Zaburi 88 - Kinyarwanda Bibiliya Ntagatifu

Isengesho ryo mu gihe cy’amakuba akomeye

¹ Ni indirimbo iri muri zaburi z’abahungu ba Kore. Igenewe umuririmbisha. Ikaririmbwa bikiranya mu majwi anyuranamo . . . . Iri mu za Hemani, Umwezirahi.

² Uhoraho, Mana Mukiza wanjye, ndagutakira amanywa n’ijoro;

³ wakirane ubwuzu isengesho ryanjye, maze utege amatwi amaganya yanjye.

⁴ Kuko nugarijwe n’ibyago, n’urupfu rukaba rundi hafi.

⁵ Nsigaye mbarirwa mu batakiriho, nk’umuntu washizemo agatege.

⁶ Umwanya wanjye uri mu bapfuye, kimwe n’intumbi zirambitse mu mva, izo utacyibuka ukundi, kuko wabakuyeho amaboko.

⁷ Wanzitse ikuzimu mu rwobo, mu mwijima w’icuraburindi;

⁸ uburakari bwawe buranshikamira n’imivumba yawe irancundagura.

⁹ Abari abanjye bose ubancaho, ungira agaterashozi mu maso yabo; ubu ndaboshye, ubutinyagambura,

¹⁰ nahumye amaso kubera agahinda. Uhoraho, ndagutabaza umunsi wose, nteze ibiganza mbikwerekejeho.

¹¹ Mbese abapfuye ni bo uzakorera ibitangaza? Hari ubwo se baziyegura ngo bagusingize?

¹² Mbese mu mva ni ho baratira impuhwe zawe, cyangwa bakahavugira ubudahemuka bwawe?

¹³ Mbese mu mwijima hari icyo bazi ku bitangaza byawe, cyangwa cy’ubutabera bwawe mu gihugu cy’abibagiranye?

¹⁴ Ariko jyewe, ndagutakira, Uhoraho, kuva mu gitondo mba nakugejejeho isengesho ryanjye.

¹⁵ Uhoraho, ni iki cyatuma untererana, ukampisha uruhanga rwawe?

¹⁶ Nararushye ngera kure kuva mu buto bwanjye! Narihanganye, none ndananiwe.

¹⁷ Uburakari bwawe bwaranyokereye, urancundagura none nsigaye ndi ubusa.

¹⁸ Bwarangose nk’amazi umunsi wose, bunkoraniraho icyarimwe uko bungana.

¹⁹ Abari abanjye bose wabanciyeho, nsigaye ntaramana n’umwijima.