2 Corintodeniza 2 - Kulina New Testament Brazil

¹ Rrehe, tiadeni orri onanabaqquiniuarrine nacassera onezape: Peperri! Tiadeniuarri occapoma-rreraccana, onarrarode.

² Orrine orri orri tiquenezape nerrecorraridenina oua inauatizemanapazerre? Nouerauitoui. Tirrinedenina ohouatize narraro.

³ Narrarorrine tiadeniza occa uima teppe zosse onarrarode. Nani oqquerrerana onarrarope tirrinedeni orri onaniuarrine nacassera oneza. Tirrinedeni ouatizeniuarrinena bica tani. Nauato onani: ouatizezape tiadeni naqui tetizemananitoui.

⁴ Naraha occa uima teppe dozode orreza titouideni obodi uatoto canezape: Nerrecoma quenaui? ohonanade. Obodi ocassera teza orri onade. Naraha occa uima teppe tiadeniza dozo onarrarope orri tiquenaniuarrine rrerani. Titouideni ouati uana tani nauatoqquiri tiquenaniuarrinena dozo onarrarode.

—Uima tonanarraricca uimaza: “Peperri, eti rrimani” tiquenana −narrari Paoro

⁵ Nazama titiqueriqquimana nanicca orrariapa oua orri tonanarraride. Ouaha orri onani orrari-rrerani. Tiadeni naqui pouarrine orri tiquenade. Naraha narraro orriepe imeni rrerani. Orrine uima denima torraniuarrine nacassera onani.

⁶ Arra tiadeni mota pocca uimarrine uati ticanaqquimanarraripa peperriua. Naniza rricana, onarraro.

⁷ Rridapanape pocca uimaza: —Peperri, eti rrimani −tiquenana. Nazapa poua bodi acco ticanemanarro, onarraro. Bodi ocassera taza madi-rrarana.

⁸ Nezape ouatti bica teza tiadeniza uati onana, ouattissa tinanemananiuarrine. Pouaza tetideni uanaqquiri nani auato tinanemanapomana, onarraro.

⁹ Narraro uimatoui taide tiadeniza dozo onaporrarode ouattiza iboraqquiri naco oneza. Nauato onaniuarrine tiadeni nattome onabaqquide.

¹⁰ Rrehe, nezape narraricca uimaza, madirra ouahacca uimaza naqui: —Peperri, eti rrimani −tiquenezape oua naqui poccadeni uimaza: —Peperri, ouati rrimani −onarraro. Imecote uima carrizapa nema onanitoui. Cristo obodi nauato tarrari: nema onarrarope tiadeniza uima ocassera terreraniuarrine.

¹¹ Nema inezape Deocca uauadi Tocorime-Tamine iaza deni torra-rrarauitoui. Pocca uima nauatoqquiri inani: ia toneuedima-baqquiuiuarrine narrorarrari.

Paoropa Troadeuarri madi-zanapouiuarrine nacassera tarrari

¹² Rrehe, nazama Zeso Cristo tauimari icassiuaueraniuarrinecca maride oza panani Troadeuarri bacco onezape nauiuarricca madimanarrarideni mari ocanabaqquiuiuarrine ia Zozossede Deorrine touabanissa tarrarode.

¹³ Naraha naniza imecote Tito bacco onarrarazapa pouatoui obodi uatoto canarrarorrine omadinissa terrerade. Nema onezape ouimecotedeniza: —Masedoniauarri occaccana −oneza naniuarri occarrarode.

Paoropa Deoza: —Peperri, tirrine bica tani −narrari

¹⁴ Rrehe, uima onihi, onihi carri teraha nema nehe Deoza: —Peperri, tirrine bica tani −ihizanapo nana, onarraro. Pouarrine Zeso Cristocca deni torreheza iquerrenezape deni iquerrenarraro. Pouarrine Zeso Cristo tauimari icassiuaueraniuarrinecca ecomerarizezape zama bazimaza torrarizarraro. Pina marro bicabote torraribaqquirrarissa narraro.

¹⁵ Iape pina marro bicabote Cristo Deoza da inarrarissa inarraro. Poua tauimariza izepe irrirrarope Deoza bica tarraro. Izepe irririzarrarorrine tocassiuauerauiuarrinedeniza, tocassiuauera-rrarauiuarrinedeniza bacco inarizarraro. Pina marro bicabote toccabaqquiza madirraza bacco tarizarrarissa inarraro.

¹⁶ Zeso Cristo tauimari tocassiuauera-rrarauiuarrinedenizape pina marro uaidira tarrarissa narraro. Narrari marropa zoqqueheuarrinecca. Naraha tocassiuauerauiuarrinedenizape pina marro bicabotessa narraro. Narrari marropa camittehecca. Zeso Cristo tauimariza parrissa quena-rrararraridenizape zoqquehe rriquerreranicca torranitoui. Parrissa quenarrarideniza camittehe rriquerreranicca torranitoui. Naraha nerrecorrarina narraro uima inarraribaqquiniuarrine maride parrireui?

¹⁷ Arra Deo Atti mamaridedeni motapa manaconitouira mari mari nanarizemana naraha iape nema inerrerani. Zeso Cristoza iquerrenarrarope parrissa Deo Poua Atti ponira uati inanissa taniuarrine imadirraro. Ia Zossede Deopa ia qqui tabaqquirrari.