1 Corintodeniza 15 - Kulina New Testament Brazil

Cristo nauatonirraricca uima

¹ Ouimecotedeni, tetideni rrima-rreraniuarrine tiadeniza uati omanirraro. Zeso Cristo tauimari icassiuaueraniuarrinecca tiadeniza ouaccoraporrarode. Narraro uimaza rrehe tiquenezape tinebomana nerrerarraroa arrirraroparri.

² Arri icassiuaueraniuarrinecca uimaza damamera tinezape ticassiuarrerarraroparri. Naraha damamera tinerrerezape ponima rrehe tarizemanarraro.

³ Arri Zeso Cristo tauimari ouattaporrarocca tiadeni mari ocanabaqquirrarope denima bica tanicca. Narrarope arrima narraro: Cristopa icca uimasiri manaconi zoqquerrari, pina Deo Atti dozo iquenaporrarossa narraro.

⁴ Cristo uatiaza ppa izemanaraha uada 3 nazapa nauatonirraride. Narraro naqui Deo Atti dozo iquenaporraroza nema naporraro.

⁵ Nauatonizapa Pedorozaha auatoniporrari. Naui zotodepa poua uatimadedeni 12 quenarrarideniza auatonipomarrari.

⁶ Naui zotode naco pouaza rrehe quenarrari 500 quenarrari, naraha denima uitiderra, narrarideni bazima queriqquimanauiza auatonipomarrari. Narrarideni motapa arrirraro uima teppe dozode orreza madimanauiparra naccaui. Naraha mota pamadema nahapa rricarizapoui.

⁷ Naui zotode Tiacoza naco auatonipomarrari. Naui zotode naco pocca zozosse tabaqqui bazimaza auatonipomarrari.

⁸ Naui zotode rricariuiccapa ouaza auatonirraride. Ouape pina erredeni poua tossonauicca uada bacco tarraraccaraha tossonaporrarissa onarraro. Ouape Zeso Cristoza rrehe onapo-rrereraha ouaza auatozana pocca orrarrarode.

⁹ Nazama Zeso Cristocca zozosse tabaqqui taideccapa bicaqquiri naraha ouape arrimani orrarrarode. Taidepe Zeso Cristoza toquerrenarrarideni Deo Attiza totoqueriqqui narrarideni ohonarrizobaqqui naccade. Zeso Cristocca zozosse tabaqqui orraniuarrine bica onerrereraha Zeso pouarrinena pocca zozosse orrarrarode.

¹⁰ Naraha Deopa ouaza bica tarrari. Occa narrizoue peperri inanarrarode. Oua catizezapa pocca zozosse orrarraro. Pocca biquehe naqui ponima ouaza torra-rrerani. Narrarorrinena Pouaza ozepe irrinissa tarraro. Nazama motadenipa arramani zepedeni irrimanarrari. Naraha ouana denima ozepe irrirraro. Arri ozepe irrirrarope orrine rrerani. Deo oua acco canaza ozepe irririzarraro.

¹¹ Naraha: —Nerrecorrarina denima zepe irrirrari? −inerrerana. Arri tiadeni mari ocanabaqquirraroa arra Zeso Cristocca zozosse tabaqquideni naco occa marinarrassa narraro tiadeniza mari mari quenarrariparra. Narraroa arri tiadenipe narraroza parrissa tiquenarraroparri.

Rricarraridenipa Deo inauatonibaqquiuitoui

¹² Naraha icca marinarrape: —Cristopa zoqqueraha Deorrine nauatonirrari −ihinanezape nerrecotoui tiadeni motaha: —Rricarraridenipa nauatonimana-rrarauitoui −titiquena narraro?

¹³ Rridacca nauatonie nouerezape Cristo naco nauatoni-rraranarra.

¹⁴ Cristo nauatoni-rrarazapa icca marinarra ponima torranitouiraha. Ticcadeni rrehenirri naqui ponima torranitouiraha.

