1 Corintodeniza 10 - Kulina New Testament Brazil

Siba nauatoniza uauatizemana narraripa bica terrerani

¹ Ouimecotedeni, tetideni rrimemana terrerarri: Maittaccazama icca idideni Izarraeo potemauidenipa zama uamoni ssono carri, siba carri taniuarri rrauirizaza Deorrine meme esseni dopaniza rrauirizarrari. Ueni imehi oni Maccoui quequenanarrari Deorrine carobeza naco bazima rraui torreqquimarrari quenade.

² Arra Moize pouadeni cacauade torraza pouaza toquerrenarrarideni meme esseni dopaniza rrauirizaza, ueni rrippeuarri naco rraui torreqquimazapa Moize tezerre pina passo dopaniza niquinarra carrimanarrarissa quenarrari.

³ Zamatapa naco bazima Deocca danirriza rriparizemanarrari.

⁴ Passo naqui Deocca danirri. Sibaza qquenarraro ze ze narizemanarrari. Narraro sibape Cristo. Poua qqui toquena-rrararaha pouadeni ecauabaqqui-rizarrari.

⁵ Naraha narrarideni mota uapi taha pouadenirrine Deoza bica terrereza Deo Pouarrine rricarrari. Zama uamoni ssono carri, siba carri taniuarri assiredeni poponeri narizarrariparra quenade.

⁶ Nezape narraro uimaha ia mari tocanabaqquirraro, iape pina arra pouadeni uima uaidira tarraro touini quenarrarissa inerreraniuarrine.

⁷ Tiadenipe deo pouamaccaza tetizemane-rrerarri. Arrana, poccadeni nauatonirriza uauatizemana narraridenipa pina Deo Atti dozo naniza dozo naporrarossa quenarrari: —Madirradenipa rrassi tarizaza rripade toquerrena, zede toquerrena nazapa ssenede toquerrena nanarra narrari −nani nade Deo Atti dozo naniza.

⁸ Ia bazimape uananeheza iquerrena-rrerana. Arrana, pouadenina uananeheza toquerrenazapa Deorrine 23 mil naha amazati rricarrariparra. Pina pouadenissa inerreraniuarrine, onarraro.

⁹ Iape Cristo nattome inarrarana. Arrana, pouadenipa rramimanaza Deo nattome quenarrari. —Deocca narrizoue iaza noueranitide −quenaraha Deorrine motapa macca cca cca izeri nazapa rricarrariparra.

¹⁰ Parri, tedimaneza ponima Deoza atti atti tiquenerrerarri. Arrana, icca idideni Moizeza nacasseraqquiri naza atti atti quenazapa Deocca zozosse memeuarricca madirra nanarricade ccaronaza inarricarizarrariparra.

¹¹ Narraro uima icca idideniza torrarraro bazimape ia icauatteraniuarrine. Maittaccazama Deo Atti dozo iquenaporrarideni icca ididenicca uima dozo iquenaporrarope poccadeni uimaza ibodi uatonissa taniuarrine. Pina poccadeni uimassa inane-rreraniuarrine. Narraro uimape zama rricani touarriranicca uarranoza imadirraroza bacco narronarraroparri.

¹² Nema nezape tettidenia: —Icca rrehenirri dacorani. Iedima-rreranitoui −tiquenanitide. Nema tiqueneraha parri, tiedimemanerana. Uimasiri tinanemana-rreraniuarrine tiadeni tecauemananissa tarri, onarraro.

¹³ Uimasiri inananiuarrine ibodiza auatorrarope madirra bazimaza narrarossa narizarraro. Nazama tiadenipe nauatoqquiri tiquenarri: Parrissa Deopa tibodideni acco tocanabaqquiuitoui. Uimasiri dacoraniccaza tierrizemananiuarrine tiparriremane-rrerezape Deona ecossaponitoui. Uimasiri tinanemananiuarrine auatozape tiedimemana-rreraniuarrine Deo tiadeni tonadacora-baqquiuitoui.

¹⁴ Nema nezape tiadeniza ouati uana teza uati onarraro: Ouimecotedeni, arra siba nauatoniza uauatizemana narrarideniza tiarrimanani narri, onarraro.

¹⁵ Arri tiadenipe uima mittade nauatoqquiri tiquenani onezape tiadeniza uati onarraro. Occa marinarra bica taqui? bica terreraqui? Tibodideniza nattome tiquenarri.

¹⁶ Arri Zeso Cristocca rripaqquiecca zeze equidiza Deoza: —Peperri, ticca danirri bica tani −ineza ze ze ihinanarrarope poua emene toccarraricca uimaza bazima irrariqquirraro. Arra pao icanaroberizaza ihirripa narrarope poua poua ime ccaccorarraricca uimaza bazima irrariqquirraro.

¹⁷ Iape uapi ineraha pao orrariaza irripaqquirrarorrinea itassaqquirraro. Pina essire orrarirrarossa inarraroparri.

