Zaburi 7 - Kinyarwanda Bibiliya Ntagatifu

Isengesho ry’intungane itotezwa

¹ Ni amaganya ya Dawudi. Yayiririmbiye Uhoraho abitewe na Kushi w’Umubenyamini.

² Uhoraho Mana yanjye, ni wowe buhungiro bwanjye; ntabara, unkize abankurikirana bose!

³ Naho ubundi, barampotora nk’intare, bakantanyaguza, nta we ubatesheje.

⁴ Uhoraho, Mana yanjye, niba narahemutse mu byo nakoze, niba hari ubugome bundangwaho,

⁵ niba narituye inabi uwangiriye neza, nkareka umubisha akabaho,

⁶ nanjye umwanzi azankurikirane, amfate mpiri, andibatire ku butaka nkanuye amaso, anteshe ishema angaragura mu mukungugu! (guceceka akanya gato)

⁷ Uhoraho, hagurukana uburakari! Cubya ubukana bw’abandwanya, kanguka, Mana yanjye, wowe ubwiriza umuntu iby’ubutabera.

⁸ Imiryango nikorane igukikize, nawe uganze uyitegeke.

⁹ Uhoraho ni we ucira imanza amahanga! Uhoraho, urancire urubanza ukurikije ubutungane, n’ubuziranenge bwanjye.

¹⁰ Ubugome bw’abagizi ba nabi nibuhoshe, ukomeze ushyigikire intungane! Koko rero uzi akari mu mutima no mu nda y’umuntu, wowe Mana Nyir’ubutabera.

¹¹ Ingabo inkingira ni Imana ubwayo, ari na yo mukiza w’abafite umutima utunganye.

¹² Imana ni umucamanza utabera, ikaba n’Imana ikangara buri munsi.

¹³ Iyo umugiranabi atigaruye, ityaza inkota yayo, ikabanga umuheto wayo maze igatamika.

¹⁴ Yegeranya izo ntwaro za kirimbuzi, imyambi yayo ikayivubura ari ibishashi.

¹⁵ Umugome we, asama inda y’ubugizi bwa nabi, agatwita inda y’ubwicanyi, akabyara ikinyoma.

¹⁶ Acukura urwobo, akarugira rurerure, ariko uwo mutego akaba ari we uwugwamo!

¹⁷ Ubugome bwe ni we bukoraho, urugomo rwe rukamugaruka.

¹⁸ Nzashimira Uhoraho ubutabera bwe, ndirimbe izina ry’Uhoraho, Umusumbabyose.