Zaburi 8 - Kinyarwanda Bibiliya Ntagatifu

Igisingizo cy’Umuremyi wa byose

¹ Igenewe umuririmbisha, ikajyana n’inanga y’Abagati. Ni zaburi iri mu zo bitirira Dawudi.

² Uhoraho, Mutegetsi wacu, mbega ngo izina ryawe riramamara ku isi hose! Wowe, Nyir’ikuzo uganje mu ijuru,

³ mu minwa y’abana n’iy’ibitambambuga, ni ho wizigamiye ububasha bwo gucubya abakurwanya, no gutsinda umwanzi n’umugome.

⁴ Iyo nitegereje ijuru ryaremwe n’ibiganza byawe, nkareba ukwezi n’inyenyeri wahatendetse,

⁵ ndibaza nti «Umuntu ni iki kugira ngo ube wamwibuka? Mwene muntu ni iki kugira ngo ube wamwitaho?»

⁶ Rwose habuzeho gato ngo umunganye n’imana; umutamiriza ikamba ry’ikuzo n’uburanga,

⁷ umugira umwami w’ibyo waremye, umwegurira byose ngo abitegeke:

⁸ amatungo yose, amaremare n’amagufi, ndetse n’inyamaswa zo mu gasozi,

⁹ inyoni zo mu kirere n’amafi yo mu nyanja, hamwe n’ibyogoga mu mazi byose.

¹⁰ Uhoraho, Mutegetsi wacu, mbega ngo izina ryawe riramamara ku isi hose!