Zaburi 77 - Kinyarwanda Bibiliya Ntagatifu

Mu byago by’ubu ngubu Imana izatabara Israheli, nko mu bihe bya kera

¹ Igenewe umuririmbisha, na Yedutuni. Iyi zaburi iri mu iza Asafu.

² Imana ni yo niyambaza, ndayitabaza, Imana ni yo niyambaza, kandi iranyumva.

³ Igihe ndi mu kaga, ndangamira Uhoraho, mutegera amaboko ijoro ryose, ubutarambirwa, mbona ko nta kindi cyampoza.

⁴ Iyo nibutse Imana, nsuhuza umutima, nakomeza kubizirikana, ngacika intege. (guceceka akanya gato)

⁵ Nyagasani, ntutuma ngoheka, mfite igishyika, nabuze icyo mvuga;

⁶ ndibuka iminsi ya kera, n’imyaka yo mu gihe cyahise;

⁷ ijoro ryose nkarara nibaza, ntekereza nshaka uko nabyumva.

⁸ Mbese Uhoraho yadutererana burundu, bigatuma atazongera kudutonesha ukundi?

⁹ Mbese impuhwe ze zaba zarakamye, akaba nta cyo agifite kutubwira?

¹⁰ Mbese Imana yibagiwe impuhwe zayo? Uburakari se bwatumye idukuraho umutima?

¹¹ Ndibwira nti «Umubabaro wanjye, ni uko Nyir’ijuru yatuzinutswe!» (guceceka akanya gato)

¹² Ndibuka ibikorwa byose by’Uhoraho, nkiyibutsa ibitangaza byawe bya kera,

¹³ nkazirikana ubutwari bwawe, maze nkagarukira ibigwi byawe.

¹⁴ Mana, mbega uko inzira zawe ziboneye! Nta yindi mana yindi yagusumba!

¹⁵ Ni wowe wenyine ukora ibintu by’agatangaza: wagaragarije amahanga yose ububasha bwawe.

¹⁶ Umuryango wawe wagobotowe n’ukuboko kwawe, ari bo nkomoko ya Yakobo na Yozefu. (guceceka akanya gato)

¹⁷ Mana, amazi yarakurabutswe, amazi yarakurabutswe maze arihinda, aribirindura kugeza no hasi ikuzimu!

¹⁸ Ibicu byavubuye amazi menshi, ari na ko inkuba zikubita, n’imyambi yawe inyuranamo.

¹⁹ Uko inkuba yawe yoromaga, n’imirabyo ikamurika hose, ni na ko isi yatigitaga, igahinda umushyitsi.

²⁰ Wihangiye inzira mu nyanja, uca ikirari mu ndiri yayo, ntihagira n’umwe umenya aho unyuze.

²¹ Umuryango wawe wawuyoboye nk’ishyo, ukoresheje ikiganza cya Musa na Aroni.