Zaburi 95 - Kinyarwanda Bibiliya Ntagatifu

Ishyaka ryo gukoranya abandi ngo basingize Imana

¹ Nimuze, tuvugirize impundu Uhoraho, turirimbe Urutare rudukiza;

² tumuhinguke imbere tumurata, tumuririmbire ibisingizo.

³ Kuko Uhoraho ari Imana y’igihangange, ni Umwami w’igihangange, asumba imana zose.

⁴ Ni we ufashe imizi y’isi mu kiganza cye, maze akagenga n’impinga z’imisozi.

⁵ Inyanja ni iye, ni we wayiremye, n’ubutaka bwumutse bwabumbwe n’ibiganza bye.

⁶ Nimwinjire, duhine umugongo twuname; dutere ivi imbere y’Uhoraho waturemye.

⁷ Kuko we ari Imana yacu, naho twe tukaba imbaga yo mu rwuri rwe, n’ubushyo buragiwe n’ikiganza cye. Iyaba uyu munsi mwakundaga mukumva ijwi rye!

⁸ «Ntimunangire umutima wanyu nk’i Meriba, nko ku munsi w’i Masa, mu butayu,

⁹ aho abasekuruza banyu banyinjaga, aho bangeragerezaga, n’ubwo bari barabonye ibikorwa byanjye.

¹⁰ Mu myaka mirongo ine nazinutswe iyo nyoko, maze ndavuga nti ’Ni imbaga y’umutima wararutse, ntibazi amayira yanjye!’

¹¹ Ni cyo cyatumye ndahirana uburakari ko batazinjira mu buruhukiro bwanjye.»