1 Zouao 2 - Kulina New Testament Brazil

Deocca erredeni iquerrenarrarocca uima denima aniccani Zeso Cristopa icca uima cacattemade

¹ Ouimecotedeni, tiadenipe occa erredenissa tiquenarraro. Arrirraro uima tiadeniza dozo onarraro, uimasiri tinanemana-rreraniuarrine oneza. Naraha uimasiri tinanemana tani. Uimasiri tinanemanezape ticcadeni uima cacattemadepa Abiuarri aniui. Narraripa Zeso Cristo. Pouapa uimari parrirenissa tarraro.

² Arra Zeso Cristo itoui poua ccaccoraza zoqquerraripa icca uaidirehe inanamossiza Deoza ibicaniuarrine. Icca uimasiri manaconi torrarraripa ia motta orrari inanicca manaconi torra-rraraui. Madirra zama bazima madirizemanarraridenicca uimasiri manaconi torrarrari pouapa.

Deocca zossenirriza iboraqquiri inana

³ Deocca zossenirriza iboraqquiri inezape nauatoqquiri inarraro: Parrissa Deopa iaza rrizera tarrari.

⁴ Naraha madirra ouaha attidenipa: —Deoza nauatoqquiri inani −quenaraha Deocca zossenirri ecauemana-rrerezape maizemanarrari. Parrissehepe pouadeniza anirrerani.

⁵ Madirrapa Deocca zossenirrissa inanemanarrarodenina Deocca touati uanehe pouadeniza anirraro. Poccadeni touati uanehepe Deoza parrirenissa tarraro. Irrine uima bicani nema nazana nauatoqquiri inarraro. Parrissa iape pocca iquerrenarraro.

⁶ Madirra attipa: —Deocca orrani −nazapa pocca madie pina Zesocca madiessa nazana bica tani.

⁷ Ouimecotedeni, titouideni ouati uana tani. Deocca zossenirri tiadeniza dozo onarrarope zati rrerani. Arri taide timittemanaporrarocca tiadeniza dozo onapomarraro. Pocca zossenirri aniporrarope: —Timecotedeniza tetideni uanaqquiri narri −narraro anirronarrarope timittemanani parri naccani.

⁸ Naraha arri rridapana tiadeniza Deocca zossenirri dozo onarrarope zati. Narraro zossenirripe Zeso Cristoza auato, iaza auato tarraroparri. Zizinipe touatorarronani. Ssiuarrani parrisseheccana tossiuarrarizarronani.

⁹ Madirra attidenipa: —Iape ssiuarraniza imadirraro −quequenanaraha pouadeni imecoteza nacasseraqquiri nazapa ziziniza madimanauiparra naccarrari.

¹⁰ Pouadeni imecoteza uatideni uanaqquiri naha madimanazana parrissa ssiuarraniza madimanarrari. Ssiuarraniza madimanazapa pouadeni imecoteza uimasiri inanemana-rreranitoui.

¹¹ Naraha poua imecoteza nacassera tarraripa ziziniza madirrari. Ziziniza ccarizarrari. Poua rrauine ssamo taui. Ziziniuarrine pina nocco sirissa narrari.

Arrirraro zamacca uimasiri inebonicca uima

¹² Ouimecotedeni, occa erredenissa tiquenarraro. Tiadeniza dozo onarrarope Zesopa ticcadeni uimasiri manaconi torrarrarirrine Deo ticcadeni uimasiri peperri inanarraroparri.

^13-14 Rradauideni, tiadeniza naqui dozo onarraro. Arra Deo zama inauatopo-rreraccazama madirraripa Zeso pouaza tinoccodeni rrizeraqquiri nani. Zabissodeni, zouatodeni, tiadeniza naqui dozo onarraro. Deo Atti tibodideniza anirraro. Dacoraqquiri tiquenani. Arra Deoza uauadide Tocorime-Taminepa arramani tinanemanarrari. Tiadenina deni tiquerrenarraro. Rrehe ouimecotedeni, tiadeni bazima Abi Deoza nauatoqquiri tiquenani. Narraroa arri tiadeniza occa uima dozo onarraroparri.

¹⁵ Arrirraro zamacca uimatouira tetideni uanaqquiri nerrerarri. Arrirraro zamacca inoccoza qqui inarrarotouipe tetideni uanaqquiri nerrerarri. Arrirraro zamacca uimatouira timadimanezape ticcadeni uima auato tarraro: Deozape tetideni uanaqquiri nerrerani.

