca marri, abazico, amouadeni naco dirri tarizaha rricauitoui. Zama nemanehe narrizoue torrezape poniza anirizarrari bazima dirri tarizaha rricazapa amossiuarrauissa tauitoui.

¹¹ Nazama meme, nami rricani tauimarini timittemanezape nerrecoma tiquenani bica tani? Arri narrizoue tiadeniza torra-rreraniuarrinepe Deozara ibobora tineza uimasiri rrirehe timadimananissa tarri, onarraro.

¹² Rrehe, ia Zozossede Deo ccanipomauicca uada bacco taniuarrine touini tiquenezape narraro uada tonarrozanapo-rreraniuarrine Deozara tizepedeni irrimanazanaporri. Deo zama inarricanicca uada bacco tezape rrororoni ppocoraboterrine memeuarricca marri, abazico, amouadeni naco bazima dirri tarizaza sseuemazapa amossiuarra-rizauitoui.

¹³ Naraha ia Deo pocca madirra iquerrenarrarope Deo Poua uati taporraricca meme zati bicani, nami zati bicani touini inarrorehe imadirraro. Narraro zama zatizape madirra bicaqquiri narraridenira uimasiri rriraha madimanauissa tauitoui.

¹⁴ Ouimecotedeni, titouideni ouati uana tani. Narraro uima bazima torranitoui timadimanaqquezape Deocca rroneheza timadimana, uimasiri rrirehe timadimana naniuarrine dameraqquiri tiquenarri. Nezape Deo baccouarri tidomo ueza bicaqquiri, uissoqquiri tiquenehe tiadeni qqui tabaqquiuiuarrine.

¹⁵ Tetideni rrima terrerarri: Ia Zozossede Deopa icassiuaueraniuarrine touini naza mouaraza itoui madiccarrari. Narraro uimape imecote bicaui Paoro naco Deorrine nauatoue carriza tiadeniza dozo inapode.

¹⁶ Paoropa pocca uima teppe bazimaza narraro uima dozo inarizaporraro. Pocca dozonirri motape imitteraha motape imittaniuarrine narro tani. Narrarorrine Deoza ssamoqquiri narrarideni, arra rrehenirrirideni rrapari tarrarodeni naco Paorocca marinarra mittemanauissa tarrarazapa pouadenirrine torrizarraro. Arri Deo Atti dozo nanicca naqui narrarossa inanemanarraro. Pouadenirrine marinarra bicani torrizarrarorrine Deo inarrizobaqquiuitoui.

Pedorocca marinarra rricanicca

¹⁷ Ouimecotedeni, titouideni ouati uana tani. Rridapanape narraro uima nauatoto tinani. Narraro uima torra-rreraqquezama tetideni uatomanehe timadimanarri. Nema tiquenerrerezape arra uaidirehe totonanadedeni poccadeni maizeheza tiadeni rroca tanibaqquimanarana. Deoza rrehe tiquenanissa tarraro dacoreraha tissonirrizemanerana.

¹⁸ Naraha ia Zozossede, ia Tonassiuauade Zeso Cristoza tinoccodeni torrizeranissa taniuarrinepe dameraqquiri tizanapomanarri. Pocca touati uaneheza ticcadeni madie tobica-zanaporri. Rridapana, zotode naqui pouaza etizeza: —Bica tinani! Deni tirrani! −ihizanapo nana, onarraro. Parrissa nema nana. Peperri.