1 Corintodeniza 4 - Kulina New Testament Brazil

Zeso Cristocca zozosse tabaqqui zepedeni irrimanarrari tauimari

¹ Tiadenipe icca uima tibodideni uatome-maneza arrima tiquenarri: —Paorodenipa Cristocca zozosse, pocca zozosse tabaqqui toquerrenarrari. Deo pocca uima bicani auatora taporraro maride icazossebaqquirrariua −tiquenarri, onarraro.

² Nazama zossehe carrimanarrarideni pouadeni zossedecca zossenirri inaparriremananissa taniuarrine. Nama nazapa pouadeni zossede, madirra bazima naco pouadeniza: —Rrehe, tirrinedeni bica tani −quenauitoui.

³ Nazama ouaza nerrecoma tiquenani? Pina oua zossedecca zossenirrissa onanarraroqui? Occa marinarra tinoccozemaneza naqui tiadeniza bica terre, bica terrererre naraha narrarope uima bedeni. Arrirraro zamacca uima cacattemadedeni occa uima icattememaneza naqui obodi uatoto cane-rrerani. Arri oua naqui: Orrine bica tani, bica terrerani, onerrerani.

⁴ Obodi uatomezape: Uima ocappirani, oneraha uima ocarrinitide. Oua Zozossedena obodicca uima nauato tarrari. Pouana obodicca, ozepe irriecca nattomede parrireui.

⁵ Nema narraroa ia Zozossede ccanipoma-rraraccazapa tiadenipe madirracca uima nattome tiquenerrerarri. Titessedeniza: —Tirrinedeni uaidira tani −tiquenerrerarri. Niza ia Zozossede ccanipomazana poua ssiuerreneza uima bazima auatoma-rizanitoui. Arri ia bazima ibodicca uima ecomarraro pouarrine auatoma, ibodiza touini inarrarocca auatoma narizanitoui. Nazapa bica inanarraroccaza Deopa iaza: —Tirrinedeni bica tani −nauitoui.

⁶ Ouimecotedeni, arri Aporo tauimari uati, oua otauimari uati onarrarope ticauattereza ticcadeni uima tobicaniuarrine. Itauimariza ticauatterezape Deocca zossenirri dozo naniza uima onihi tinauarimane-rreraniuarrine. Arri itauimariza ticauattereza naqui tiadeni maride orraria deni tinanemana-rrarauiuarrine. Pina tiadeni marideza tetizemaneza: —Ia maridepa deni torraui −tiquenezape ouahapa arramani tinanemanarrari.

⁷ Naraha nerrecorrarina titessedeni arramani inanabaqquiza tiadeni deni tonanabaqquirrari? Naraha tiadeni bazimape pina titessedenissa tiquenarraro. Bazima ticarrimanarrarope Deo tiadeniza da inarizarraro. Pouarrine ticarrimanezape: —Ia motta nauatoqquiri inarrarorrine icarrirraro −tiquena terrerarri.

⁸ Tiadenipe pina sseqquiri narraridenissa tiquenarraro. Touini tiquenanicca bazima ticarrimanani. Tiadeni acco icanabaqquiniuarrineraha iaza nacasseraqquiri tiquenarraro. Pina taminessa tarizemanarraro. Rraho, tamine tiquerrena naccaraho! Ia naqui tiadenizama zossede iquerrenanitouiraha.

⁹ Obodizape: Zeso Cristocca zozosse tabaqqui iquerrenarrarope Deorrine zotodeuarri iquerrenarrarossa inarraro. Pina tozepe toquerrenarrarideni rricauiuarrinessa inaniuarrine Deo ia tonanarrora-baqquirrari nitiderra, onarraro. Iape pina rrizaqquiri inarrarossa ineza arrirraro zamacca madirradeni, Deocca zozosse tabaqqui memeuarricca tezerre ia qquide cattomama canarrariparra.

¹⁰ Arri iape Zeso Cristoza damamera inarrarorrine iaza: —Ssamoqquiri naui −quenaraha tiadenizapa: —Zeso Cristocca nauatoue carrimanaui, nauatoqquiri naui −quequenanarrari. Iazapa: —A, rrapariqquiri naui −quenaraha tiadenizapa: —Dacoraqquiri naui −quequenanarrari. Ia arramani tonanabaqqui-manaraha tiadenizana: —Deni toquerrenaui −quequenanarrari.

¹¹ Icca uimape arrima narronarraro: pemi imadi, ibacco rrocohe imadi, etero icappirehe imadi narronarraro. Madirrarrine uauacca iquerrena narronarraro. Imadiniuarrine oza icappirehe imadiriza narraro.

¹² Izepe irriza naqui rrao iquerrenehe imadirizarraro. Madirra naco ia totamasso-baqquimana naraha uima bicanira pouadeniza ehecomera narraro. Ia totonarrizo-baqquimana naza naqui nema nehe ihinauana narraro.

¹³ Madirra ia totamasso-baqquimanaza naqui mouaraza etti bica teza attideni ehecomera narraro. Ia uauattarro tonanabaqqui-manazapa pina zama nemanehecca nebouibotessa inarronarraroa arrirraroparri.

¹⁴ Nazama arri tiadeniza dozo onarrarope ticappinemananiuarrine rrerani. Ticcadeni uima tobicaniuarrine oneza tiadeniza dozo onarraro. Tiadenipe pina occa erredenissa tiquenarraro. Tiadeniza ouati uana tani.

¹⁵ Arra Zeso Cristo tauimari maride tiadeniza touapizapa pina 10 mil quenauitide naraha tiadeni maride pina ticcadeni abissa narraripa uapi tarraraui. Arri ouana pina ticcadeni abissa onarraro. Zeso Cristo tauimari icassiuaueraniuarrinecca tiadeniza uati uati onarrarorrine pouaza rrehe tiquenarrarode.

¹⁶ Nema nezape tiadeniza arrima onarraro: Pina arri occa madiessa tinanemanarri, onarraro.

¹⁷ Nema onezape tiadeniuarri Timotira zosse onarrari. Pouapa orrine Zeso Cristoza torrazapa pina occa erredenissa narrari. Pouaza ouati uana tani. Pouapa ia Zozossede tauimariza damera tarrari. Occa marinarra pina Zeso Cristo mari mari narizarrarissa narraro tiadeniza uati tauitoui, tibodideni uatome-mananiuarrine. Narraro marinarrape arri Zeso Cristoza quequeriqquimana nauiuarri mari mari ohocanarizabaqqui narrarissa narraro.

¹⁸ Naraha motadeni attidenia: —Ia motta nauatoqquiri inani −quequenanarrari. Narraridenipa ouaza cappinemana-rraraza: —Paoropa ia qquide ccarrona-rrarauitoui −quenarrari.

¹⁹ Naraha nani tiadeni qquide occabote nani. Ia Zozossede touini nazapa occanitoui. Niza tiadeniuarri bacco onezape arra —Nauatoqquiri inani −quequenanarraridenicca madie qqui onarizanitoui. Pouadenipa uima uatide nauatoqquiri naraha parrissa Deocca dacorehema madimanarrarico? onarraro.

²⁰ Deocca cacaueheza iquerrenezape uima uatidera nauato inani orrari-rrerani. Deocca cacauehepe pocca dacorehema imadirrarona parri.

²¹ Niza tiadeniuarri oqquezape ouatti dacorarraroza tiadeni onarrizobaqquirrarossa onaniuarrinequi? Touati uanehema ouatti bica tarraroza tiadeniza uati onaniuarrinerane? Nezape nerrecorrarozana nacassaqquiri tiquenani? onarraro.