1 Corintodeniza 3 - Kulina New Testament Brazil

Deo Atti maridedeni bazimapa Deoza zepedeni irririzemanarrari

¹ Ouimecotedeni, tiadeni mari ocanabaqquipozape pina Deo Corime carrimanarrarideniza uatidessa onerrerade. Timittemananiuarrine tiparriremane-rrerezape tiadeniza pina madirra arrirraro zamacca touini quenarrarideniza uatidessa onarrarode. Zeso Cristo tauimari tiadeniza uati onezape pina erredeniza uatidessa onarrarode.

² Occa marinarra narrora taniccazara tiadeni mari ocanabaqquiporrarode. Pina erredeni bedi zamatapa rripade ssamo taza zorrora da iquenarrarissa narraro tiadeniza nema onarrarode. Naraha rridapana naqui nema tizanapomanani parri naccani. Marinarra narro tanicca timittemananiuarrine tiparriremane-rreraccani.

³ Arri touini tiquenaniccatoui dameraqquiri tiquenaccarraro. Titessedeni carrimanarraricca acconi naqui tetedimana nani parri naccani. Titessedeni tezerre naqui arriuarri atti arriuarri atti titiquena nani parri naccani. Nema tiquenarrarorrinepe touini tiquenaniccatoui dameraqquiri tiquenaccani, onarraro. Tirrinedeni pina arrirraro zamacca madirrarrinessa tinanemanarraroparri.

⁴ Nazama tiadeni mota orraria attipa: —Ouape Aporocca −naraha timecote ouaha attipa: —Ouape Paorocca −nazapa tirrinedeni pina madirra Deo Atti ssamoqquiri narraridenicca uimassa tinanemanarraroparri.

⁵ Naraha tiadeniza ouattipe: Paoropa nerrecorrari? Aporopa nerrecorrari? Iape deni iquerrenaniccaqui? Nouerani! Ia ipamehepe Deocca zozosse tabaqqui iquerrenarraro. Tiadeni mari icanabaqquirrarorrine ia Zozossedeza parrissa tiquenarraroparride. Ia Zozossede ia tocazossebaqquiza izepe irrirrarode.

⁶ Oua Deo Atti mari mari onaporrarocca uimape pina tapa dappo onarrarissa narrarode. Aporo zotode tiadeni mari tocanabaqquirraripa pina tapa moro taza dope ecauarrarissa narraride. Tapa napirraripa Deona inanapirrarissa narraride.

⁷ Nazama arra tapa dappode, cacauade quenarraridenipa tapa moro inanemanauiuarrine ssamomo taui. Deo Pouana tapa inanapiuiuarrine nauato taui orrarirrari.

⁸ Arra tapa dappode, dope cacauade quenarraridenipa narrarissa caniqquimerarrari. Poccadeni tarabaia manaconipe pouadeniza Deo inaparrirenissa tanitoui. Pina pouadeni zepedeni irririzemanarrarissa nehe da inarizanitoui.

⁹ Nazama oua Aporo tezerrepe Deoza izepe ihirririza narraro. Tiadenipe pina Deocca uizarrassa, pina oza Deo icanauatorrarossa tiquenarraro.

¹⁰ Ouape pina oza nanauatode nauato tarrarissa onarraro. Deo ouaza bica taza Pouarrine Zeso Cristo tauimari tiadeni mari ocanabaqquirrarope pina oza ocanauatoza ueuema ppa oppirizarraro, ocanapiri narrarossa narraro. Orrine oza canapirirrarope Deocca zozosse ouahana rraca icananiuarrine, ouahapa coba icananiuarrine. Narraridenipa tiadeni maride toquerrenarrari pina oza rraca icanemanarrarossa, pina coba icanemanarrarossa quenarrari. Naraha rrarracadedeni, cocobadedeni bazimapa zepedeni panauissa tazana bica tani.

¹¹ Nazama ueuema bicani ppa oppirizehe narrorarrarope Zeso Cristoparra. Madirra ouaha ueuema onihi ppa ippirizaniuarrinepe ssamo tani.

¹² Nazama arri ueuema bicaboteza oza canapirirraro icanauatomananiuarrinepe oroza, prataza, siba uatini ccara taniccaza inauatorizemananitide. Madirra ouahapa pina tabaza, bobaza, minaza inauatorizemananitide.

¹³ Naraha niza madirra uapimacca uima cattemaniuarrinecca uada bacco tezape Deopa zippo rrororoniza madirra bazimacca tozepe irrie nattome ippinitoui. Narraro rrororonirrine madirracca uima bica tarrarocca, uaidira tarrarocca, ponimacca naqui Pouaza auato tanitoui.

¹⁴ Madirra zepe irrirraricca rrororoniza dirri tocane-rrerezape manaconi carriuitoui.

¹⁵ Naraha ouaha zepe irrirraricca dirri tocanezape bazima amossiuarranitoui. Pouana oppinani auaraha tossiuauauitoui. Pina madirra pocca oza dirri tocaneza rroppa taza zori tarrarissa nauitoui.

¹⁶ Tiadenipe arrirraro uima ssamoqquiri tiquenaccaqui? Arri Zeso Cristoza rrehe tiquenarrarope Deo pocca mamadi tiquerrenani. Arra Deo Corimepa tiadeniza mamadiriza narrari.

¹⁷ Deocca mamadipe ssiuarra, uisso tani. Narrarope tiadeni. Madirrapa Deocca mamadi inauaidirezape manaco Deo narrari madirra inauaidirauitoui.

¹⁸ Nazama tiadenipe tiadeni ticamaizanimana terrerarri. Arra tiadeni mota bodidenipa: —Iape arrirraro zamacca nauatoue bazima nauatoqquiri inani −quequenanaraha narraro uima nebomanauissa taza pina madirra ssamobotessa quenana, naui nauatoue parrisseheccara tocauatterauiuarrine.

¹⁹ Arrirraro zamacca nauatoqquiri narraridenicca nauatouepe Deoza ponima torrarraro. Deo Atti dozo nanizape arrima narraro: —Madirra arrirraro zamacca nauatoqquiri narrarideni poccadeni maizehe narroremanaraha Deorrine poccadeni maizeheza pouadenina touittani-manauitoui −nani nade Deo Atti dozo naniza.

²⁰ Deo Atti dozo nani onihi naqui: —Ia Zozossedepa arrirraro zamacca nauatoqquiri narrarideni bodideni uatoue nauato tarrari. Pouazape bodidenicca uatoue ponima torrarraro −nani nade Deo Atti dozo naniza.

²¹ Nazama madirrazara tetizemanana terrerarri. Tettidenipe: —Ia maridena denima bica tarrari. Pouaza iquerrenezape deni iquerrenarraro −tiquenanitide naraha nema tiquena rrerarri. Deopa bazima tiadeniza da inarraro, tiadeniza bica taniuarrine.

²² Oua Paoro, Aporo, Pedoro inarrarope ticcadeni iquerrenarraro. Arrirraro zama bazimacca tiadeniza torrarraro. Camittehe, zoqquehe, rridapanacca uima, niza zotodecca uima naqui narraro bazimape ticcadeni.

²³ Tiadenipe Cristocca. Cristopa Abi Deocca. Peperri.