Zaburi 81 - Kinyarwanda Bibiliya Ntagatifu

Indirimbo yo ku munsi w’ingando

¹ Igenewe umuririmbisha, ikajyana n’inanga y’Abagati. Ya Asafu.

² Nimuvugirize impundu Uhoraho, we mbaraga zacu, nimuhimbaze Imana ya Yakobo;

³ Ngaho nimuririmbe, muvuze ishako, mucurange inanga, ijyane n’iningiri;

⁴ nimuvuze impanda ku mboneko y’ukwezi, no ku nzora yako, umunsi wacu w’ibirori.

⁵ Iryo ni itegeko muri Israheli, ryishyiriweho n’Imana ya Yakobo,

⁶ itegeko yashinze inzu ya Yozefu, igihe yibasiye igihugu cya Misiri. Ndumva imvugo idasanzwe ngo

⁷ «Urutugu rwe naruruhuye umuzigo, n’ibiganza bye birekura agatebo!

⁸ Igihe untakambiye uri mu kaga, ndagutabara; ngusubiza nihishe mu bicu no mu nkuba, nkugeragereza ku mazi y’i Meriba. (guceceka akanya gato)

⁹ Umva, muryango wanjye, nkuburire, Israheli, iyaba washoboraga kunyumva!

¹⁰ Iwawe ntihakabe imana yindi, ntugapfukamire imana y’imvamahanga!

¹¹ Ndi Uhoraho, Imana yawe, yakuvanye mu gihugu cya Misiri; wasamure cyane umunwa wawe, nzawuzuza.

¹² Nyamara, umuryango wanjye ntiwumvise ijwi ryanjye, kandi Israheli ntiyanyumvira;

¹³ nuko mbarekera ubugundire bw’umutima wabo, ngo bikurikirire ibyifuzo byabo.

¹⁴ Iyaba ariko umuryango wanjye wanyumvaga! Iyaba Israheli yagenderaga mu nzira zanjye,

¹⁵ mu kanya gato nakubita abanzi bayo, ngacyamurira ikiganza ku bayirwanya,

¹⁶ abanga Uhoraho bagatangira kumukeza, bagahora bakangaranye ubuziraherezo!

¹⁷ Naho umuryango wanjye nkawutungisha ingogore y’ingano, maze nkawuhaza ubuki bwo mu rutare!»