1 Tesaronicadeniza 4 - Kulina New Testament Brazil

Icca madie arrima nezana Deo uatizerrari

¹ Imecotedeni, rridapanape ia Zozossede Zeso onima tiadeniza uati inanissa taniuarrine. Tiadeni mari icanabaqquiporrarossa tinanemanani Deo qqui tazapa tiadeniza uatizeuitoui, ihinanade. Rridapana nema tinanemanezape nema tinanemana-zanaporri, inarraro.

² Tiadeni mari icanabaqquirrarorrine icca marinarra nauatoqquiri tiquenani. Iape Zeso Cristo ia tocazossebaqquiza tiadeni mari icanabaqquirrarode.

³ Deo Poua nacassa tauiccape arrima narrarona parri: Tibodideni ssiuarra, uisso teza uimasiri rrirehe timadimananiuarrine. Nema tinanemananiuarrinepe uananehecca tinanemana terrerarri.

⁴ Deopa arra maqquiderre amonerre carrirraripa pocca amonerrera inarrari-zanaponiuarrine nacassa tarrari. Nani ticcadeni amonerreza tetideni uanaqquiri neza ticcadeni amonerre tecauemananissa taniuarrine.

⁵ Nema tiquenezape pina arra Deoza ssamoqquiri narraridenissa tiquenerreraniuarrine. Pouadenipa Deoza ssamoqquiri naza pouama touini quenaza uananeheza carri carri cacana narrari.

⁶ Timecote Zeso Cristoza rrehe narraricca amonerre, amonerre onihi naqui tirremana terrerarri. Timecotecca amonerre tirrezape pina timecoteza nanarrizo tarrarossa narraro. Neza tiadeniza uati inapode: —Parri, nema narraro uimape oppina tani −ihinanapode. Nema narraro uima tinanemanezape manaco Deo tiadeni tonarrizo-baqquiuitoui.

⁷ Deopa uimasiri inananiuarrine itoui uaua narraraui. Uimasiri inana-rreraniuarrinena itoui uaua narrari. Deopa ibodi uisso, ssiuarra taniuarrinena itoui uaua nanarra narrari.

⁸ Arrirraro marinarra madirra ettarromanezape madirra atti ettarromanarrerani. Deo Attina ettarromanarraro. Pina Deo Poua Corime iaza da inarrari uauattarro inanemanarrarissa narraro.

⁹ Nazama timecote Zeso Cristoza rrehe quenarrarideni tezerre tetideni cauanerara cananicca uimape nauatoqquiri tiquenani, Deo Pouana tiadeni mari tocanabaqquipoza. Nema nezape narraro uima tiadeniza dozo onerrerani.

¹⁰ Narraroa arri zama arobeni Masedoniauarricca timecotedeni bazimaza tetideni uanaqquiri narraroparri. Naraha iape tiadeniza uati inarraro: Ticcadeni touati uanehe denima tinanemanarri, inarraro.

¹¹ Mouaraza timadimananissa taniuarrine tibodideni uatonissa tarri, inarraro. Pina ticcadeni uimazara tibodideni uatomanarri. Madirra ouahacca uimaza ticarrimemana terrerarri, inarraro. Mouaraza tizepedeni irririzemananissa tarri, inarraro.

¹² Nema tiquenezape madirra ouahadeni ticcadeni uima bicani qqui toquenazapa: —Pouadeni cacauade nauatoqquiri naui −quequenanauiuarrine. Tizepedeni irrimananissa teza naqui ticappiremana-rreraniuarrine, inarraro.

Ia Zozossede Zeso Cristopa ccanipomaui tauimari

¹³ Imecotedeni, ssamoqquiri tiquenerreraniuarrine ticcadeni madirra zozoqquemana narraricca uima tiadeniza dozo inarraro. Arra madirra Zeso Cristoza ssamoqquiri narraridenipa poccadeni madirra zoqqueza orri orri quenazapa: —Icca madirra qqui inimani-rrarapazarra? −quequenanarrari. Naraha tiadenipe pina pouadenissa tiquenerreraniuarrine Zeso Cristocca madirra zozoqquemana narraridenicca uima timittemanarri.

¹⁴ Arra Zeso zoqqueraha nauatonirrariza parrissa inezape nauatoto inarraro. Narraria arra Zesoza parrissa quenarrari zoqquemanarrarideni naco pina Zeso Deo inauatonirrarissa quenauitoui.

¹⁵ Arrirrarope ia Zozossede Zeso Cristocca marinarra tiadeniza uati inarraro. Ia Zozossede Zeso Cristopa ccanipomaza imadiniparri nezape iaha taide ia Zozossedeza bacco inapo-rreranitoui. Arra imecote rricaporraridenina pouaza bacco bacco toquenapouitoui.

¹⁶ Rrehe, ia Zozossede Zeso Cristopa ccaronauiuarrinepa taide memeuarri atti moui taha uaua naui imittanitoui. Deocca zozosse tabaqquidenicca tamine naco uaua naui atti imittanitoui. Deocca rrorroza rrori rrori naui naco imittanitoui. Nazana Zeso Cristo memeuarri ccaronazapa pouaza parrissa quenaporrari rricaporrarideni taide nauatonimanauitoui.

¹⁷ Zotodena arri ia camittaqquiri inarraro rricaporrarideni tezerre bazima ia touaccamacossani-baqquiuitoui. Meme essenima rrauirramacossanitoui. Meme nocconiza ia Zozossede Zeso Cristo tezerre bacco bacco icananitoui. Nezape ia Zozossede Zeso Cristoza imadi-zanaponitoui.

¹⁸ Nazama narraro uimaza timecotedeni tezerre ticatizerara canana, onarraro.