1 Corintodeniza 7 - Kulina New Testament Brazil

Uenauenacca uimaza bodideni uatome-manauiuarrine

¹ Uima ouaza dozo tiquenaporrarope arrima nade: —Maqquiderre amonerre carri-rraraza madiui bica taqui? −tiquenade. Rridapanana narraro uima ouacomerana. Rrehe, maqquiderrepa amonerre carri-rraraza madiui bica tani.

² Naraha uananehepe carririzani. Narraro noppineni amonerre titicarrimaneri nanina bica tani. Ticcadeni amonerre ohorrariri narri. Amonerre naqui maqquiderre ticarrimanezape ticcadeni maqqui ohorrariri narro, onarraro.

³ Nazama tecarrirezape ticcadeni amonerreza tiadeni accoraqquiri tiquenana, ticcadeni uima bica taniuarrine. Amonerre naqui tecarrirezape ticcadeni maqquiza tiadeni accoraqquiri tiquenana, ticcadeni uima bica taniuarrine.

⁴ Maqquiderre amonerre tazarrani cacarrirezapa amonerre assiranipe ponicca rrerani. Maqquina poni assirani rrinede. Maqquiderre naco poua assirepa pocca rrerani. Amonerrena poua assire rrinede.

⁵ Nazama maqquiderrepa pocca amonerreza poua ccaccocco-rrarana. Amonerre naqui ponicca maqquiza poni ccaccocco-rrerana. Naraha Deoza uatidera orrari naccaniuarrinepe ticca amonerre tazarrani rrehe ticanireza arranirri tinebocossemanaccani bica tani. Zotodena arranirri tidimemanapomana, onarraro. Nema tiquenerrerezape Tocorime-Tamine tiadeniza ssonacossazapa uimasiri tinanemanerana, onarraro.

⁶ Arri bazira tehe arranirri tinebocossemanaccani bica tani onarrarope tiadeni ozossebaqqui-rrerani. —Nema inana −tiquenezape nema tiquenani bica tani, onarraro.

⁷ Oua ouatti bodipe: Madirra ouahadenipa carrimaneraui pina ouassa quenauina bica tani, oneraha Deona parra. Pouana madirraza pocca danirri onihi onihi da inarizarraro. Madirra motapa amonerre rriraha madimanauiuarrine inaparrirebaqquirrari. Motapa amonerre inacarribaqquirrari.

⁸ Nazama maqquiderre tabiradeni, amonerre tabiradeni, arri maqqui zoqqueza amonerre tobaccopero tocarremanarraro maqquiderre bedimeni zoqqueza maqquiderre tobaccopero tocarremanarrari quenarraridenipa carrimana-rraraza pina ouassa quenauina bica tani.

⁹ Naraha tabira poua motta madiuiuarrine parrire-rraraza amonerre touini nazapa icarriniuarrine bica tani. Amonerre naqui maqquiderre toui nezape icarriuiuarrine bica tani. Carrimana-rraraza touini nacomehe dacorezape ocasserani auemanauitoui.

¹⁰ Nazama tecarrirerrarodeniza ouattipe: Ticanebore terrerarri, onarraro. Nema onarrarope ouatti rrerani. Ia Zozossede Deo pocca zossenirri. Amonerre maqquiderre carrirrarope ponicca maqqui inebo-rrarauiuarrine.

¹¹ Naraha amonerre maqqui inebozapa maqquiderre rrirehe carrirani madi-zanapona, onarraro. Maqquiderre rrirehe madide nacassera tezape ponicca maqqui tezerre poccadeni uima icattememaneza touacarrireni-pomauiuarrine bica tani. Maqquiderre naco nama nauiuarrine, pocca amonerre inebo-rreraniuarrine.

¹² Nazama tiadeni motaza naqui uati onarraro. Arrirraro uimape ia Zozossede Deo pocca rrerani. Oua occa marinarra. Arri timecotedeni orrariacca amonerrepe Zeso Cristocca rrereraha pouaza madi-zanaponiuarrine nacassa tezape peperri, madina. Pocca amonerre inebo-rrerana, onarraro.

¹³ Nazama timecotedeni orrariecca maqquipa Zeso Cristocca rrararaha poniza madi-zanapouiuarrine nacassa tazapa paparra, madina. Ponicca maqqui inebo-rrarana, onarraro.