¹⁸ Nazama Izarraeo potemaui zodeodenicca uimaza naqui tibodideni uatomanarri. Arrana, bani Deoza da iquenauicca rripemanazapa narraro uimaza orrariqquimanarrari. Narraro uimaza naqui Deoza uatizemanarrari.

¹⁹ Ouatti nema onarrarope siba nauatonipe dacorehe carrini, onerrerarraro. Siba nauatoniza bani da iquenauicca naco pouama. Dacorehe cappiraui.

²⁰ Ouattipe arrima narrarona parri: Madirra Deoza ssamoqquiri narrarideni poccadeni danirri siba nauatoniza da da iquenarraripa Tocorime-Taminecca zozosse tocorimedenizana da da iquenarrari. Icca Deoza rraraui. Tiadeniza uati onana: Tocorimedenicca uimazape ticarrimemana terrerarri, onarraro.

²¹ Ia Zozossedecca rripaqquiecca zeze ze tiquenaui natti tocorimeza da tauicca zeze ze tiquenaniuarrinepe bica terrerani, oppina tani. Ia Zozossedecca rripaqquiezara tirripemanani orrari naniuarrine. Tocorimedeniza uatizemanarraricca rripaqquieza tirripemananipe bica terrerani, oppina tani, onarraro.

²² Arrina, tocorimedeniza uatizemanarrarideni tezerre icarrimezape ia Zozossede Deo ia tocauadibaqquiuiuarrine touini inarraroqui? Nerrecorrarina denima dacorarrari? Iana Pouaza denima dacoraqquiri inarrarorane? Nouerani!

Itesseza eti uana tezape pocca rrehenirri inassamo-rreraniuarrine

²³ Madirra attidenipa: —Iaza oppina tanicca nouerani −quequenanaui titimittemana narraro. Naraha ouattipe: Parri, touini tiquenanicca motape tiadeni acco cana-rreranitide, onarraro. Narraro touini tiquenanicca tiadenizape oppina terreranitide naraha ticcadeni rrehenirri, timecotedenicca rrehenirri todacora-rrerani.

²⁴ Tiadeniza bica tanicca torraniuarrinera tibodideni uatomemana terrerarri. Madirra ouahadeniza naqui bica tanicca torraniuarrine tibodideni uatomanarri.

²⁵ Arra bani dadaza bani da tauicca bazima tirripemanauiuarrinepa bica taui. —Arrarrari banipa siba nauatoniza da iquenaporrariccaco? −tiquenerrerarri. Narraro uima tibodideni uatomana terrerana.

²⁶ Arri zama nemanehepe ia Zozossede Deo pocca. Arrirraro zamaza anirizarrari uapima naco ia Zozossede Deo pocca. Narraro uimape Deo Atti dozo naniza anirraro.

²⁷ Nazama madirra ouaha Deocca rrararaha tiadeniza: —Rrina, occa ozauarri tirripemanarri −nazapa nacassaqquiri tiqueneza pocca ozauarri tirripemanani bica tani. Rrirripa tiadeniza da iquenazapa ticappinemana-rrereza tirripemanarri. Tibodideniza: —Arrarrari banipa siba nauatoniza da iquenaporrariccaco? −tiquenerrerarri.

²⁸ Naraha madirra ouaha tiadeniza rriparrari attipa: —Arrarrari banipa siba nauatoniza da iquenaporrariccaraha −nazapa tirripemana terrerana, naui poua atti timittemanani auato taniuarrine, poua naco tirrinedeni bodi rraborreri narrarauiuarrine.

²⁹ Narrari bani tirripemana-rrerarri onarrarope tibodideni uarro naniuarrine rrerani. Titessedeni bodi rraborreri narana oneza tiadeniza uati onarraro. Obodipe: Zeso Cristorrine bazima ouaza toppinerazape nerrecotoui ouimecote ouaza: —Tirrine bica terrerani −nauiuarrine?

³⁰ Ouape orripabote neza Deoza: —Peperri, tirrine bica tani −onezana ohorripa narraro. Naraha nerrecotoui ouimecote ouaza: —Narrari tirripazape bica terrerani −narrari?

³¹ Naraha tiadenipe arrima tinanemananina bica tani: Tirripemaneza, ze tiqueneza, tizepedeni irrimanarraroza naqui Deocca biquehe, pocca deni torrehe madirraza auato tinanemanarri, onarraro.

³² Madirra ouahadeniza ticcadeni madie uaidira tinanemana-rrerarri. Zodeodeni, zodeo querrena-rrararrarideni, Deoza quequeriqquimana narrarideni naco ocasserani tinauabaqqui tarrararro.

³³ Ouape arrima onarraro: Madirra bazimaza uima bicani onananiuarrine damera onarraro. Ouazara bica tanicca torraniuarrine touini onerrerani. Madirra ouahadeniza naqui bica tanicca torraniuarrine. Pouadeni naco Zeso Cristoza toquerrenaza tocassiuauerauiuarrine, onarraro.