Zaburi 99 - Kinyarwanda Bibiliya Ntagatifu

Uhoraho ni Umwami Nyir’ubutagatifu

¹ Uhoraho ni Umwami, imiryango nihinde umushyitsi; atetse hejuru y’Abakerubimu, isi nihindagane!

² Uhoraho ni igihangange muri Siyoni, yisumbuye kure imiryango yose.

³ Nibarate izina ryawe ry’impangare kandi ritinyitse: koko uri Nyir’ubutagatifu.

⁴ Ububasha bw’umwami ni ugukunda ubutungane. Ni wowe waboneje byose, ni wowe washyize ubutungane n’ubutabera muri Yakobo.

⁵ Nimusingize Uhoraho, Imana yacu, nimupfukame imbere y’akabaho k’ibirenge bye, kuko ari Nyir’ubutagatifu!

⁶ Musa na Aroni bari mu baherezabitambo be, Samweli akaba mu biyambaza izina rye; biyambazaga izina ry’Uhoraho, maze na we akabumva.

⁷ Yababwiriraga mu nkingi y’agacu kererana, bagakurikiza amabwiriza ye, n’amategeko yari yarabahaye.

⁸ Uhoraho, Mana yacu, wowe warabasubizaga, ubagaragariza ko uri Imana itinda kurakara, ariko ukabahanira n’ibyaha byabo.

⁹ Nimurate Uhoraho, Imana yacu, maze mupfukame imbere y’umusozi we mutagatifu, kuko Uhoraho, Imana yacu, ari Nyir’ubutagatifu.