¹⁴ Nazama Zeso Cristocca rrararraripa bedimeni rrehe narraroza madizapa poccadeni carrinarracca uima Deoza bica tani. Amonerre Zeso Cristocca rrerarraro naqui ponicca maqqui rrehe narrariza madizape poccadeni carrinarracca uima Deoza bica tani. Poccadeni erredenideni naco pina madirra Deo Atti ssamoqquiri narraridenicca erredenissa quenauitouiraha nama quena-rraraui. Pouadeni naco Deoza bicaqquiri narrari.

¹⁵ Naraha Zeso Cristocca rrerarraro ponicca maqqui rrehe narrari inebouiuarrine touini nezape peperri, poua ineborrari. Maqquizape uima nouerani. Pouaza carrinarracca uima rricani. Zeso Cristocca rrararrari bedimeni rrehe narraro ineboniuarrine touini nazapa paparra, poni ineborraro. Bedimenizape uima nouerani. Poniza carrinarracca uima rricani. Deopa pocca madirra mouaraza rronehema madimanauiuarrine touini narrari.

¹⁶ Tibodideni uatome-manarri: Arra ticca maqqui Zeso Cristocca rrararrari tezerre timadi-zanapozape pouapa Deoza torrauitide. Ssamo tinani. Ticca amonerre Zeso Cristocca rrerarraro tazarrani timadi-zanapozape ponipe Deoza torranitide. Ssamo tinani.

Deo iaza uaua napoza icca madie narrarossa narraroza imadi-zanaponiuarrine

¹⁷ Arri ticcadeni madiecca uimape pina tecarrireza, tecarrire-rrereza naqui Deo tiadeniza uaua napozapa narrarossa narraroza timadimana-zanaporri. Narraro uimape Zeso Cristoza totoqueriqquimana nauiuarri bazimaza uati onarizarraro.

¹⁸ Madirra zodeodenicca tozopori eteroni cotani uissinarra carriporrari Deo pouaza uaua nazapa nama naha madiuiuarrine bica taui. Tozopori eteroni cotani uissinarra cappirarrari naco Deo pouaza uaua nazapa nama naha madina.

¹⁹ Narraro uissinarra ticarrimanerre ticappiremanerre narraro uimape ponimacca. Narraro uimazape Deoza ibica-rrerarraro. Deoza ibicaniuarrinepe pocca zossenirriza ibora inezana bica tarraro.

²⁰ Nazama tiadenipe Zeso Cristoza tiquerrenaniuarrine Deo tiadeniza uaua napozapa ticcadeni madie narrarossa narraroza timadimana-zanaporri.

²¹ Madirracca zozosse tirraporraro Deo tiaza uaua nazapa peperri, madirracca zozosse tirrazanaporri. Narraro uimaza tibodi uatoto cane-rrerarri. Naraha tia zossede tia tappa tauiuarrine nacassa taza tiaza paparra nazapa tiara timadini bica tani.

²² Nazama arra madirracca zozosse Zeso Cristoza torrazapa pina madirra tappa tabaqquirraridenissa narrari, poua Zozossede Zeso Cristoza zepe irriuiuarrine. Madirracca zozosse torra-rrararrari naco Zeso Cristoza torrazapa pina Zeso Cristocca zozossessa narrari, pocca zossenirriza ibora tauiuarrine.

²³ Deopa timanaconedeni uatini ccara tarraroza tiadeni mitta tabaqquirrari, pocca tiquerrenaniuarrine. Deocca zozosse tiquerrenarrarope madirracca zozosse tiquerrena-rrerarri.

²⁴ Ouimecotedeni, arri Zeso Cristoza tiquerrenaniuarrine Deo tiadeniza uaua napozapa ticcadeni madie narrarossa narraroza timadimana-zanaporri, onarraro.

Zouato tabiradeni tarroranideniza naqui Paoro uati tarrari

²⁵ Rridapana zouato tabiradeni tarroranicca uima uati onana. Narraro uimape ia Zozossede Deo pocca zossenirri rrereraha pouapa ouaza bica taza oua tonauattarrari. Nezape ouattiza parrissa tiquenaniuarrine bica tani.

²⁶ Rridapanape arrirraro zamaza ocasserani erizarraro. Nema nezape maqquiderre amonerre carrimana-rrararraridenipa nama zanapomanauiuarrine bica tani. Carrimanarrarideni naco nama zanapomanauiuarrine bica tani, onarraro.

