Zaburi 97 - Kinyarwanda Bibiliya Ntagatifu

Uhoraho ni Umwami ugenga byose

¹ Uhoraho ni Umwami! Isi nihimbarwe, abaturiye inkombe nibasagwe n’ibyishimo!

² Igicu cy’urwijiji kiramukikije, ubutabera n’ubutarenganya ni ikibanza cy’intebe ye.

³ Ikibatsi cy’umuriro kimugenda imbere, maze kigatwika abanzi be impande zose.

⁴ Imirabyo ye iboneshereza isi, ubutaka burabirabukwa, maze bugahinda umushyitsi.

⁵ Imisozi irashonga nk’ibishashara, mu maso y’Uhoraho, Umutegetsi w’isi yose.

⁶ Ijuru riramamaza ubutabera bwe, maze imiryango yose ikarangamira ikuzo rye.

⁷ Abayoboka ibigirwamana bose nibakorwe n’isoni, abiratana bose ibyo bipfabusa; bigirwamana mwese, nimupfukame imbere ye!

⁸ Siyoni yarabyumvise maze irishima, imigi ya Yuda irahimbarwa, ku mpamvu y’imanza zawe, Uhoraho.

⁹ Kuko wowe Uhoraho, uri Musumbabyose ku isi yose, utambutse kure imana zose.

¹⁰ Mwebwe abakunda Uhoraho, nimwange ikibi, kuko amenya ubuzima bw’abayoboke be, akabagobotora mu kiganza cy’ababi.

¹¹ Urumuri rurasira ku ntungane, ab’umutima ugororotse bakagira ibyishimo.

¹² Ntungane, nimwishimire Uhoraho, maze mumusingirize ubutungane bwe.