Zaburi 76 - Kinyarwanda Bibiliya Ntagatifu

Igisingizo cy’Imana itanga umutsindo

¹ Igenewe umuririmbisha. Ku nanga z’imirya. Iyi ndirimbo ni zaburi ya Asafu.

² Uhoraho yimenyekanyije muri Yuda, izina rye ryamamaye muri Israheli;

³ yashinze ihema rye i Salemu, naho i Siyoni ahagira ikambere.

⁴ Ni ho yavunaguriye intwaro z’intambara, ingabo, inkota n’imyambi. (guceceka akanya gato)

⁵ Uhoraho, mbega ngo uraba impangare, kubera ibirundo by’iminyago wabacuje!

⁶ Ingabo z’intwari zaratsinzwe, zamburwa intwaro zazo zose, ari uko zatwawe n’ibitotsi.

⁷ Igihe ubakangaranyije, Mana ya Yakobo, ibigari n’amafarasi byaracemerewe!

⁸ Mbega ukuntu uteye ubwoba! Ni nde waguhangara igihe cy’uburakari bwawe?

⁹ Itangazo ryawe ryumvikanira mu ijuru, isi igahindagana maze igatuza,

¹⁰ kuko Uhoraho ahagurukiye urubanza, ngo arokore intamenyekana zo ku isi. (guceceka akanya gato)

¹¹ Ndetse n’ubukana bw’abakurwanya buzaguheshe ikuzo, maze abaguhonotse ubagire imbata.

¹² Nimugirire Uhoraho Imana yanyu amasezerano kandi mujye muyuzuza; mwebwe mwese abamwegereye, nimuzanire amaturo Imana y’Impangare.

¹³ Ni we ucubya ubwirasi bw’ibikomangoma, agakangaranya abami b’isi.