1 Corintodeniza 8 - Kulina New Testament Brazil

Siba nauatoniza bani da iquenauicca uima

¹ Rridapanana zamatapa, bani naha siba nauatoniza da da ihiquequenanarraricca uima ouacomerana. Narraro uimape ia bazimaza auato tani. Nauatoqquiri ineraha parri, nauatouepe ia deni tonana tani. Touati uanehena denima bica tani. Narrarope icca rrehenirri tonadacora tani.

² Madirra atti: —Ouape ouattarraro, uapima nauato onani −narraripa bazira tehera nauato tarrari.

³ Naraha madirra Deoza uati uana tazapa pouaza Deo nocco rrizera tarrari.

⁴ Nazama siba nauatoniza bani da tauicca rripade oppina taqui? Oppinera taqui? Narraro uima tiadeniza ouacomerana. Iape parrissa nauatoqquiri inani. Siba nauatonipe arrirraro zama nemaneheza camittehe cappirani, parrissa ia Cacauade rrerani. Deona ia Cacauade orrariui.

⁵ Naraha madirra ouahadenipa namiza anirraricca, memeza anirrariccaza naco: —Deo, deo −quequenanarrari. Narraroa arri poccadeni uima pina deo uapi tarrarissa, pouadeni zozossede uapi tarrarissa inanemanarrariparra.

⁶ Naraha iazapa Deo orrariui icca Abi memeuarricca. Pouana bazima inauatorizarrari. Pouaza imadirizarraro. Ia Zozossedepa orrariui Zeso Cristoparra. Pouarrinena bazima anirizarrariparra. Narraroa arri iaparri.

⁷ Naraha imecotedeni motapa Deorrine bazima nauatorizarraricca uima ssamoqquiri naccarrari. Pouadenipa Zeso Cristoza toquerrena-rraraccazapa siba nauatoniza: —Parrissa icca deo −quequenanaccade. Rridapana naco siba nauatoniza bani da iquenauicca rripemanaza bodidenipa: —A pina siba nauatoniza uauatizemana narraridenissa inarraroqui? −quenarrari. Nazapa bodideni rrapariqquiri narrarirrine attidenipa: —Rraho, Deoza uima oppina tanicca inanarraro −quenarrari.

⁸ Nazama icca uima Deoza bica taniuarrinepe irriparrarocca uimarrine rrerani. Bani irripaza ibica-rrerani. Bani irripa-rraraza naco iaidira-rrerani.

⁹ Nazama siba nauatoniza bani da tauicca oppinera taui nauatoqquiri tiqueneraha parri, narraro uimaza timecotedeni rrapariqquiri narrarideni uimasiriza toquerrenarana, onarraro.

¹⁰ Arri nauatoqquiri tiquenarrarodeni siba nauatoniza bani dada iquenauiuarri rripaqquieza rraui tirrezimezape arra timecote rrapari tarrari rripade tiquerrenani qqui tazapa: —A, bani siba nauatoniza dada tauicca rripade oppinera tanitide. Oua naqui orripana −nazapa poua naco nauiuarri rripade toqquezimarana.

¹¹ Nazama tiadenipe: —Nauatoqquiri inani, oppinera tani −tiqueneraha tirrinedeni titesse rrapari tarraripa uima onihiza bodi carrimarraro. Cristopa pouatoui zoqqueraha tirrinedenina pocca rrehenirri tossamorraro.

¹² Nazama tirrinedeni timecotedeni rrapariqquiri narrari bodideni tossamorizazapa pouadeniza uima tinanemanarraro. Narrarope pina Cristoza uima tinanemanarrarossa narraro.

¹³ Ouape arrima onarraro: Orriparraroccazaha ouimecotedeni orrine uimasiri inanemanezape ouara bani bazima orripapoma-rreranitoui, naui ouimecotedeni uimasiriza oneuedimabaqqui-rrarauiuarrine.