¹⁵ Parrissa nauatonie nouerezape icca marinarra arri: —Deorrine Cristo nauatonirrari −ihinanarrarope Deoza maizehe inananerre. Parrissa nauatonie nouerezape Cristo nauatoni-rraranarra.

¹⁶ Arri tettideni: —Rridacca rricarraridenipa nauatonimana-rrarauitoui −titiquena nezape Cristo naco nauatoni-rraranarra.

¹⁷ Parrissa Cristo nauatoni-rrarazapa ticcadeni rrehenirripe ponima torranerre. Ticcadeni uimasiri naqui tiadeniza nema zanaponerre.

¹⁸ Rridacca narraro uima parrissa torrezape arra Zeso Cristoza rrehe quenarrari rricaporraridenipa parra amossiuarrariui nanarra.

¹⁹ Cristo iaza uima bicani inananiuarrine touini imadirraro. Naraha arrirraro namizara uima bicani iaza torrani orrari nezape pina touati nauanaqquiri narraridenissa ineraha iape denima touati nauanaqquiri inanerre.

²⁰ Naraha Cristopa parrissa nauatonirrari. Pouapa pina uizarracca zamatapa taidecca bite quenaporrarissa narrari. Cristo taide nauatoniporrarirrine madirra bazima naco zotode nauatonirize-manauitoui.

²¹ Nazama madirra orrariacca uimarrine arrirraro namiza zoqquehe madirraza torrarraro. Madirra orrariacca uimarrine naqui madirra zoqquemanarrarideniza nauatonie torrarraro.

²² Adao potemaui iquerrenarrarorrine ihizoqque narraroparri. Cristoza iquerrenarraro naqui izoqqueraha pouarrine imadipomanitoui.

²³ Naraha iape zotode iquerrenarraro. Cristona taide nauatoniporrari. Niza Cristo ccanipomazapa ia bazima pocca iquerrenarraro inauatonirizanitoui.

^24-26 Nani zotodepe arrirraro zama rricanicca uima torranitoui. Nazapa cacauehe carrimana, dacorehe carrimana, nauatoue carrimana narrarideni uapima Cristorrine rricarizauitoui. Cristo deni torrazapa poccadeni dacorehe naqui inarricanitoui. Nazapa pouana memeuarricca, namiuarricca bazima zossede torrauitoui. Bazima ecauabaqqui-zanaporraria pocca uadidedeni bazima arramani inanabaqquiuitoui. Poua uauadi rricauicca inarricazapa madirra denima zoqquemana-rrarauitoui. Narrarope zoqquehe rricarraro. Nazapa Cristo pocca Abi Deoza pocca cacauehe da inanitoui.

²⁷ Deorrine Cristo deni torrazapa bazima arramani toquerrenarrari. Pina poua amori bacconiuarri toquerrenarrarissa quenarrari. Naraha narraro uima timittemanezape: —Deo naco Cristoza arramani torrarrarico? −tiquenanitiderra. Noueraui. Pouarrinena bazima Cristoza toquerrenarrari.

²⁸ Deopa uapima Poua Bedi Cristoza iboraqquiri inanabaqquizapa Cristo naco Imehi Deoza ibora tauitoui. Rrehe, Deorrinepa bazima Cristoza toquerrenarrari. Nazapa Deoza bazima iboraqquiri narrari. Pouana zosse zosse naui orrari narrari.

²⁹ Nauatoniecca uima denima uati onana. Arra timecotedeni motapa poccadeni madirra passo dopaniza niniqui rriraha rricarrari onideniza passo dopaniza niniqui carrimanaraha nerrecotoui nama quenarrari? Parrissa rridacca madirra nauatonimana-rrarazapa passo dopaniza niniqui rriraha rricarrarideni naco nauatonimana-rraranarra. Nazapa pouadeni oniza passo dopaniza niniqui carrimanarraripa ponima.

³⁰ Ia naqui nerrecotoui oppineheza imadirizarraro? Rridacca nauatonie nouerezape ponima oppinani erizanerre.

