Zaburi 90 - Kinyarwanda Bibiliya Ntagatifu

Ubuhangare bw’Imana n’intege nke za muntu

1 Isengesho rya Musa, umuntu w’Imana.

¹ Isengesho rya Musa, umuntu w’Imana. Nyagasani watubereye ikiramiro, kuva mu gisekuruza kujya mu kindi.

² Mbere y’uko imisozi ibaho, isi n’ibiyiriho byose bitararemwa, uri Imana iteka ryose rizira iherezo.

³ Abantu ubasubiza mu mukungugu, kuko wavuze uti «Bene muntu, nimusubire iyo mwavuye!»

⁴ Mu maso yawe imyaka igihumbi ni nk’umunsi w’ejo wahise, ni nk’isaha imwe y’ijoro.

⁵ Ubuzima bwa muntu ubukuraho nk’ibitotsi, bishira mu gitondo nk’icyatsi;

⁶ mu gitondo kirarabya, ururabyo rugakura, nimugoroba rukarabirana, rugahunguka.

⁷ Ni koko uburakari bwawe buradushegesha, maze ubukana bwawe bugatuma duhungabana.

⁸ Ibyaha byacu ubishyira ahagaragara, urumuri rwawe rutahura amabanga yacu.

⁹ Iminsi yacu yose irakendera ku mpamvu y’ubukana bwawe, n’imyaka yacu igahera nk’umwuka uhumekwa rimwe.

¹⁰ Imyaka y’ubugingo bwacu ni mirongo irindwi, na mirongo inani ku bakomeye; nyamara tuyigiramo imiruho n’ibyago gusa, kuko ihita bwangu, maze tukigendera.

¹¹ Ni nde watahuye uburakari bwawe bukaze, ngo arusheho kubumenya kuko agutinya?

¹² Utwumvishe ko iminsi yacu ibaze, bityo tuzagire umutima ushishoza.

¹³ Uhoraho, tugarukire! Uzaturakarira na ryari? Babarira abagaragu bawe,

¹⁴ utugwirize ineza yawe kuva mu gitondo, kugira ngo duhimbarwe iminsi yose y’ubugingo bwacu;

¹⁵ udushimishe mu minsi ingana n’iyo waduhannyemo, n’imyaka ingana n’iyo twababayemo!

¹⁶ Ibikorwa byawe nibigaragarire abagaragu bawe, n’ubuhangare bwawe bwiyereke abana babo!

¹⁷ Nyagasani Mana yacu, utugaragarize ubugwaneza bwawe, ukomeze imirimo y’amaboko yacu, kandi uyihe kugira akamaro karambye!