1 Tesaronicadeniza 5 - Kulina New Testament Brazil

Zeso Cristo ccaniuitoui ibodi uatoue imadina

¹ Naraha imecotedeni, arra Zeso ccaniuicca uada tauimarini tiadeniza uati onapode. Nezape dozo onerrerani.

² Arra ia Zozossede Zeso ccaniuicca uada bacco tanicca uimape nauatoqquiri tiquenani. Narrarope arrima napode: Eti rrimama caneraha ccaniuitoui. Pina zome bobotide icca ozaza botide qquezimauicca uima ssamo inarrarossa nauitoui.

³ Zeso ccaniuicca uada bacco tabote nezape madirra attidenipa: —Rridapanape rrazire tomossi, oppinehe tomossi narraro −quequenanaraha amazati pouadeniza oppina tehe ssonarizape zori tarra canima-rrarauitoui. Pina erredeni comauicca uada amonerredeni ssamoqquiri narrarossa narraro. Amazati tossonauiuarrinecca uada bacco taza amonerrepe erredeni comene zori terre canima-rrerani.

⁴ Naraha imecotedeni, tiadenipe ssamoqquiri tiquenerrerani. Ziziniza timadimana-rrerani. Niza ia Zozossede Zeso Cristo ccaniuicca uada bacco tezape pina bobotiderrine oza rrinede uarro narrarissa tiquenerreranitoui.

⁵ Deoza tiquerrenarrarope pina ssiuarraniza timadimanarrarossa tiquenani. Deo ssiuerrene tiadeniza auato tarraro. Iape ziziniza madimanarraridenissa inerrerani.

⁶ Pina narrarideni pouama cauadirrarrarissa inerrerana. Icca madie ecauanissa zanapona. Zeso Cristo touira ibodi uatoue imadina.

⁷ Arra Zeso Cristo ccaniuitoui bodideni uato-rrararraridenipa ziziniza madimanarrari. Zomepa cacauadirra narrari. Noccodeni rranoqquiri nauiuarrine toui quenaza naco zomeza coma tanicca ze ze quenarrari.

⁸ Naraha iape ssiuarranicca madirra iquerrenarrarope inocco rranoraqquiri nehe imadirraro. Ibodi uatoue imadirraro bica tani. Iape pina isso teppeppe rrazireza biquera-rrarauiuarrine poua bacco cacauauiuarrine ccara tanicca carri, poua tati cacauauiuarrine ccara tanicca carri narrarissa inana. Uimasiri inana-rreraniuarrine ia ecauaniuarrinepe Deoza icca rrehenirri icarri, Deocca touati uanehe icarri narraro. Icassiuaueraniuarrine touini inarrorehe imadirraroparri.

⁹ Deo ia tocatterrizabaqquirraripa ia tonarrizo-baqquiuiuarrine rraraui. Deo ia tocatterrizabaqquirraripa ia Zozossede Zeso Cristo ia tonassiuauabaqquiuiuarrinena parra.

¹⁰ Zeso Cristo itoui poua ccaccoraza zoqquerrari. Nama narraripa camitta inaccaza, izoqqueza naqui pouaza imadinitoui.

¹¹ Nazama tiadenipe timecotedeni tezerre ticatizerara canarri. Ticcadeni rrehenirri todacorani naniuarrine naqui acco acco titicana narri. Narrarossa tinanemanarrarope nema tizanapomanana, inarraro.

—Arrima tiquenanina bica tani −quenarrari

¹² Imecotedeni, tiadeniza uati inana. Tiadeni maridedeniza bicaqquiri tiquenarri. Attideniza naqui pina titauaribobo canarri. Tiadeni maridedenipa ia Zozossede Zeso Cristoza tiquerrenarraro cacauade toquerrenazapa zepedeni irrimanauissa tarrari. Timadimananissa taniuarrine tibodideni acco acco totocanabaqquimana narrari.

¹³ Deo Atti tiadeni mari tocanabaqquiza naco: —Rrehe, pouadenipa iaza bicaqquiri naui −titiquenanarri. Pouadeniza tetideni uanaqquiri narri, inarraro. Bazimaza rroneqquiri tiquenehe timadimanarri, inarraro.

¹⁴ Imecotedeni, tiadeniza denima uati inana. Madirra zepe irriuiuarrine ibo tazapa tettideni dacoraza uati ticanemanarro, zepe irride ibora tauiuarrine. Madirra bodi ocassera taza Zesoza: —Peperri onana −nabote nazapa poua tinauatizemanarro, Zesoza torraniuiuarrine. Madirra pocca rrehenirri tomirriraza poua bodi acco ticanemanarro, pocca rrehenirri todacorani napomaniuarrine. Madirra bazimaza rroneqquiri tiquenarri. Pina madirra tiadeniza uima inassonarizape pouaza tedimane-rreraza mouaraza tinauanemanarri, inarraro.

¹⁵ Madirra tiadeniza uima inanezape: —Manaco pouaza uima onanana −tiquenerrerarri. Uaidirehe tinanemana terrerarri. Uima bicanira tinanemananiuarrine dameraqquiri tiquenarri. Timecotedeniza, madirra ouaha bazimaza naqui uima bicanira titinanarizemana nana, inarraro.

¹⁶ Uarrirriraza tetetizemana narri.

¹⁷ Deo Pouaza ssiuarra uati, zome uati titizanapomana narri.

¹⁸ Arri ocasserani temaneza, uima bicani tiadeniza torreza naqui Deoza uati uati titiquena narri. Pouaza: —Rrehe, peperri. Tirrine bica tani −titiquena narri. Deopa arra Zeso Cristoza rrehe quenarrarideni attideni nama quequenanauiuarrine nacassa tarrari.

¹⁹ Deo Corime tiadeniza madirraripa tettarro mana-rrarana.

²⁰ Madirra Deo Corimerrine Deo Atti ecomerezape tettideni: —Maiza maiza narrari −tiquenerrerana.

²¹ Madirradenicca marinarra bazima titauaribobo caneza: —Pina Zeso Cristo tauimarissa naqui? −titiquena nana. Narrarossa nezape tibodideniza torraniuarrine bica tani.

²² Naraha uima uaidira taniccape tibodideniza tinanemana terrerarri. Tiarrimanani nanina bica tarraro.

²³ Deo Pouana rronehe rrinede. Deo Pouana tibodideni tonauissobaqquiuissa tauiuarrine, inarraro. Deo Pouana ticorimedeni, tibodideni, tessiredeni nehe ecauanissa tarraro, uimasiri ticappiremanehe ia Zozossede Zeso Cristo poua ccanipomaui bacco tiquenaniuarrine, inarraro.

²⁴ Abi Deo titouideni uaua narraripa maizera taui. Tiadeniza Poua Attissa inananitoui. Arri uati onarrarope tiadeniza inananissa tanitoui.

Bazimaza: —Zesocca biquehe tiadeniza torrana −quenarrari

²⁵ Imecotedeni, Deo ia acco tocanabaqquiuiuarrine itoui naqui Pouaza uati uati titiquena narri.

²⁶ Timecotedeni Zeso Cristoza rrehe quenarrarideni bazima bacco bacco ticanezape nirra tiqueneza dama, ticauarracossa titiquena narri, inarraro.

²⁷ Arra ia Zozossederrine ouatti ocarriza tiadeniza arrima onarraro: Timecotedeni bazimaza arrirraro uima teppe ua tarizemanarri, onarraro.

²⁸ Ia Zozossede Zeso Cristo tiadeniza biquehe inanana, inarraro. Peperri. Ia onipe Paoro, Silvano, Timoti inarraro.