²⁷ Amonerre ticarrimanarrarodenipe ticcadeni amonerre nebomana terrerarri. Amonerre ticappiremanarrarodenipe amonerretoui tarizemana-rrerarri, onarraro.

²⁸ Naraha amonerre ticarriniuarrinepe uimasiri rrerani. Amonerre tabiradeni tarrorani naqui maqquiderre carrimanani bica tani, uimasiri rrerani. Naraha tecarrirezape parri, arrirraro zamacca ocasserehe tiadeniza ssonarinitoui. Narrarorrine occa uima tiadeniza rridapana dozo onarraro, tecarrire-rreraccazama timittemananiuarrine, nani zotodepe orri tiquenerreraniuarrine.

²⁹ Ouimecotedeni, arri uati uati onarrarocca uimape arrima narraro: Iape uarrano uapi taha imadi-rrerani. Nazapa maqquiderre amonerre carrimanarraridenipa pina arra amonerre cappiremanarraridenissa quenana.

³⁰ Orri orri quenarrarideni naco pina orri quena-rrararraridenissa quenana. Uatizemaneri narrarideni naco pina uatizemana-rrararraridenissa quenana. Tozepetarri mimittadedeni naco pina tozepetarri cappiremanarraridenissa quenana.

³¹ Arrirraro zamacca biquehe carrimanarrarideni naco pina narraroza zepedeni irrimana-rrararrarissa quenana. Arrirraro zama qqui inarrarope rricanitoui.

³² Arrirraro zamaccaza tizepedeni irrimanezape narrarotoui tibodideni uatoto canarraro. Naraha narrarotoui tibodideni uatoto cane-rreraniuarrine touini onani. Maqquiderre tabiradenipa ia Zozossede Deozara zepedeni ihirrimana narrari. Bodidenipa: —Nerrecoma onanezana Deo onauatizeuiuarrine? −quequenanarrari.

³³ Naraha amonerre carrimanarraridenipa arrirraro zamaccatoui, poccadeni amonerre inauatize-baqquimananiuarrine toui bodideni uauatomana narrari.

³⁴ Nama quenazapa pouadeni bodicca uatouepe caroberraro. Amonerredenicca uima naqui pina maqquiderreccassa narraro. Amonerre zouato tarrorani maqquiderre cappiremanarrarodenipe ia Zozossede Deozara zapanideni ihirrimana narraro. Ponideni assiranima, bodinidenima Deozara uauatizemana narraro. Naraha amonerre maqquiderre carrimanarrarodenipe arrirraro zamaccatoui, ponidenicca maqqui inauatize-baqquimanauiuarrine toui bodinideni uauatomana narraro.

³⁵ Ticcadeni madie tiadeniza narro taniuarrine uati onerrerani. Tiadeni acco ocanabaqquiniuarrinena uati onarraro. Ia Zozossede Deoza tizepedeni irrimana-zanapozape pouaza timadimananissa taniuarrine. Uima onihi touini tiquenerrerezape Deotouira dameraqquiri tiquenaniuarrine oneza tiadeniza dozo onarraro.

³⁶ Zabisso zouato tarrorani icarriniuarrine touini nazapa imehiza uati tapoza ponicca uarrano bacco tezape cacarrireui bica tani. Narrarope uimasiri rrerani.

³⁷ Naraha maqquiderre ouahapa: —Amonerre rrirehe omadina −nazapa amonerre rriraha madiui bica tani. Pouaza: —Amonerre ticarrirri −quena-rraraza, poua cacauauiuarrine naco bodi nauato tazapa poua motta madina, onarraro.

³⁸ Maqquiderre amonerre carriza bica tani. Carri-rraraza naco denima bica tani, onarraro.

³⁹ Nazama amonerre maqqui carrirrarope ponicca maqqui madiccazapa pouaza madizanapoccaniuarrine, inebo-rrarana. Naraha ponicca maqqui zoqqueza poni nacassa tezape maqquiderre ouaha Deoza rrehe narrari icarriui bica taui, onarraro.

⁴⁰ Naraha amonerre ponicca maqqui zoqquezapa maqquiderre ouaha icarripoma-rrarazana denima bica tani. Nema nezape poni bodini bica tehe madi-zanaponiuarrine, onarraro. Ouatti nema onarrarope Deo Corimerrine obodi nauato teza uati onarraro.