³¹ Ouimecotedeni, parrissa uati onarraro. Ouape uada uarrirriraza oppinehe onihi onihi onauanarizarrarorrine ozoqquebote narizarraro. Narrarope parrissa, pina parrissa tiadeni ia Zozossede Zeso Cristoza tiquerreneza ouatizerrarossa narraro.

³² Arri Epesoza omadiza naqui ozoqqueniuarrine madirra otoui inacomarizemanarraro, pina zomarri uadi tarrarissa quenaui. Pouadeniza Deo Atti maride damera oneraha poccadeni uadie onauanani manaconi nerrecora ocarrirraro? Rricarrarideni parrissa nauatonimana-rrarazapa ponima maride ocasserani ouarizanerre. Nezape arra madirra ouaha attideni: —Rrari, irripana! Ze inana! Izamassa onihi irriquezape nemarade −quequenanarraridenissa inana.

³³ Parri, madirra attideni nama nama quequenanarraridenipa tiadeni tocamaizabaqqui-manarana. Arri uima titimittemana narrarope: —Madirra madieri bica tarrararrari titesse torrazapa ticca madie bicani amossi nanitoui −quequenanarrari.

³⁴ Tibodideni uatome-mananissa tarri. Ticcadeni uimasiri naqui tinebomanarri. Deoza ssamoqquiri narrarideni tiadeniza animanaui. Narraridenirrine ticomehimana-rreraqui? onarraro.

Essire inauatoninicca uimape arrima narraro

³⁵ Tiadeni motape arrima tiquenanitide: —Rricarrarideni nauatonimanauiuarrinepa nerrecoma quenapazarra? Assiredeni naco nerrecoma narrarora carrimanapazarra? −tiquenanitiderra.

³⁶ Paparra, tiadenipe ssamoqquiri tiquenarrarorane? Rrari, zamatapa nocco tauimariza tiadeni mari ocanabaqquina. Zamatapa nocco ppa tozarraripa naui namiza rraziraha moro tarrarina assire zati torrarrari.

³⁷ Tapatoui inezape ede ppa ppa inarrararrari. Noccona dappo dappo inarrari, moro tauiuarrine. Zamatapa ouaha nocco carririzarrari naco narrarissa narizarrari.

³⁸ Nocco assirepa pouara pouara narizarrari, pina Deo Poua nacassa tarrarissa inanarrari. Zamatapa moro tarrari naco Deorrine assire ouaha ouaha carririzarrari.

³⁹ Namiza madimanarrari assiredeni naco bazima narrarissa nariza-rraraui. Madirrapa assire ouaha. Bani assire ouaha. Bani eppe carriui assire ouaha. Aba naco assire ouaha narizemanarrari.

⁴⁰ Memeuarricca naco uapima assiredeni carririzemanaui. Arra namiuarricca naco bazima assiredeni carririzemanaui. Arra memeuarriccapa biquenedeni ouaha. Arra namiuarricca naco biquenedeni ouaha narizemanarrari.

⁴¹ Marri ssiuerrenepa pina abazico ssiuerrenessa narraraui. Abazico ssiuerrene naco amouadeni ssiuerrenedenissa narraraui. Amoua ssiuerrenedeni naco ouaha ouaha narizarrari.

⁴² Nazama ia naqui nema inanitoui. Izoqqueza inauatonizape essire onihi zatira icarrinitoui. Izoqqueza essire ppa izemanarrarope touaidirara tanicca. Naraha inauatonizape essire touaidirarera taniccana torrarraro.

⁴³ Etieza essire ppa tozani rrazizape touarrari nazi tehe torra tani. Naraha inauatonizape bicanira torranitoui. Arrirraro namiza imadirrarocca essirepe dacore-rrerani. Naraha inauatonizape essire dacoranitoui.

⁴⁴ Arri essire ppa ppa tozarrarope arrirraro namiza imadirrarocca. Naraha essire nauatonirrarope Deouarri imadiniuarrinecca. Deo madirra assire namiza madiuiuarrine inauatozapa memeza madiuiuarrinecca naco inauatorrari.