¹⁶ Arrirraro zamaza imadirrarocca uimape arrima narraro: Arri timedenicca touini, arri tinoccodeniza qqui tiquenarrarocca touini, arri tettidenipe: —Ozepe sse tana. Ouana deni orrana −tiquenarraro touini tiquenaraha narraro uima bazimape Deorrine rrerani. Narraro bazimape arrirraro zamacca uima.

¹⁷ Naraha arrirraro zamape rricanitoui. Arrirraro zama nemanehecca uaidirehe touini quenauicca naqui rricanitoui. Naraha madirra Deo Poua touini nauiccara inanemanarrarodenipa Pouaza madimana-zanapouitoui.

Cristoza uadiqquiri narrarideni

¹⁸ Ouimecotedeni, occa erredenissa tiquenarraro. Zama rricanicca uada touarrirarronani. Cristo ccanibote nazapa pouaza uadi tarrari ccarronauitoui. Narraro uimape timittemanapode. Rridapana naco Cristoza uadiqquiri narraridenipa auatoma-rizemanaui. Narrarope nauatoqquiri inani: Zama rricanicca uada bacco tarraro.

¹⁹ Pouadenipa iaza quequeriqquimana naraha ia tonebobaqquirrari. Rridacca iazama Zeso Cristocca toquerrenazapa iaza quequeriqquimana-zanapouitouiraha iaza carrimemana-rrarazapa poccadeni uima iaza auato tarraro: Pouadenipa imecote querrena-rraraui.

²⁰ Naraha tiadenipe pina pouadenissa tiquenerrerani. Cristo tiadeniza Deo Corime da inarizazapa tibodideniza madirrari. Narrari Deo Corimerrine Deocca parrissehe nauatoqquiri tiquenarraroparri.

²¹ Parrissehecca uima tiadeniza rrizera tezape arri tiadeniza dozo onarraroparri. Parrissehecca uima ssamoqquiri tiquenani onerrerarraro. Tiadenipe nauatoqquiri tiquenani parrissehepe maizehe rrerani.

²² Nerrecorrarina mamaizade? Arra madirra atti: —Zesopa Cristo-Mesia rraraui −nanariza narrarina mamaizade. Narraripa Cristoza uadi tarrari. Abi Deoza: —Parrissa madiui −narrararrari. Poua Bedi Zeso Cristoza naco: —Parrissa madiui −narrararrari.

²³ Nazama arra madirra attideni: —Zesopa Deo Bedi rraraui −quequenanarraridenipa Deo rriraha mamadimana narrari. Naraha arra madirra attideni: —Zesopa Deo Bedi –quequenanarraridenina Abi Deocca erredeni toquerrenarrari.

²⁴ Rrehe, Deo Bedi tauimari timittemanapode. Narrarope tibodideniza tecauemananissa tarri. Arri timittemanaporrarocca naqui tibodideniza aniniparri nezape Abi Deoza, Poua Bediza tirrariqquimana-zanaponitoui.

²⁵ Rrehe, narrarope Zeso Cristo toccamacossani-rraraccazama iaza uati taporraride: —Ouaza tiquerrenezape camittehe rriquerreranicca ticarrimana-zanaponitoui −nade iaza.

²⁶ Arrirraro uima tiadeniza dozo onarrarope nauatoqquiri tiquenaponiuarrine: Madirra tiadeni tocamaiza-baqquimanauiuarrine animanaui.

²⁷ Naraha Zeso Cristopa tiadeniza Deo Corime da inarizarraripa tiadeniza madiuiparra naui. Narraria arra tiadeni mari tocanabaqquirrariparra. Nerrecotoui madirracca marinarra onihi timittemananiuarrine? Deo Corimena uima bazima tiadeni mari tocanabaqquirrari. Parrissehera uati uati tarrari, maiza-rrararrari. Arra Deo Poua Corime tiadeni mari tocanabaqquiporraricca marinarraza dameraqquiri tiquenarri, Cristoza timadimana-zanaponiuarrine.

Deocca erredeni iquerrenarrarocca uima

²⁸ Ouimecotedeni, occa erredenissa tiquenarraro. Rridapanape Zeso Cristo pouaza timadimananissa zanaporri. Nani niza Zeso poua ccaronapomaza tibodideni cappine-rreraniuarrine. Poua qqui tiquenaza comehiqquiri tiquenerreraniuarrine.

²⁹ Zeso Cristopa uima bicani parrirenissa inanarraro. Narraro pocca uima nauatoqquiri tiquenezape arra madirra uima bicani parrirenissa inanemanezape Deocca madirra toquerrenaui nauatoqquiri tiquenarraro.