1 Pedoro 4 - Kulina New Testament Brazil

Deozara dameraqquiri tiquenarri

¹ Rrehe, Zeso Cristopa poua assireza ocasserehe imeni inauanarraro. Nema nezape tibodideniza tinarroremaneza arrima tiquenarri: —Pina Zeso Cristossa onaniuarrine ocasserehe ouaza ssonariza nema nehe onauanana −tiquenarri. Ocasserehe mouaraza tinauanemanezape uaidirehe tinebomanani auato tarraro.

² Nezape arrirraro namiza timadimanaqquezape uaidira tanicca touini tiquenerreraza timadimananitoui. Deo Poua touini nauiccara titinanemana nanitoui.

³ Taide timadimanapozape Deoza rrehe quena-rrararraridenicca uaidirehessa tinanemaneza timadimanapoccade. Pina tessiredeni touaidiraniuarrinecca touini titiquena narraro. Ticcadeni amonerre rrereraha touini tiquenarraro, ticcadeni maqqui rrararaha toui tiquenarrari. Narraro uananehe touini titiquena narraro. Uananehe onihi uaidira tanicca naqui touini titiquena narraro. Tinoccodeni rrano taniuarrine touini titiquena narraro. Errete uaidira tanicca touini titiquena narraro. Zoppinerreza, siba nauatoniza naqui: —Ia cacauade −titiquena narraro. Narraro uimape Deoza denima uaidira tani.

⁴ Naraha rridapanana ticcadeni madie zatipe arra uaidirehe touini quenarrarideniza rriza tani. Pouadeni tezerre ticarrimemana-rrerezape attideni uaidira taza titauimarideni uati uati quequenanarrari.

⁵ Naraha uaidirehe inanemanarrarodenipa Deoza poccadeni uaidirehe ecomeremananitoui. Deopa madimanaccarraridenicca uima, zoqquemanaporraridenicca uima bazima cattemade narrorarrari.

⁶ Nama nazapa Zeso Cristo poua poua tauimari icassiuaueraniuarrineccaza rriquemanaporrarideni mari icanabaqquirrari. Deopa zoqqueheza assiredeni inarrizobaqquiporraripa madirra bazima zoqquehe tonauanarronemanarrari. Naraha Zesoza rrehe quenarrari corimedenipa Deoza madimana-zanapouitoui.

⁷ Arrirraro zamape rricani touarrirarronani. Nema nezape tibodideni uatome-mananissa teza tiadeni tecauemanarri, uimasiri tinanemana-rreraniuarrine. Deoza uatide naqui dameraqquiri tiquenarri.

⁸ Uima deni torraniccape tetideni cauanerara canarizaniuarrine. Narraro touati uanehepe uimasiri inarrica tani.

⁹ Ticcadeni ozauarri madirra bacco narronaza naco pouaza tettideni uaidira teza uati tiquena terrerarri. —Nirra, ticcamacossarri. Tirriparri −tiquenanina bica tani.

¹⁰ Deopa tiadeniza uima bicani inanarraro. Poua Corimecca nauatoue onihi onihi da inarizezape ticarririzemanarraro. Narraro danirri bicani ponima tinanemana-rrerana. Narraroza timecotedeni acco canade nauatoqquiri tiquenana. Acco acco ticanarizerezape Deocca biquehe bazimaza auato taniuarrine.

¹¹ Madirra maride nauatoqquiri tiquenezape pina Deo Attissa narrarora mari mari titiquena narri. Madirra birrideni accode nauatoqquiri tiquenezape Deocca dacorehema acco ticanabaqquimanarro. Nema tiquenezape madirra bazima qqui toquenaza: —Rrehe, Zeso Cristorrine nama quenarrari −quenauitoui. Nazana pouadeni naco Deoza uatizemanaza: —Rrehe, Deopa bica taui, bica taui −quenauitoui. Parrissa, Deopa bica tarrari. Dacorehe carriui. Nama zanapouitoui. Parrissa nema nana.

Tiadeniza ocasserehe ssonarizape ticappinemana terrerarri

¹² Ouimecotedeni, titouideni ouati uana tani. Tiadeniza ocasserehe ssonarirrarope pina zippossa narraro. Ticcadeni rrehenirri nattome narraro. Deopa tiadeniza ocasserehe ssonariniuarrine ecossa-rrerezape tinauanemananitoui. Naraha uarro ticanirerrerana. —Nerrecotoui Zesocca orreraha ouaza uima ssonarirraro? −tiquena terrerarri.

¹³ Pina tetizemanarri. Zeso Cristo naco ocasserani auarrari. Pina tiadeni tinauanemanarrarossa narraro inauanaporraro. Niza poua ccanipomaza pocca deni torrehe auato inanezape tetizemaneri nanitoui.

¹⁴ Nazama Zeso Cristo oniza tiquerrenarrarorrine madirra tiadeniza attideni uaidira taza atti atti quenaza naco nema nehe tetizemanarri. Deo tiadeniza uima bicani inanarraro. Deo Corime Dacorabote tiadeniza torrazapa madi-zanapouitoui.

¹⁵ Arri ocasserani tinauanemanarrarocca uima uati uati onarrarope uaidirehe tinanemanarraro manaconi rrerani. Madirrapa uaidirehe inanarizemanani carri tani. Pina irrine auarrari, botirrari, uimasiri tonanarrari, madirra ouahacca uimaza carrimarrari. Nama quenarraridenizape narrizoue ssonari tani. Naraha tiadenipe nema tiquenerrerarri. Poni! onarraro.

¹⁶ Naraha Cristocca madirra tiquerrenarrarorrine ocasserani tinauanemanezape ticappinemana terrerarri. Pina Deozara tetizemaneza Pouaza: —Rrehe, peperri, bica tani! Zesocca orrarrarorrine ocasserani ouarraro −titiquena nana, onarraro.

¹⁷ Deo madirra bazimacca uima cattemade torrauiuarrinecca uada bacco tani. Taidepe ia pocca madirra iquerrenarraro icca uimaha icattemaponitoui. Arri rridapana iaza narrizoue ssossonari narrarope arrimani ocassera teraha niza zotode Deo madirra inassiuauabaqquiuiuarrinecca uimaza iboqquiri narraridenizana narrizoue denima oppina tanicca ssonarinitoui. A, pouadenipa narraro narrizoue inauanemananiuarrine parriremana-rrarauitoui, onarraro.

¹⁸ Deo Atti dozo naporrarozape arrima narraro: Deoza iboraqquiri narrarideni tocassiuauerauiuarrinepa narro taraha nema nehe inauanemanarraro. Naraha Deoza iboqquiri narrarideni, arra uimasiri sseqquiri narrarideni tocassiuauerauiuarrinepa pouadeniza denima narro tani. Pouadenizape ssamo tani!

¹⁹ Nema nezape tiadeniza arrima onarraro: Deo ecossaniuarrine nacassera taza tiadeniza ocasserehe ssonariraha nema nehe bicanira tinanemana-zanapona. Deopa tiadeni Nauatode. Pouaza: —Abi Deo, oua tecauarri −tiquenezape tiadeni touacaua-baqquiuitoui. Pouapa Poua Attissa inanarraro.