Zaburi 68 - Kinyarwanda Bibiliya Ntagatifu

Imyato y’Uhoraho mu mateka ya Israheli

¹ Igenewe umuririmbisha. Iri mu zo bitirira Dawudi, ni zaburi igenewe kuririmbwa.

² Imana nihaguruke, maze abanzi bayo bakwire imishwaro, n’abayirwanya bahungire kure yayo.

³ Uko umwotsi uyoyoka, na bo ubahindure ubusa; uko ibishashara bishonga ku muriro, abo bagome bashirire imbere y’Imana.

⁴ Naho intungane zihore mu byishimo, zitete imbere y’Imana, zihamirize ubudahwema zinezerewe.

⁵ Nimuririmbire Imana, mucurange izina ryayo, nimurate Nyamugendera ku bicu; izina rye ni Uhoraho, nimumubyinire!

⁶ Ni Umubyeyi umenya impfubyi, akanarenganura abapfakazi; nguko uko Imana imeze mu Ngoro yayo ntagatifu.

⁷ Abatagira kivurira, Imana ibubakira urugo, imfungwa ikazibohora, ikazisubiza umudendezo, naho abantu b’ibyigomeke ikabatuza ku gasi. (guceceka akanya gato)

⁸ Nyagasani, igihe wagendaga ku isonga y’imbaga yawe, igihe wakatazaga mu butayu,

⁹ isi yahinze umushyitsi, ndetse n’ijuru rirashonga, imbere y’Imana yigaragarije kuri Sinayi, imbere y’Imana, Imana ya Israheli.

¹⁰ Mana, wajyaga usesekaza imvura y’umurindi, wabona inyarurembo zawe zarembye, ukazisubiza imbaraga.

¹¹ Indeka yawe babonyemo ikibanza, ni wowe, Mana, wayibakebeye kubera ubuntu ugirira abakene.

¹² Nyagasani avuga ijambo rimwe, maze intumwa ze zigasesekara ari igitero,

¹³ zigira ziti «Abami n’ingabo zabo bahunze, bahunze ubutarora inyuma, none imitako y’ingo zabo abagore bayigize iminyago, barayikwiza. Mwasigara muryamye mu macumbi mukora iki?

¹⁴ Hari amababa y’inuma ahunze feza, n’amoya yayo atatse zahabu.

¹⁵ Umusumbabyose yatatanyije abami, ku musozi w’urwijiji haragwa amasimbi.»

¹⁶ Musozi w’Imana, musozi w’i Bashani! Musozi w’ibihanamanga, musozi w’i Bashani!

¹⁷ Misozi y’ibihanamanga, kuki mwarebana ishyari umusozi Imana yishakiye guturaho? Nyamara ni ko bimeze, Uhoraho azawuturaho mu bihe byose!

¹⁸ Amafarasi Imana iremesha urugamba ni uduhumbi n’uduhumbagiza! Ni yo Umutegetsi yajeho kuri Sinayi, ajya mu Ngoro ntagatifu.

¹⁹ Wazamutse mu bitwa, maze ufata ingaruzwamuheto, abantu ubahabwaho amaturo, ndetse n’abigometse, ngo ubashe kwiyubakira Ingoro, Uhoraho Mana yacu!

²⁰ Nyagasani aragahora asingizwa iminsi yose! Iyo Mana ni yo dukesha gutsinda. (guceceka akanya gato)

²¹ Iyo Mana ni yo itubera Imana yuje imitsindo, Nyagasani Uhoraho ni we utuma umuntu ahonoka urupfu.

²² Ariko Imana ijanjagura imitwe y’abanzi bayo, ikamena agahanga gapfukiriyeho urusatsi, k’umuntu utunzwe no gukora nabi.

²³ Nyagasani aravuze ati «Nzagarura abagiye i Bashani, ndohore abarokeye mu ndiba y’inyanja,

²⁴ kugira ngo ubanyukanyukire mu maraso, maze imbwa zawe zirye imirambo y’abo banzi.»

²⁵ Mana, babonye imitambagiro yawe, imitambagiro y’Imana yanjye, n’umwami wanjye, mu Ngoro ntagatifu.

²⁶ Abaririmbyi bagendaga imbere, abacuranzi bakabaza inyuma, hagati hari abakobwa bavuza utugoma.

²⁷ Nimusingize Imana mu makoraniro, musingirize Nyagasani ku isoko ya Israheli.

²⁸ Hari bene Benyamini, umuhererezi, hakaba ibikomangoma byo kwa Yuda, n’ibikomangoma byo kwa Zabuloni, n’ibyo kwa Nefutali.

²⁹ Imana yawe yakugeneye gukomera: Mana, erekana rero imbaraga zawe, wowe wagaragaje ibigwi ari twe urwanaho.

³⁰ Abami nibabona Ingoro yawe iri ahirengeye muri Yeruzalemu, bazatanguranwa bakuzanira amaturo.

³¹ Kangara cya gikoko cyo mu rufunzo, na bwa bushyo bw’ibimasa n’inyana bitagira ingano, n’ibigendesha inda byose bifite imboho z’ifeza. Tatanya imiryango ikunda imirwano!

³² Abantu b’abakire baturutse mu Misiri, Abo muri Nubiya barambuye ibiganza babyerekeje ku Mana. (guceceka akanya gato)

³³ Ngoma z’isi, nimuririmbire Imana, mucurangire Nyagasani!

³⁴ We ugendera mu bushorishori bw’ijuru rya kera na kare! Ng’uwo aranguruye ijwi, ijwi rikomeye cyane:

³⁵ ububasha nimubuharire Imana! Ububengerane bwayo buganje hejuru ya Israheli, ububasha bwayo bukaba mu bicu.

³⁶ Mana, aho uri mu Ngoro yawe, uhorana icyusa. Imana ya Israheli ni yo iha abantu bayo imbaraga n’ubushobozi. Imana nisingizwe!