2 Corintodeniza 4 - Kulina New Testament Brazil

Paorodenipa Zeso Cristo tauimari ponira mari mari quenarrari

¹ Nazama Deopa iaza uati uana taza Pouaza izepe irriniuarrine iaza inanarraro. Narrarorrine ehetize nezape: —Peperri, ineboqquina −inerrerani.

² Icca marinarra parrirenissa tezape icappinaniuarrine nouerani. Auatoraniza uima inana-rrerani. Maizehe mari mari inerrerani. Nema naniccape ettarrorraro. Icca mamari tabaqqui icamaizabaqqui-rraraui. Irrine Deo Atti torriza-rrerani. Nouerani. Deopa ia qqui tabaqquiui. Parrissehera uati uati inarraro nauato taui. Narrarorrinea madirra bazima iaza: —Maizeraqquiri naui –quenarrari.

³ Arri Zeso Cristo tauimari icassiuaueraniuarrinecca ecomerarizarrarope auato teraha madirra mota tocassiuauera-rrararraridenizape auatora tarraro. Pouadeniza pina zizi tarrarossa narraro.

⁴ Narrarideni Zesoza rrehe quena-rrararraripa arrirraro zamacca zozossede Tocorime-Tamine bodideni ecossabaqqui-zanaporrari. Nama quenazapa Zeso Cristo tauimari icassiuaueraniuarrinecca bodideniza tossiuarra-rrerarraro. Cristo bicabote, ssiuarra taui, Imehi Deossa narrari tauimari mari mari inarraro mittemana-rrararrari.

⁵ Iape icca uima ehecomera nerrerani. Ia Zozossede Zeso Cristo poua tauimarina ehecomera narraro. Pouaza eti uanaqquiri naza tiadeni acco icanabaqquiniuarrine imadirraro.

⁶ Deopa zama inauatopozama uati tarrari: —Ziziniza ssiuarrani tossiuarrarizana −napozapa ssiuarrani tossiuarrabaqquirraro. Ibodiza naqui Poua ssiuerrene inanarraro, pocca biquehe, pocca deni torrehe nauatoqquiri inaniuarrine. Narraro pocca biquehe, pocca deni torrehepe Zeso Cristo pouaza auato tarraro.

Ocasserani eraha Zeso Cristoza rrehe izanaporraro

⁷ Deopa arrirraro uima bicani iaza inanarrarope pina tozepetarri uatini ccara tanicca zipa ssiqui nepi naniza ua izarrarossa narraro. Iape pina zipassa inarraro. Essirepe zoqqueqque tanicca, dacora-rrerani. Nema inezape madirra uapimaza auato tarraro: Deocca deni torrehe, pocca dacorehepe Poua pocca. Icca rrerani.

⁸ Nema nezape uima onihi, onihi iaza ssonariraha iedima-rrerani. Uima onihirrine ibodi uatoto caneraha —Cristoza peperri inana −inerrerani.

⁹ Ia tonarrizo-baqquimanaraha Deopa ia nebo-rrararrari. Ia tonarrica-baqquimanauiuarrine uauacca iquerreneraha ia tonarrica-baqquimanauiuarrine parriremana-rrararrari.

^10-11 Arriuarri rrauirra, arriuarri rrauirra narizeza narrizoue oppina tanicca inauanarrarope pina Cristo narrizoue inauanarrarossa narraro inauanani bazima qqui toquenarrari. Pouaza iquerrenarrarorrine zoqquehe iaza uarrira uarrira narizarraro. Nema inarrarope essire zoqqueqque taniccaza Zeso Cristocca madie auato inanarraro.

¹² Nezape narrizoue iaza ssonariza izoqquebote izoqquebote narizeraha nema nehe izepe irrirrarorrine tiadenipe camittehe ticarrimananitoui.

¹³ Arri Deo Atti dozo nanizape arrima narraro: —Deoza parrissa onarrarorrine pocca uima uati uati onarraro −naporrari tamine Dabi. Narrarossa inarrarope Deoza parrissa ineza pocca marinarra zati ecomerarizarraro.

¹⁴ Ibodiza nauatoto inarraro: Deo ia Zozossede Zeso inauatonirraripa ia Zesoza rrehe inarrarodeni ia tonauatonibaqquiuitoui. Zotode naco tiadeni, ia, bazima Poua madiuiuarri ia touaccamacossani-baqquiuitoui.

¹⁵ Arri ocasserani inauanarraro bazimape ponima rrerani. Tiadeniza uima bicani torraniuarrinena inauanarizarraro. Nezape tiadeniza, madirra ouahadeniza naqui Deocca touati uanehe torrarizeza madirra uapi taha Deoza: —Rrehe Abi Deo, tirrine bica tani −quenauitoui. Pocca deni torrehe, pocca biquehe naqui qqui toquenauitoui.

¹⁶ Narrarorrinea ehetize nezape: —Peperri, ineboqquina −inerrerani. Iape rradaui iquerrenarronarraro. Essire torrapariraha ibodina uarrirriraza todacorani zanaporraro.

¹⁷ Arrirraro namiza ocasserani errarope bazira tani, rricaca tani. Naraha narrarorrine Deocca biquehe, pocca deni torrehe rricaquera tanicca denima denima iaza torrazanaponitoui.

¹⁸ Nezape inoccoza qqui inarrarocca, essireza inauanarrarocca touira ibodi uauatomacca nerrerani. Nema naniccape rricanitoui. Naraha qqui inerreranicca, zotode torraniuarrineccape rriquerreranitoui. Narraro touira imadirraro.