1 Timoti 6 - Kulina New Testament Brazil

Madirracca zozosse toquerrenarrari Zesoza rrehe quenarrarideni arrama quenana

¹ Rrehe Timoti, madirracca zozosse toquerrenarrari Zesoza rrehe quenarrarideniza arrima onarraro: Tiadeni zossede attideniza iboraqquiri tiquenarri. Pouadeni noppine ticappinemaneza mouaraza tiadeni zossededeni attideni tetecomeremana narri. Nema tiquenezape tiadeni zossededeni Deo oni itamassomana-rrarauitoui. Icca marinarraza naqui uima inassonarimana-rreranitoui.

² Tiadeni zossededeni Zesoza rrehe quenaza naco tettidenipe: —A, oua zossedepa Deocca madirra torraza ouimecote torraui. Poua attiza ibora onerrerana −tiquenerrerarri. Zeso Cristorrine timecote torrarrari. Deopa pouaza uati uana taui. Pouaza denima bicaqquiri tiquenarri. Pouaza tarabaia tiquenanissa tarri. Nema tiquenezape timecote acco ticanemanarrariparra. Rrehe Timoti, arrirraro marinarra ticca mamari tabaqqui tinauattabaqquiuissa tarro, onarraro.

Madirra maizehe mamaridedenipa ssamoqquiri narrari

³ Arra madirra marinarra onihi mari mari narraripa ia Zozossede Zeso Cristo tauimari parrisseheccassa nerrerarraro mari mari nazapa pocca marinarrape maizehecca. Arri Deoza imadinissa taniuarrinecca marinarrassa nerrerarraro mari mari naza naco pocca marinarrape maizehecca.

⁴ Narrari maizehe mamaride poua bodipa: —Occa marinarra deni torrani. Ouape nauato onani –naraha poua bodipa ssamo taui. Madirra namarride rarraripa madirra ouaha tezerre uima ponimacca arrauarri uati arrauarri uati quenauiuarrine touini narrari. Naraha narraro uimape bica terrerani. Pocca uima nema nezape poua tezerre uimahaha canarrarideni pouarrine pouadeni tessecca nauatoue acconi cauadirerrari, nanacassera canarrari, catamassorere canarrari, pouadeni bodideniza maizani uaua quenarrari.

⁵ Pouadenipa cauadirere cacana narrari. Uadierrine bodideni tossamomanarrari. Deocca parrissehe pouadeniza touatorarrarossa narraro. Pouadeni bodi naco: —Deoza iquerrenezape izepe sseqquiri nanitoui −quenaraha narrarope parrissa rrerani.

⁶ Deoza iquerrenezape manaconi bicani icarrini. Naraha narraro manaconipe pina ziniro imenissa, tozepetarrissa nerrerani. Narraroa arri Deotouira damera inezape pocca danirri uemerre uemerrererre naraha narraroza etizeza: —Rrehe, peperri, bica tani −inarraro.

⁷ Arrirraro zamaza issonezape izepetarri rrirehe issonarraro. Izoqqueza naqui izepetarri iaccarrarauitoui.

⁸ Nezape rridapana imadiccazama irripaniuarrine icarri, ezaniuarrine icarri nezape narraroza etizena, onarraro.

⁹ Naraha madirra motadenipa zepedeni sseqquiri nauiuarrine touira madimanazapa uaidirehe inanemana tani. Nama quenazapa uimasiri inanemanezape Tocorime-Taminecca maizeheza tozepe toquerrenarrarissa quenarrari. Ssamoqquiri nazapa bica terreranicca touini, oppina tanicca touini, ponimacca touini quenarrari. Nama quenazapa pouadenirrine uaidirehe pouadeniza ssonarirraro. Poccadeni uima naqui tossamorizarraro. Narraridenipa Deocca narrizoueza toquerrenauitoui.

¹⁰ Ziniro uemani touini inacomezape uaidirehe onihi onihi inanariza tani. Madirra motapa ziniro touini, tozepetarri touini quenaza Deoza touarrimanazapa poccadeni rrehenirri inebomanarraro. Pouadeniza ocasserehe bacco nezape pina boba imeza rraro canarrarissa narraro. Uaidirehe pouadeni bodiza rraro tozimezape orri orri zanapomanarrari.

Zeso Cristoza rrehe tezape ticca madie arrima naniuarrine

¹¹ Naraha Timoti, Deocca madirra tirrani. Pouaza tizepe irrizape uima uaidira taniccaza tiarrini narri. Ticca madie Deocca zossenirriza parrirenissa taniuarrinepe damera tinarri. Deoza ibora tinezape Zesoza rrehe tizanaponiuarrine damera tinarri. Deoza teti uana, madirra bazimaza teti uana taniuarrine naqui damera tinana. Ocasserehe tiaza ssonariraha orri terrereza tinauanarri. Rrone tinehe timadiniuarrine naqui damera tinarri.

