Zefaniya 2 - Kinyarwanda Bibiliya Ntagatifu

Ngaho nimugarukire Uhoraho!

¹ Nimwisuganye, bantu mutagira isoni, ngaho nimwisuganye,

² mbere y’uko mutumurwa mu munsi umwe, nk’umurama utwawe n’umuyaga, mbere y’uko mugwirirwa n’umujinya ukaze w’Uhoraho, mukagwirirwa n’umunsi w’uburakari bwe!

³ Ahubwo, nimushakashake Uhoraho, mwebwe, abiyoroshya bo ku isi mwese, mugakurikiza amategeko ye! Ngaho, nimuharanire ubutungane n’ubwiyoroshye; ahari byazabaviramo kubona aho mwikinga, ku munsi w’uburakari bw’Uhoraho!

II. AMAHANGA ABURIRWA Abanzi b’iburengerazuba: Abafilisiti

⁴ Koko rero, Gaza igiye gutereranwa, Ashikeloni itsiratsizwe, Ashidodi izameneshwa amanywa ava, naho Ekironi irimburwe.

⁵ Muriyimbire, baturage bo ku nkengero y’inyanja, mwebwe, hanga ry’Abanyakireta! Ijambo ry’Uhoraho rirakwibasiye, wowe Kanahani, rigira riti «Gihugu cy’Abafilisiti, ngiye kukumaraho abaturage!»

⁶ Ku nkengero y’inyanja hazahinduka urwuri, habe igikingi cy’abashumba n’ibiraro by’amatungo,

⁷ kandi hegurirwe abasigaye bo mu nzu ya Yuda. Bazaza kuharagira amatungo yabo, ku mugoroba baruhukire mu mazu ya Ashikeloni; kuko Uhoraho, Imana yabo, azabibuka akabakiza bundi bushya.

Abanzi b’iburasirazuba: Mowabu n’Abahamoni

⁸ Numvise ibitutsi bya Mowabu n’agasuzuguro ka bene Hamoni, igihe batutse umuryango wanjye, bakikuza barenga imbago z’igihugu cyabo.

⁹ Ni yo mpamvu mbirahije ubugingo bwanjye, uwo ni Uhoraho, Umugaba w’ingabo, Imana ya Israheli, ubivuze: Mowabu izahinduka nka Sodoma, bene Hamoni bamere nka Gomora; hazaba ahantu h’ibihuru by’amahwa, igisimu cy’umunyu n’amatongo y’iteka ryose. Abasigaye bo mu muryango wanjye bazahasahura, abacitse ku icumu b’ubwoko bwanjye bahahabweho umurage.

¹⁰ Ngicyo igihembo cy’ubwirasi bwabo, kuko batutse umuryango w’Uhoraho, Umugaba w’ingabo, bakikuza barengera imbago zawo.

¹¹ Uhoraho azabatera gukangarana bikabije, atsembe n’ibigirwamana byose by’isi, maze amahanga yose ya kure azamupfukamire, buri hanga mu gihugu cyaryo.

Abanzi bo mu majyepfo n’abo mu majyaruguru: Kushi na Ashuru

¹² Namwe rero, Banyakushi: «Inkota yanjye izabahinguranya.»

¹³ Uhoraho azaramburira ikiganza cye ku majyaruguru maze atsembe Ashuru; Ninivi azayihindura amatongo, yumagatane nk’ubutayu.

¹⁴ Amatungo kimwe n’inyamaswa z’amoko yose bizayibyagiramo; igihunyira n’ikinyogote bizarara hejuru y’inkingi zayo, bazabyumve bihumira mu madirishya. Guhera mu irebe ry’umuryango hazaba amatongo, amasederi y’igisenge asigarire aho.

¹⁵ Nguko uko uzamera, umugi w’ibyishimo wahoranaga ituze, ukibwira uti «Ni jye uriho, nta wundi!» Waba se uhindutse ute amatongo n’isenga ry’inyamaswa? Uhanyuze wese aratangara, akahamama n’ikiganza.