1 Corintodeniza 2 - Kulina New Testament Brazil

Zeso Cristo aua porimacossaniza zoqquerrari tauimari

¹ Ouimecotedeni, Deocca parrissehe auatora taporrarocca tiadeni mari ocanabaqquiniuarrine oqquezape arrirraro zamacca deni toquerrenarrarideni attidenissa narraroza uati uati onerrerade. Nauatoqquiri narrarideni attidenissa narraroza naqui tiadeni mari ocanabaqqui-rrerade.

² Tiadeniza omadizape obodi uima onihi toui onerrerade. Zeso Cristo tauimarira ozepe irrina, onarrarode. Arra aua porimacossaniza poua zoqquerrari tauimarira uati uati ohonanarrarode.

³ Tibaccodeniuarri tiadeni maride oueza naqui ocappineza orraparizape tacca-cca ocanade.

⁴ Nazama ouattiza rrehe tiquenaniuarrine touatti nauatoue carriniccaza tiadeniza uati uati onerrerade. Tiadeniza uatide orreza, maride orreza naqui touatti narrora taniccazara uati uati ohonanade. Deo Corime oua acco canaza Deocca dacorehe auato onanarrarorrine occa marinarraza rrehe tiquenade.

⁵ Nema nezape Zeso Cristoza rrehe tiquenarrarope madirracca nauatouerrine rrerani. Deocca dacoreherrinena parri.

Deopa Poua Corime zosse inarrari, Deo pocca uima ia mari tocanabaqquiuiuarrine

⁶ Naraha rrehenirrirideni dacorarrarodeni maride iquerrenezape touatti nauatoue carriniccaza mari icanabaqquirrari. Narraro nauatouepe arrirraro zamacca rrerani. Arrirraro zama cacauadedenicca uima rrerani. Narraridenipa niza rricauitoui.

⁷ Arri mari mari inarrarocca nauatouepe Deo pocca. Pouarrine madirraza auatora taporraro. Nami nauato-rreraccazama Deo touini nazapa pocca uima inanarroraporraro, pocca deni torreheza iquerrenaniuarrine.

⁸ Narraro uimape arrirraro zama cacauadedeni mittemana-rrararrari. Rridacca Deocca uima mittemanazapa ia Zozossede bicabote deni torrarrari inanazoqquemana-rraranarra.

⁹ Naraha arri Deo Atti dozo naporrarozape arrima narraro: —Deo inanarroraporrarope pina arra qqui toquenapo-rrararraricca, mittemanapo-rrararraricca, bodideni uatouiuarrine ssamoqquiri naporraricca narraro uima bicani bazima Pouaza uatideni uanaqquiri narrarideniza inanarroraporraro −nani nade Deo Atti dozo naniza.

¹⁰ Deo Poua Corime icazosseza pocca uima iaza auato inanezape imittarraro. Deo Corimena Deo Poua inanarroraporrarocca qqui qqui zanapozapa nauato tarrari. Pouapa Deo Poua bodicca uima uapima nauato tauissa tarrari.

¹¹ Madirra uapi taraha nerrecorrarina madirra bodideni qquide nauato tarrari? Noueraui. Madirrapa poua bodicca uatouena nauato taui orrari naui. Narrarossa narraro madirrapa Deo bodi qquide nauato tarrarico? Noueraui. Deo Corimena Deo bodi qquide nauato taui orrari narrari.

¹² Nazama arri iaza da inarrarope arrirraro zamacca rrerani. Deo Poua Corimena iaza da inarraro. Pouapa iaza bica taza Poua Corime ia acco canarrari, Deo pocca uima bicani iaza inanarraro imittaniuarrine.

¹³ Nezape Deocca uima bicani tiadeni mari icanabaqquiniuarrinepe madirracca nauatoueza mari mari inerrerani. Deo Corime ia mari tocanabaqquirraricca touattina tiadeni mari mari ihicanabaqqui narraro. Nema inarrarope Poua Corime Atti deni torraniccaza uati uati ihinanarraro.

¹⁴ Naraha Deo Corime cappiremanarraridenipa Poua Corimecca marinarratoui quena-rraraui. Poua Corimecca marinarrape pouadeniza pina ponima narraro. Mittemanauissa tarraraui. Deo Corime carrimanarraridenizana pocca marinarra auato tarraro.

¹⁵ Deo Corime carrimanarraridenipa uima bazima qquide nauatoqquiri narrari. Pouadenipa: —Arrirrarope bica tani, arrirrarona bica terrerani −quenauiuarrine parriremanaui. Naraha Deo Corime cappiremanarraridenipa arra Deo Corime carrimanarrari bodideni uatoue ssamoqquiri naui. Pouadeniza naco: —Tirrine bica terrerani −quenauiuarrine ssamoqquiri naui.

¹⁶ Narraro uimassa narrarope Deo Atti dozo naporraroza arrima narraro: —Nerrecorrarina ia Zozossede bodi nauato tarrari? Madirra ia Zozossede mari icanauiuarrinepa parrireco? Noueraui −nani nade Deo Atti dozo naniza. Naraha ia Deo Corime icarrirrarodeni ibodi uatouepe pina Cristo poua bodi uatouessa narraro.