¹² Ia Zozossede Zeso Cristo tauimari deni torraniuarrine daco tirrirarri. Pina madirra ittomeza taide bacco tapouiuarrine damera tarrarissa tarri. Camittehe rriquerreranicca ticarriniuarrine Deo titoui uaua narraride. Narraro camittehe bacco tinaniuarrine daco tirrirarri. Narraroa uima bicani tecomerarizapoza bazima mittemanarraroparride.

¹³ Rrehe Timoti, Deopa bazima madirizemanarrarideni camitta inanabaqquirrari. Zeso Cristopa tamine Ponsio-Pirato baccouarri uaza pocca uima bicani ecomerarrarode. Narrarideni pamahapa ouatti nauatoto taza tia ocazosserraro:

¹⁴ Occa marinarra nemaneheza ibora tinarri. Tirrine cacarriqquimera-rrerana. Nema tezape madirra ouahadenipa: —Tirrinepe parrirenissa terrerani −quena-rrarauitoui. Ia Zozossede Zeso Cristo ccani-rraraccazama denima maride nema tizanaporri.

¹⁵ Rrehe, Zesopa Deorrine uada narroraponicca bacco taza parrissa ccanipomauitoui. Deopa bazima Cacauade orrariui. Poua touira etizezape bica tani. Taminedeni uapi taraha pouana uapimacca tamine deni torraui orrariui. Zozosse carririzemanaui uapi taraha pouana ia Zozossede Zeso Cristopa deni torraui orrariui.

¹⁶ Deo Poua orrarirrari naco rrica-rrararrari. Poua madiuiuarripe poua ssiuerrene zibehi tarrarorrine iarriressiniuarrinepe iparrire-rrerani. Madirra iape inoccoza Poua qqui inarraraui. Qqui inauiuarrine iparrire-rrerani. Narrariza ettipe: —Deopa bica taui, peperri! −ihizanapo nana. Deopa ia Cacauade deni torraui nama zanapoui, onarraro. Parrissa nema nana.

Madirra zepedeni sseqquiri narrarideni arrama quenauiuarrine

¹⁷ Nazama Zesoza toquerrenarrari zepedeni sseqquiri narrarideni naco arrirraro zamacca tozepetarri carrimana, ziniro carrimana nazapa: —Iape bicaqquiri inani, deni iquerrenani −quena-rrarauiuarrine uati ticanabaqquirro. Pouadenipa uemani carrimanazapa: —Narrarozana imadi-zanaponiuarrine iparrireni −quena-rrarauiuarrine naco uati ticanabaqquirro. Arrana pouadeni zepetarri amazati amossi nani carri tani. Naraha: —Deona ia touacauabaqqui-zanapouiuarrine parrireui −quenauiuarrinena bica tani. Ia bazimape Deocca danirriza imadirraro. Icappira-rreraniuarrine iaza accora tarrari. Nema nezape madirra zepedeni sseqquiri narrarideni Deo Pouazana uatizemanaui orrari nana, onarraro.

¹⁸ Nazapa pouadeni mari ticanabaqquiza naqui arrima tarri: Madirra zepedeni sseqquiri narraridenipa uima bicanira inanemananiuarrine dameraqquiri nana. Accoraqquiri nauiuarrinepa bodideni narroremanaha madimanana. Nazapa pouadeni carrimanauicca accoraqquiri naza cappiremanarrarideni acco icanabaqqui-manauiuarrine da da iquenauiuarrine, onarraro.

¹⁹ Nema inanemanezape pina manaconi imeni memeuarri inauapimanarrarossa narraro. Narrarope nizaranibote pouadeniza torrezape amossi nerreranitoui. Camittehe rriquerreranicca naqui pouadeniza torranitoui.

Timotiza Paorocca marinarra rricanicca

²⁰ Rrehe Timoti, Deocca marinarra tiaza da inarraro tecauanissa tarri. Madirrapa tiaza: —Ssamo tinani, iana nauatoto inani −quenazapa narrarideni tezerre uimahaha ticana-rrerarri. Titezerre touatti ponimaccaza arrauarri uati arrauarri uati quenauiuarrineraha poni tarri. —Ibodi nauatoqquiri inani −quenaraha pouadeni bodicca uatouepe ponimacca. Deoccassa nerrerani.

²¹ Pouadeni bodi uatoue ponimacca touini quenazapa Deocca marinarraza touarrimanarrari. Zesoza poccadeni rrehenirri tossamorraro. Rrehe Deopa tia ticca mamari tabaqquima tiadeniza uima bicani inanana, onarraro. Peperri occa uima. Oua onipe Paoro.