1 Zouao 1 - Kulina New Testament Brazil

Zeso Cristopa Deo Atti camittehecca

¹ Nirra imecotedeni? Tiadeniza Deo Atti camittehecca uima dozo inarraro. Narraripa zama torra-rreraccazama madiporrari. Rridapana naco madiui parra naui. Iape poua atti imittade. Assire naco qqui inade. Pouaza rrauirrarizeza inoccoza qqui izanapode. Izepeza naco uapi bara inade. Narraripa Deo Atti camittehecca.

² Deopa narraro camittehe iaza noue inarrarode. Narraro camittehe qqui inarrarope arri ecomerarizarraroparri. Tiadeniza naqui narraro camittehe rriquerreranicca tauimarini uati inarraroparri. Narraro camittehepe Abi Deoza aniporraro. Narraro iaza auatorrarode.

³ Nazama arri qqui inarraro, imittarraro tiadeniza uati inarrarope iaza tirrariqquimananiuarrine. Pina ia Abi Deoza irrariqquirrarossa, Poua Bedi Zeso Cristoza naqui irrariqquirrarossa tiquenaniuarrine.

⁴ Arri uima dozo inarrarope ticcadeni uatizehe parrirenissa taniuarrine.

Deopa ssiuarra taui

⁵ Arra Zeso Cristo ia mari tocanabaqquirraricca uimaha arri tiadeniza uati inarraroparri: Deopa ssiuarra taui. Pouazape zizini nouerani.

⁶ Ettipe: —Deocca iquerrenani −ihinaneraha ziziniza rrauirrarizezape imaizarraro. Parrissehe imitteraha narrarossa inana-rrerani.

⁷ Naraha ssiuarraniza rrauirrarizezape pina Deo ssiuarra taha madirrarissa inaniuarrine. Nezape imecotedeni tezerre irrariqquirraroparri. Deo Bedi Zeso Cristo emene naqui icca uimasiri bazima inanamossi-zanaporraroparri.

⁸ Ettipe: —Uimasiri ocappirani −inezape ia icamaiza tani. Parrissehe iaza nouerani.

⁹ Naraha nauatoqquiri inani: Deopa maizera taui. Pocca uimape toccanissa tarraro. Pouaza icca uima ecomereza: —Occa uima uaidira tani. Uimasiri ocarrini −inezape Deopa icca uimasiriza: —Peperriua, ouadi-rrerani −narrari. Icca uaidirehe sse inarraro.

¹⁰ Poua Attipa: —Madirrapa uimasiri carririzemanarrari −narrari. Naraha ettipe: —Ouape uimasiri ocappirani −inezape pina: —Deopa mamaizade −inarrarossa narraro. Nema inanezape ibodiza Deo Atti nouerani auato tani.