Zaburi 93 - Kinyarwanda Bibiliya Ntagatifu

Uhoraho ni Umwami w’ibiremwa byose

¹ Uhoraho ni Umwami, yisesuyeho ubuhangare, Uhoraho yambaye ububasha, yarabukindikije. Isi yarayishinze arayikomeza.

² Intebe yawe y’ubwami yashinzwe ubutajegajega, uriho kuva kera na kare!

³ Uhoraho, inzuzi zararanguruye, inzuzi zaranguruye ijwi ryazo, inzuzi zaranguruye umuririmo wazo.

⁴ Igisumbya ijwi amazi nyamwinshi, kigasumba ibitunda by’inyanja, ni Uhoraho, Urukerereza mu ijuru.

⁵ Ibyo waduhishuriye ni amanyakuri; Ingoro yawe ikwiranye n’ubutungane, Uhoraho, uko ibihe bizahora bisimburana.