⁴⁵ Deo Atti dozo nanizape arrima narraro: —Taidecca madirra Adaopa namiza madiuiuarrine Deorrine camitta tarrari −nani nade Deo Atti dozo naniza. Naraha arra Cristo pouaza: Adao rricariuicca ihinanarraro pouana memeuarri madiuiuarrine parrirerrari. Pouapa camittehe rriquerreranicca da inarraro.

⁴⁶ Essire taideccape memeuarri imadiniuarrinecca rrerani. Essire taideccape namiza imadirrarocca. Zotodeccana memeuarri imadiniuarrinecca.

⁴⁷ Taidecca madirrapa nami nauatorrari, namiza madirrari. Zotodecca madirra memeuarriccapa Cristo.

⁴⁸ Arrirraro namiza essire imadirrarope pina Deorrine namiza madirra inauatoporrarissa inarraro. Niza memeuarripe essire pina memeuarri madirrari Cristossa inanitoui.

⁴⁹ Rridapanape pina madirra nami nauatorrarissa inarraro. Niza zotodena pina Cristo memeuarri madirrarissa inanitoui.

⁵⁰ Ouimecotedeni, tiadeniza uati onana: Arri namiza imadiza ime, emene icarrirrarope Deocca cacaueheuarri torra-rreranitoui. Poua madiuiuarripe touaidirarera tani. Essire touaidirara taniccape naniza madiniuarrine ssamo tani.

⁵¹ Naraha arrirraro uima tiadeniza uati onaniuarrinepe madirra mittemanapo-rrarauicca. Auatora taporaha rridapana tiadeniza uati onarraro. Madirra ia motape izoqque-rreranitoui. Naraha rricaporrari assiredeni, ia mota izoqque-rrerarraro essire bazima cacarriqquimera-rizanitoui.

⁵² Arrima nanitoui: Essirepe amazati cacarriqquimeranitoui, pina inocco pari pari narrarossa nanitoui. Niza rrorro rricauicca rrori rrori nazapa arri namiza imadirrarocca uima rricanitoui. Nazapa rricaporrarideni nauatonimanauitoui, rricapoma-rrarauiuarrine. Nazapa nauatonimanarrari assiredeni, camittaqquiri inaccarraro essire bazima cacarriqquimeranitoui.

⁵³ Arrirraro namicca essire touaidirara taniccape touaidirarera taniccara torranitoui. Essire uatiaha taniccape uatiehera taniccara torranitoui.

⁵⁴ Arri essire touaidirara tanicca rrica, uatiaha tanicca rrica nezape touaidirarera tanicca, uatiehera tanicca torrezape Deo Atti dozo naporraro parrirenissa tanitoui: —Zoqquehepe Deocca dacoreherrine rricarraro, amossi narraro −nani nade.

⁵⁵ Deo Atti dozo nani onihiza naqui: —Nirra Zoqquehe nerrecouarri ticca dacorehe? Nirra Zoqquehe nerrecouarri ticomene? −nani nade Deo Atti dozo naniza.

⁵⁶ Arri zoqquehe comanipe uimasiri. Narrarorrine madirra parri izoqquerinicca narrizoueza toquerrenarrariparra. Deocca zossenirri taideccape madirra uimasiri inanemanani pouadeniza auato inanarraro.

⁵⁷ Nazama ia Zozossede Zeso Cristo pocca dacoreherrine icca uimasiri inanamossiza izoqquezape iaza narrizoue noueranitoui. Nema nezape Deoza etizeza: —Rrehe, peperri. Tirrine bica tani −ihinanarraro.

⁵⁸ Rrehe ouimecotedeni, tiadeniza ouati uana tani. Uima nema nezape dacoco tirrireza nema tizanapomanarri. Ia Zozossede Deo pocca zossenirriza tizepedeni irrimanezape denima, denima tidameremanani narri. Arrirraro uimape nauatoqquiri tiquenani: Ia Zozossede Deoza tizepedeni irrirrarope ponima rrerani. Pouarrine tiadeniza uima bicani torranitoui.